अमरावती विभाग शिक्षक निवडणुकीसाठी जिल्हास्तरीय
एमसीएमसी समिती कार्यान्वित
इलेक्ट्रॉनिक माध्यमातील राजकीय जाहिरातीचे पूर्व
प्रमाणीकरण आवश्यक - नयना गुंडे
अमरावती दि. 6: महाराष्ट्र विधान परिषदेच्या अमरावती विभाग शिक्षक
मतदार संघ द्विवार्षिक निवडणूक- 2026 च्या अनुषंगाने सहायक निवडणूक निर्णय अधिकारी
तथा जिल्हाधिकारी यांच्या अध्यक्षतेखाली अमरावती, अकोला, यवतमाळ, बुलढाणा आणि वाशिम
जिल्ह्यातील जिल्हास्तरीय माध्यम संनियंत्रण आणि प्रमाणीकरण समिती (एमसीएमसी) कार्यान्वित
करण्यात आली असून निवडणूक प्रचारासाठी उपयोगात आणले जाणारे बल्क एसएमएस, रेकॉर्डेड
व्हाईस मेसेजेस, इलेक्ट्रॉनिक माध्यमातील तसेच सर्व प्रकारच्या डिजिटल मीडिया जाहिराती
यांना जिल्हास्तरीय माध्यम प्रमाणीकरण आणि संनियंत्रण समितीकडून (एमसीएमसी) प्रमाणीकरण
करुन घेणे बंधनकारक आहे, असे विभागीय आयुक्त तथा निवडणूक निर्णय अधिकारी नयना गुंडे
यांनी कळविले आहे.
निवडणूक प्रचारासाठी राजकीय पक्ष, उमेदवार तसेच
त्रयस्थ व्यक्तींकडून विविध माध्यमांचा इलेक्ट्रॉनिक माध्यमांचा वापर होत असतो. एमसीएमसी
समितीमार्फत वृत्तपत्र आणि दूरचित्रवाणी वाहिन्यांवरील पेड न्यूजवर लक्ष ठेवण्यासोबतच
राजकीय जाहिरातींचे प्रमाणीकरण करण्यात येते. निवडणूक प्रचाराच्या जाहिराती दूरचित्रवाणी
वाहिन्या, केबल वाहिन्या, सिनेमा हॉल, रेडिओ, सार्वजनिक तसेच खासगी एफएम चॅनेल्स, सार्वजनिक
ठिकाणी दाखविण्याच्या दृक-श्राव्य जाहिराती, बल्क एसएमएस, रेकॉर्ड केलेले व्हाईस मेसेजेस
तसेच सोशल मीडिया, इंटरनेट संकेतस्थळावरुन प्रसिद्ध करावयाच्या जाहिराती जिल्हास्तरीय
माध्यम प्रमाणीकरण व संनियंत्रण समितीकडून प्रमाणीत करुन घेणे आवश्यक आहे.
प्रमाणित करावयाच्या जाहिरातीचा मजकूर इलेक्ट्रॉनिक
स्वरुपात आणि दोन प्रतीत संहितेसह समितीकडे प्रसारणाच्या 3 दिवस अगोदर सादर करावा.
उमेदवारांच्या राजकीय जाहिरातींच्या प्रमाणीकरणासाठी जिल्हास्तरीय माध्यम प्रमाणीकरण
आणि संनियंत्रण समितीशी (एमसीएमसी) संबंधित जिल्ह्यातील जिल्हा माहिती कार्यालयात संपर्क
साधावा, असे आवाहन निवडणूक प्रशासनातर्फे करण्यात आले आहे.
00000000
विधान परिषदेच्या शिक्षक मतदारसंघाच्या निवडणूकीत
असे करा मतदान...
अमरावती, दि.
6 - भारत निवडणूक आयोगामार्फत घेण्यात येणाऱ्या विधानपरिषदेच्या शिक्षक मतदारसंघाच्या
निवडणुकीची मतदान पद्धती आणि आयोगामार्फत घेण्यात येणाऱ्या अन्य सार्वत्रिक निवडणुकातील
मतदानाची पद्धती यात मूलभूत फरक आहे. विधानपरिषद निवडणूकीचे मतदान हे मतपत्रिकेवर उमेदवारांच्या
नावापुढे पसंतीक्रम नोंदवून घेण्यात येते. जितके उमेदवार निवडणूक लढवित असतील अशा सर्वांपुढे
पसंतीक्रम नोंदविता येतो. मतदानाच्या या वेगळ्या पद्धतीमुळे मतदारांनी आणि विशेषत:
प्रथमच मतदान करणाऱ्यांनी ही पद्धत जाणून योग्यरितीने मतदान करावे, असे आवाहन निवडणूक
निर्णय अधिकारी तथा विभागीय आयुक्त नयना गुंडे यांनी केले आहे.
