निवृत्तीवेतनधारकांसाठी आज 'डिजिटल जीवन प्रमाणपत्र' मार्गदर्शन सत्राचे आयोजन
अमरावती, दि.5 (जिमाका): वरिष्ठ कोषागार कार्यालय, अमरावती यांच्या वतीने जिल्ह्यातील सर्व निवृत्तीवेतनधारकांसाठी (पेन्शनर्स) डिजिटल जीवन प्रमाणपत्र ऑनलाईन सबमिट करताना येणाऱ्या अडचणी दूर व्हाव्यात आणि ही पद्धत सोपी व सुलभ व्हावी, या उद्देशाने शुक्रवार, 6 नोव्हेंबर रोजी सकाळी 11 वाजता अमरावती येथील कोषागार कार्यालयाच्या जिजाऊ सभागृहात एका विशेष मार्गदर्शन सत्राचे आयोजन करण्यात आले आहे.या मार्गदर्शन सत्रासाठी जिल्ह्यातील निवृत्तीवेतनधारकांनी मोठ्या संख्येने उपस्थित राहण्याचे आवाहन कोषागार अधिकारी, (निवृत्ती वेतन) अमोल इखे यांनी केले आहे.
या मार्गदर्शन सत्रात ऑनलाईन डिजिटल जीवन प्रमाणपत्र नेमके कसे सादर करावे, याची सविस्तर आणि प्रत्यक्ष माहिती या दिली जाणार आहे. हे प्रमाणपत्र वेळेत सादर न झाल्यास निवृतीवेतन मिळण्यात अडचण येऊ शकते, त्यामुळे हे सत्र निवृत्तीवेतनधारकांसाठी फायद्याचे ठरणार आहे. मार्गदर्शन सत्रास उपस्थित राहणाऱ्या सर्व निवृत्तीवेतनधारकांनी पेन्शन पेमेंट ऑर्डर क्रमांक, पेन्शन बँक पासबुक, आधार कार्ड, आधार क्रमांकाशी लिंक असलेला मोबाईल क्रमांक आणणे बंधनकारक आहे.
0000
मोझरी,कौंडण्यपूर आणि वलगाव विकास आराखडयांतर्गत होणार दुरुस्ती कामे
अमरावती,दि.5 (जिमाका) : राष्ट्रसंत तुकडोजी महाराज मोझरी,श्री.क्षेत्र कौंडण्यपूर आणि श्री.संत गाडगेबाबा वलगाव तिर्थक्षेत्र विकास आराखड्यांतर्गत २० कोटी १९ लाख ८५ हजार रुपयांच्या अत्यावश्यक दुरुस्ती कामांच्या प्रस्तावास राज्याचे मुख्य सचिव राजेश अग्रवाल यांच्या अध्यक्षतेखालील उच्चाधिकार समितीने मंजुरी दिली आहे.
मोझरी,कौंडण्यपूर आणि वलगाव येथील तिर्थक्षेत्र विकास आराखडयांतर्गत उभारण्यात आलेल्या इमारतींच्या दुरुस्तीबाबत सार्वजनिक बांधकाम विभागामार्फत मुख्य सचिवांच्या अध्यक्षतेखाली मंत्रालयात उच्चाधिकार समितीची बैठक पार पडली. सार्वजनिक बांधकाम विभागाचे सचिव आबासाहेब नागरगोजे, दूरदृश्य प्रणालीद्वारे जिल्हाधिकारी आशिष येरेकर, नियोजन विभागाच्या सह सचिव गीतांजली बाविस्कर आणि सार्वजनिक बांधकाम विभागाचे अधिक्षक अभियंता सचिन चिवटे बैठकीत उपस्थित होते.
या बैठकीत तीनही तिर्थक्षेत्र विकास आराखडयातील काम पूर्ण झालेल्या इमारतींच्या दुरुस्ती कामांचे व हस्तांतरणाबाबत अमरावती विभागीय आयुक्तांना सुधारीत प्रस्ताव सादर करण्याचे निर्देश देण्यात आले. त्यानुसार सादर प्रस्तावानुसार राष्ट्रसंत तुकडोजी महाराज मोझरी तिर्थक्षेत्र विकास आरखडयांतर्गत राष्ट्रसंत तुकडोजी महाराज अध्यात्मिक संकुल, ग्राम विकास प्रबोधिनीसाठी,भक्त निवास, अति महत्वाच्या व्यक्तींकरिता विश्रामगृहाच्या १२ इमारतींची दुरुस्ती आणि या सर्व इमारतींना कायमस्वरुपी पाणी पुरवठयाची सोय करण्यासाठी एकूण १६ कोटी ५५ लाखाच्या निधीस मंजुरी देण्यात आली आहे.
