नागरी संरक्षण दल व होमगार्ड मार्फत राज्यातील 34 जिल्ह्यामध्ये आपत्ती व्यवस्थापन मॉकड्रिलचे आयोजन

 

नागरी संरक्षण दल व होमगार्ड मार्फत राज्यातील 34 जिल्ह्यामध्ये

आपत्ती व्यवस्थापन मॉकड्रिलचे आयोजन 

अमरावती, दि. 2 : नागरी संरक्षण दल व होमगार्ड यांच्या मार्फत महाराष्ट्र राज्य स्कुल सेफ्टी कार्यक्रमांतर्गत 34 जिल्ह्यातील निवड केलेल्या 34 शाळा अथवा महाविद्यालयामध्ये आपत्ती व्यवस्थापन मॉकड्रिलचे आयोजन 14 डिसेंबर पर्यंत करण्यात आले आहे.

आपत्ती व्यवस्थापन मॉकड्रिलचे आयोजन महाराष्ट्र राज्य शिक्षण विभाग, यु एन डी पी व महाराष्ट्र राज्य आपत्ती व्यवस्थापन विभाग यांच्या पुढाकाराने आणि रिका इंडिया या संस्थेच्या सहकार्याने  करण्यात आले आहे.

नागरी संरक्षण दल व होमगार्ड विभागातील अधिकारी संबंधित शाळा अथवा महाविद्यालयातील शिक्षकांशी समन्वय साधून आपत्ती व्यवस्थापन मॉकड्रिल आयोजित करणार आहेत. यामध्ये विद्यार्थ्यांना धोक्याची सूचना, आग विमोचन, स्थलांतर, याची प्रात्यक्षिक दाखवण्यात येणार आहेत. विद्यार्थ्यांना नैसर्गिक आपत्ती व मानव निर्मित आपत्तीमध्ये धैर्याने संकटावर मात कशी करावी तसेच आपत्ती व्यवस्थापनाचे बहुमोल व उपयोगी प्राथमिक प्रशिक्षण या मॉकड्रिलच्या माध्यमातून देण्यात येणार आहे.

000000

स्वातंत्र्याच्या अमृत महोत्सवानिमित्त पंडीत दिनदयाल उपाध्याय रोजगार मेळावा रोजगार मेळाव्यात 239 सुशिक्षित बेरोजगार उमेदवारांना रोजगार प्राप्ती

 

           

स्वातंत्र्याच्या अमृत महोत्सवानिमित्त पंडीत दिनदयाल उपाध्याय रोजगार मेळावा

रोजगार मेळाव्यात 239 सुशिक्षित बेरोजगार उमेदवारांना रोजगार प्राप्ती

           अमरावती, दि. 2 : जिल्हा कौशल्य विकास, रोजगार व उद्योजकता मार्गदर्शन केंद्र तसेच पी. आर. पोटे पाटील अभियांत्रिकी व व्यवस्थापन महाविद्यालय यांच्या संयुक्त विद्यमाने नुकताच पंडीत दिनदयाळ उपाध्याय रोजगार मेळाव्याचे आयोजन करण्यात आले होते. या रोजगार मेळाव्यात 239 सुशिक्षित बेरोजगार उमेदवारांची विविध पदांवर प्राथमिक निवड करण्यात आली. या मेळाव्याला तरुणांचा उत्स्फूर्त प्रतिसाद लाभला.

           पंडीत दिनदयाळ उपाध्याय रोजगार मेळाव्यामध्ये ऑनलाईन व ऑफलाईन अशा 640 उमेदवारांनी सहभाग नोंदविला होता. त्यापैकी 410 उमेदवारांनी प्रत्यक्ष मुलाखती दिल्या. मुलाखती दिलेल्या उमेदवारांपैकी 239 उमेदवारांची प्राथमिक निवड करण्यात आली.

जिल्हा नियोजन अधिकारी वर्षा भाकरे यांच्या अध्यक्षतेखाली या मेळाव्याचे आयोजन करण्यात आले होते. उपायुक्त सुनील काळबांडे, सहायक आयुक्त प्रफुल शेळके, प्राचार्य, डॉ. डी. इंगोले आदी मान्यवर यावेळी उपस्थित होते.