असे करा मतदान:
मतदान करण्यासाठी
निवडणूक अधिकाऱ्याने मतपत्रिकेबरोबर पुरवलेले जांभळ्या ( व्हायलेट ) रंगाचे स्केच पेनच
वापरावे. अन्य कोणतेही पेन, पेन्सिल, बॉलपॉईन्ट पेन किंवा अन्य कोणतेही लेखनाचे साधन
मतदानासाठी वापरु नये. असे केल्यास तुमची मतपत्रिका अवैध ठरेल.
उमेदवाराच्या
नावाच्या स्तंभासमोर पसंतीक्रम म्हणून असलेल्या स्तंभामध्ये तुम्ही प्रथम पसंतीचा उमेदवार
म्हणून निवडलेल्या उमेदवाराच्या नावासमोर 1 असा आकडा लिहून मतदान करा. हा 1 हा आकडा
फक्त एकाच उमेदवाराच्या नावासमोर द्यावा.
निवडून द्यावयाच्या
उमेदवारांची संख्या विचारात न घेता जेवढे उमेदवार निवडणूक लढवत असतील तेवढे पसंतीक्रम
तुम्हाला देता येतील.
कोणत्याही उमेदवाराच्या
नावासमोर आपण फक्त एकच आकडा टाकलेला आहे याची खात्री करून घ्यावी. तसेच तोच आकडा एकापेक्षा
अधिक उमेदवारांच्या नावासमोर टाकलेला नाही याची देखील खात्री करुन घ्यावी. पसंतीक्रम
फक्त 1, 2, 3 इत्यादी आकड्यांमध्येच दर्शवावा. एक, दोन, तीन इत्यादी शब्दांमध्ये दर्शवू
नये. पसंतीक्रमाचे आकडे भारतीय अंकाच्या 1, 2, 3 इत्यादींसारख्या आंतरराष्ट्रीय रुपात
किंवा I, II, III इत्यादींसारख्या रोमन रुपात किंवा 1, 2, 3 अशा देवनागरी रुपात किंवा
संविधानाच्या आठव्या अनुसूचीमधील मान्यता दिलेल्या कोणत्याही एका भारतीय भाषेमध्ये
वापरण्यात येणाऱ्या रुपामध्ये चिन्हांकित करता येतील.
मतपत्रिकेवर मतदाराने
आपले नाव, आद्याक्षरे किंवा अन्य शब्द लिहू नयेत किंवा स्वाक्षरी करु नये. तसेच आपल्या
अंगठ्याचा ठसा देखील उमटवू नये. असे केल्यास आपली मतत्रिका अवैध ठरेल.
पसंतीक्रम दर्शविण्यासाठी
तुमच्या निवडीच्या उमेदवाराच्या नावासमोर √
किंवा X अशी खूण करणे टाळावे. अशा मतपत्रिका बाद करण्यात येतील. पसंतीक्रम फक्त आकड्यांमध्येच
दर्शवावा.
आपली मतपत्रिका
वैध ठरण्यासाठी एकूण उमेदवारांपैकी एका उमेदवारासमोर 1 हा आकडा लिहून तुमची पहिली पसंती
दर्शवणे आवश्यक आहे. इतर पसंतीक्रम देणे ऐच्छिक आहेत. म्हणजेच इच्छेनुसार दुसरी किंवा
पुढील पसंती दर्शवावी.
अशा मतपत्रिका अवैध ठरतील:
1 हा आकडा टाकलेला
नसल्यास. 1 हा आकडा एकापेक्षा अधिक उमेदवारांच्या नावासमोर टाकलेला असल्यास. 1 हा आकडा,
तो कोणत्या उमेदवाराला देण्यासाठी टाकलेला आहे याबाबत शंका निर्माण होईल अशाप्रकारे
टाकलेला असेल. एकाच उमेदवाराच्या नावासमोर 1 आणि त्याबरोबर 2, 3 इत्यादी आकडे देखील
टाकलेले असतील. पसंतीक्रम आकड्याऐवजी शब्दांमध्ये दर्शवलेला असेल. मतदाराची ओळख पटू
शकेल अशी कोणतीही खूण किंवा लेखन असले, आणि असे आकडे टाकण्यासाठी निवडणूक अधिकाऱ्याने
दिलेल्या जांभळ्या रंगाच्या स्केच पेन व्यतिरिक्त अन्य साधनाने कोणताही आकडा टाकलेला
असेल, तरी अशी मतपत्रिका अवैध ठरेल.
000000
.jpeg)
.jpeg)
.jpeg)
.jpeg)