श्री. क्षेत्र कौंडण्यपूर तिर्थक्षेत्र विकास आराखडयांतर्गत प्रसाधनगृह इमारत,पर्यटक विसावा इमारत, उपहारगृह इमारत, विश्रामगृह इमारत आणि पोहोच मार्गासाठी एकूण १ कोटी ८४ लाख २० हजार रुपयांच्या दुरुस्तीकामांना मंजुरी देण्यात आली आहे.
संत गाडगेबाबा वलगाव तिर्थक्षेत्र विकास आराखडयातील अस्तीत्वातील इमारतींमध्ये सुविधा देण्यासाठी मुख्यत्वे आतील व बाहेरील रंगरंगोटी,परिसराची साफसफाई,आवश्यक फ्लोरींग तसेच इतर दुरस्ती, रेन वॉटर हार्वेस्टींग,पाणी पुरवठा,विद्युतीकरण अशा कामांसाठी १ कोटी ८० लाख ६५ हजारांच्या निधीला मंजुरी देण्यात आली आहे.
०००००
पारधी समाजातील सुशिक्षित बेरोजगारांसाठी इलेक्ट्रिक व वाईंडिंग प्रशिक्षण
नवीन पात्र संस्थांकडून प्रस्ताव आमंत्रित
अमरावती, दि.५ (जिमाका) : एकात्मिक आदिवासी विकास प्रकल्प, धारणी अंतर्गत पारधी समाजाच्या विकासासाठी सन २०२३-२४ या आर्थिक वर्षातील मंजूर योजनेनुसार, पारधी समाजातील बेरोजगार विद्यार्थ्यांना इलेक्ट्रिक व वाईंडिंगचे प्रशिक्षण देण्यासाठी नवीन पात्र आणि नामांकित संस्थांकडून प्रस्ताव मागविण्यात येत आहेत.
या प्रशिक्षणासाठी पूर्वी एका संस्थेची निवड करण्यात आली होती. मात्र, आदेश देऊनही संबंधित संस्थेने दिलेल्या मुदतीत हा प्रशिक्षण कार्यक्रम प्रत्यक्षात राबविला नसल्याने प्रशिक्षण तात्काळ सुरू करण्याच्या उद्देशाने पूर्वीची प्रक्रिया रद्द करून, आता कामाचा अनुभव असलेल्या नवीन इच्छुक व पात्र संस्थांकडून नव्याने प्रस्ताव मागविण्यात येत आहेत.
या योजनेच्या अटी व शर्तींबाबतची सविस्तर माहिती एकात्मिक आदिवासी विकास प्रकल्प कार्यालयाच्या सूचना फलकावर उपलब्ध आहे. तसेच विहित नमुन्यातील अर्ज कार्यालयातून घ्यावे लागतील. कार्यालयातून अर्ज मिळण्याची आणि सादर करण्याची मुदत शासकीय सुट्टींचे दिवस वगळता १२ ते २० नोव्हेंबर २०२६ पर्यंत राहील.
अधिक माहितीसाठी इच्छुक संस्थांनी एकात्मिक आदिवासी विकास प्रकल्प कार्यालय, धारणी येथे संपर्क साधावा, असे आवाहन सहाय्यक जिल्हाधिकारी तथा प्रकल्प अधिकारी सिद्धार्थ शुक्ला यांनी केले आहे.
०००००
३७ हजारांहून अधिक शेतकऱ्यांना होणार लाभ
जिल्हाधिकारी कार्यालयाने केले आदेश जारी
अमरावती, दि. ५ (जिमाका): माहे जून ते ऑगस्ट २०२६ या कालावधीत जिल्ह्यात झालेल्या अतिवृष्टी आणि पूर परिस्थितीमुळे शेतीचे मोठे नुकसान झाले होते. या पार्श्वभूमीवर बाधित शेतकऱ्यांसाठी मदत व पुनर्वसन विभागाच्या निर्णयानुसार, ४४ कोटी २१ लाख ३३ हजार रुपये निधी वितरीत करण्यास शासनाने मंजुरी दिली आहे. जिल्हाधिकारी कार्यालयाकडून याबाबतचे अधिकृत आदेश जारी करण्यात आले आहेत.
जिल्हाधिकारी कार्यालयाकडून याबाबत मंगळवार,३ नोव्हेंबर रोजी अधिकृत आदेश जारी करण्यात आले अतिवृष्टीमुळे व पुरामुळे जिल्ह्यातील अमरावती, भातकुली, नांदगाव खंडेश्वर, चांदूर रेल्वे, अंजनगाव सुर्जी, धामणगाव रेल्वे, धारणी, चिखलदरा, मोर्शी आणि तिवसा या तालुक्यांमधील एकूण ४०,९५७.१२ हेक्टर आर क्षेत्रावरील शेतीपिकांचे नुकसान झाले असून एकूण ३७ हजार १५ शेतकरी बाधित झाले.