           मेळाव्यामध्ये पियाजिओ व्हेईकल्स प्रा. लि., बारामती तसेच पुणे, स्थापत्य कन्सलटंन्स प्रा. लि. अमरावती, गोल्डन फायबर लिमिटेट, नांदगाव पेठ, द युनिवर्सल ग्रुप असोसिएट्स, नागपूर या नामांकित खाजगी आस्थापनेच्या प्रतिनिधींनी उमेदवारांच्या मुलाखती घेतल्या.

कार्यक्रमाचे प्रास्ताविक श्री. शेळके यांनी केले. संचालन पी. आर. पोटे पाटील  महाविद्यालयाचे सुहास पवार यांनी तर आभार कौशल्य विकास अधिकारी वैशाली पवार यांनी मानले.

000000

क्षय रूग्णालयात एड्स दिन साजरा

 

क्षय रूग्णालयात एड्स दिन साजरा

            अमरावती, दि. 2 : जागतिक एड्स दिनानिमित्त शासकीय  गो. ग. राठी क्षय रूग्णालयात नुकताच एड्स दिन साजरा करण्यात आला. डॉ. सतिश डहाके यांच्या अध्यक्षतेखाली या कार्यक्रमाचे आयोजन करण्यात आले होते.

डॉ. नवरे, डॉ. धांडे व श्री. बल्लाळ यावेळी उपस्थित होते. अधिपरिचारीका, प्रयोगशाळा तंत्रज्ञ, औषध निर्माण अधिकारी, क्ष-किरण वैज्ञानिक अधिकारी, कार्यालयातील कर्मचारी उपस्थित होते. कार्यक्रमाचे प्रास्ताविक नितीन बेदरकर यांनी केले. या वर्षीचे घोषवाक्य ‘समानता’ आहे. डॉ. डहाके यांनी एचआयव्ही व एड्स होण्याची कारणे व घ्यावयाची काळजी याबद्दल मार्गदर्शन केले. डॉ. धांडे यांनी एचआयव्ही रूग्णांचे अधिकार व हक्क व पाळावयाची गोपनियता याबाबत मार्गदर्शन केले. आभार शुभांगी उमरकर यांनी मानले.

 0000

सशस्त्र सेना ध्वजदिन निधी संकलन शुभारंभ 7 डिसेंबरला

 

सशस्त्र सेना ध्वजदिन निधी संकलन शुभारंभ 7 डिसेंबरला

 

अमरावती, दि. 1 : जिल्हा सैनिक कल्याण कार्यालयामार्फत ध्वजदिन 2022 निधी संकलन शुभारंभ दि. 7 डिसेंबर रोजी सकाळी 11 वाजता नियोजन भवन सभागृहाच्या नवीन इमारतीमध्ये आयोजित करण्यात आला आहे.

यावेळी राज्याचे उपमुख्यमंत्री तथा जिल्ह्याचे पालकमंत्री देवेंद्र फडणवीस, विभागीय आयुक्त डॉ. दिलीप पांढरपट्टे, जिल्हाधिकारी पवनीत कौर आदी मान्यवर उपस्थित राहणार आहेत. या कार्यक्रमामध्ये शहीद जवानांच्या वीरपत्नी, वीरमाता, वीरपिता, शौर्यपदकधारक यांचा सत्कार करण्यात येणार आहे. माजी सैनिक तसेच माजी सैनिकांच्या विधवा पत्नी ज्यांचे विशेष गौरव पुरस्काराच्या मदतीची प्रकरणे मंजूर झाली आहेत, त्यांना यावेळी धनादेशाचे वाटप करण्यात येणार आहे. ध्वजदिन निधीस सढळहस्ते मदत करणाऱ्या कार्यालय प्रमुखांचाही यावेळी गौरव करण्यात येणार आहे. या कार्यक्रमाला नागरिक, माजी सैनिकांनी उपस्थित राहण्याचे आवाहन जिल्हा सैनिक कल्याण अधिकारी मनिषकुमार गायकवाड यांनी केले आहे.

देशाच्या संरक्षणासाठी ज्यांनी आपले प्राणार्पण केले अशा जवानांच्या कुटुंबियांच्या जीवनातील अडी-अडचणी दूर करुन त्यांचे दैनंदिन जीवन सुसह्य व्हावे, त्याचप्रमाणे युध्दात अपंगत्व प्राप्त झालेल्या आणि सशस्त्र दलातून निवृत्त झालेल्या जवानांच्या पुनर्वसनाच्या विविध कल्याणकारी योजना राबविण्यासाठी ध्वजनिधीचा विनियोग करण्यात येतो. देशाच्या सीमा आणि स्वातंत्र्याचे प्राणपणाने रक्षण करतांनाच देशात उद्भवणाऱ्या कायदा आणि सुव्यवस्थाविषयक समस्या, नैसर्गिक आपत्तीत नागरिकांच्या सहाय्याला त्वरेने धावून जाणाऱ्या सैनिकांना ध्वजदिन निधी संकलनातून सहाय्य करण्यात येते.

00000

 

ग्रा. पं. निवडणुकांसाठी नामनिर्देशनपत्र ऑफलाईन सादर करण्याची मुभा

 

ग्रा. पं. निवडणुकांसाठी नामनिर्देशनपत्र

ऑफलाईन सादर करण्याची मुभा

 

अमरावती, दि. 1 : ग्रामपंचायतींच्या सदस्यपदांसह थेट सरपंचपदाच्या सार्वत्रिक निवडणुकांसाठी पारंपरिक पद्धतीने (ऑफलाईन) नामनिर्देशनपत्र सादर करण्याची मुभा देण्यात आली आहे. तसेच, नामनिर्देशनपत्र सादर करण्याची मुदत 2 डिसेंबर रोजी सायंकाळी 5.30 पर्यंत वाढविण्यात आली आहे.

तसे पत्र राज्य निवडणूक आयोगाकडून जिल्हाधिकारी कार्यालयाला प्राप्त झाले आहे.

राज्य निवडणूक आयोगाने 9 नोव्हेंबर 2022 रोजी राज्यातील 7 हजार 751 ग्रामपंचायतींच्या सार्वत्रिक निवडणुकांची घोषणा केली होती. त्यानुसार दि.28 नोव्हेंबर 2022 ते 2 डिसेंबर  (दुपारी 3 वाजेपर्यंत) या कालावधीत संगणक प्रणालीद्वारे नामनिर्देशनत्र सादर करण्याच्या सूचना देण्यात आल्या होत्या. त्यात आता अंशत: दुरूस्ती करून नामनिर्देशनपत्र पारंपरिक (ऑफलाईन) पद्धतीने 2 डिसेंबर रोजी सायंकाळी 5.30 पर्यंत सादर करता येतील, अशी माहिती उपजिल्हा निवडणूक अधिकारी डॉ. नितीन व्यवहारे यांनी दिली.

नामनिर्देशन पत्र व घोषणापत्र यांचे कोरे नमुने इच्छुकांना उपलब्ध असावेत.  पारंपारिक पध्दतीने स्वीकारलेले नामनिर्देशनपत्र छाननी प्रक्रिया पूर्ण झाल्यानंतर केवळ वैध नामनिर्देशनपत्र संगणकात भरून घेण्याची तहसीलदारांकडे सोपविण्यात आली आहे. तशा सूचना आयोगाने केल्या आहेत.

 

00000

भरडधान्य खरेदी नोंदणीसाठी 7 डिसेंबरपर्यंत मुदतवाढ

 

भरडधान्य खरेदी नोंदणीसाठी 7 डिसेंबरपर्यंत मुदतवाढ

 

अमरावती, दि. 1 : आधारभूत किंमत खरेदी योजनेत भरडधान्य ज्वारी व मका खरेदीसाठी शेतकरी बांधवांची नोंदणी करण्यासाठी आता दि. 7 डिसेंबरपर्यंत मुदतवाढ देण्यात आली आहे. याची शेतकऱ्यांनी नोंद घ्यावी, असे आवाहन जिल्हा मार्केटिंग अधिकारी, अमरावती यांनी केले आहे.       

आधारभूत किंमत खरेदी योजनेंतर्गत राज्य शासनामार्फत भरडधान्य ज्वारी व मका खरेदीसाठी शेतकऱ्यांची नोंदणी करण्यासाठी जिल्हा मार्केटिंग अधिकारी कार्यालयामार्फत जिल्ह्यात अचलपूर, मोर्शी, वरुड, चांदूर बाजार व चांदूर रेल्वे या पाच तालुक्यात खरेदी केंद्रे उघडण्यात आली आहेत.

शेतकरी नोंदणी करतांना या हंगामापासून ज्या शेतकऱ्यांचा 7/12 आहे, त्या शेतकऱ्यांचा प्रत्यक्ष लाईव्ह फोटो अपलोड करणे आवश्यक आहे. त्याशिवाय नोंदणी पूर्ण होत नाही. त्यामुळे ज्या शेतकऱ्यांना शेतमालाची विक्री करावयाची आहे, त्या शेतकऱ्याने लाईव्ह फोटो अपलोड करण्यासाठी स्वत: खरेदी केंद्रावर उपस्थित राहण्याबाबत जिल्हा मार्केटिंग अधिकारी कार्यालयामार्फत कळविण्यात आले आहे. 

00000

आंतरराष्ट्रीय दिव्यांग दिन 3 डिसेंबरला दिव्यांग जनजागृती रॅलीतून देणार जनजागृतीचा संदेश

 

आंतरराष्ट्रीय दिव्यांग दिन 3 डिसेंबरला

दिव्यांग जनजागृती रॅलीतून देणार जनजागृतीचा संदेश

अमरावती, दि. 1 : आंतरराष्ट्रीय दिव्यांग दिन 3 डिसेंबर रोजी समाज कल्याण विभागामार्फत दिव्यांग जनजागृती रॅलीचे आयोजन करण्यात आले आहे.

जिल्हा समाज कल्याण अधिकारी, अमरावती जिल्हा परिषद कार्यालय तसेच शहरातील दिव्यांगांच्या विशेष शाळा व कार्यशाळा यांच्या संयुक्त विद्यमाने या रॅलीचे आयोजन करण्यात आले आहे. जनजागृती रॅलीचा मार्ग इर्विन चौकातील डॉ. बाबासाहेब आंबेडकर पुतळा येथून सुरु होऊन गर्ल्स हायस्कूल चौक ते पुढे पोलीस कल्याण पेट्रोल पंप येथून पोलीस आयुक्त कार्यालयामार्गे सामाजिक न्याय भवन असा राहील. सुरुवातीला सकाळी 9 वाजता डॉ. बाबासाहेब आंबेडकर यांच्या पुतळ्यास मान्यवरांच्या हस्ते पुष्पहार अर्पण करुन रॅली मार्गस्थ होईल.

दिव्यांग जनजागृती रॅलीमध्ये विभागीय आयुक्त, जिल्हाधिकारी, पोलीस आयुक्त, मुख्य कार्यकारी अधिकारी, महानगरपालिका आयुक्त, समाज कल्याण विभागाचे प्रादेशिक उपायुक्त आदी मान्यवर उपस्थित राहतील.  या रॅलीमध्ये शहरातील अंध प्रवर्गाच्या दोन शाळा, मुकबधिरांच्या तीन तर मतिमंदांच्या सहा शाळा तसेच अस्थिव्यंगांच्या दोन शाळा अशा एकूण 13 शाळा-कर्मशाळेतील सुमारे पाचशे ते सहाशे कर्मचारी सहभागी होणार आहेत. नागरिकांमध्ये दिव्यांगांविषयी जनजागृतीचा संदेश पोहचविण्यासाठी रॅलीमध्ये विविध प्रकारच्या वेशभूषा, ब्रीदवाक्य, फलक यांचा समावेश करण्यात येणार असल्याची माहिती जिल्हा समाज कल्याण अधिकारी राजेंद्र जाधवर यांनी दिली आहे.

00000