शासनाद्वारे मंजूर मदत निधीतून अंजनगाव सुर्जी आणि नांदगाव खंडेश्वर तालुक्यांमधील बाधित शेतकऱ्यांना थेट लाभ मिळणार आहे. अंजनगाव सुर्जी तालुक्यातील ३२ बाधित शेतकऱ्यांच्या ७.४५ हेक्टर क्षेत्रावरील कायमस्वरूपी जमिनीच्या नुकसानीसाठी ३ लाख ५० हजरांचा निधी मंजूर करण्यात आला आहे.नांदगाव खंडेश्वर तालुक्यातील २५०६ बाधित शेतकऱ्यांच्या ७६१.२१ हेक्टर क्षेत्रावरील नुकसानीसाठी १ कोटी ४२ लाख १९ हजारांचा निधी मंजूर झाला आहे.
शासन निर्देशानुसार, मंजूर मदतीची रक्कम डिबीटी प्रणालीद्वारे लाभार्थ्यांच्या थेट बँक खात्यात जमा करण्यात येणार आहे. ही मदत केवळ अल्प व अत्यंत अल्प भूधारक शेतकऱ्यांना कमाल २ हेक्टरच्या मर्यादेत दिली जाणार आहे. विशेष म्हणजे, नैसर्गिक आपत्तीमध्ये शेतकऱ्यांना मिळालेला हा मदतीचा निधी बँकांनी कोणत्याही कर्ज खात्यात अथवा इतर वसुलीसाठी वळती करू नये, असे सक्त आदेश निवासी उपजिल्हाधिकारी संतोष कोकडे यांनी संबंधित तहसीलदारांना दिले आहेत. मदत वाटपाची प्रक्रिया पूर्ण होताच लाभार्थ्यांची यादी जिल्ह्याच्या अधिकृत संकेतस्थळावर प्रसिद्ध करण्यात येणार असल्याचे आदेशात म्हटले आहे.
'एनएसपी' आणि 'महाडिबिटी२.०'
पोर्टलबाबत विशेष कार्यशाळा संपन्न
अमरावती, दि. ५ (जिमाका): इतर मागास बहुजन कल्याण विभागामार्फत राबविण्यात येणाऱ्या विविध शिष्यवृत्ती योजनांची प्रभावी अंमलबजावणी करण्यासाठी आणि विद्यार्थ्यांना वेळेत लाभ मिळवून देण्यासाठी 'एनएसपी' आणि 'महाडिबिटी२.०' पोर्टलच्या कार्यपद्धतीबाबत बुधवार,४ नोव्हेंबर रोजी येथील श्री शिवाजी विज्ञान महाविद्यालय विशेष कार्यशाळा पार पडली.
या कार्यशाळेला इतर मागास बहुजन कल्याण विभागाचे प्रादेशिक उपसंचालक विजय वाकुलकर, सहाय्यक संचालक सरिता बोबडे आणि विभागाचे वरिष्ठ अधिकारी,
जिल्ह्यातील शासकीय, अनुदानित व विनाअनुदानित शाळा आणि महाविद्यालयांचे प्राचार्य, मुख्याध्यापक, शिष्यवृत्ती विभागाचे नोडल अधिकारी व संबंधित कर्मचारी या कार्यशाळेत मोठ्या संख्येने सहभागी झाले होते.
कार्यशाळेत विद्यार्थ्यांना 'एनएसपी' आणि 'महाडिबिटी२.०' पोर्टलवर अर्ज करताना येणाऱ्या अडचणी आणि अचूक पद्धती विषयी मार्गदर्शन करण्यात आले.अर्जासोबत जोडायची आवश्यक कागदपत्रे आणि त्यांची संस्थास्तरावर करायची अचूक पडताळणी, संस्थास्तरावर प्रलंबित असलेल्या अर्जांची विल्हेवाट लावणे आणि अर्जांना मंजुरी देण्याची कार्यपद्धती, विद्यार्थ्यांना शिष्यवृत्तीचा लाभ विहित वेळेत मिळण्यासाठी करायच्या उपाययोजना याविषयी माहिती देण्यात आली.
"कोणताही पात्र विद्यार्थी शिष्यवृत्तीच्या लाभापासून वंचित राहू नये. शिष्यवृत्ती अर्जांमध्ये त्रुटी राहू नये, यासाठी शाळा व महाविद्यालयांनी शिष्यवृत्तीविषयक कामकाजाला प्राधान्य द्यावे आणि विहित कालमर्यादेत आवश्यक ती सर्व कार्यवाही पूर्ण करावी." असे आवाहन उपसंचालक विजय वाकुलकर यांनी यावेळी मार्गदर्शन करताना केले.
तसेच, पात्र विद्यार्थ्यांपर्यंत शिष्यवृत्ती योजनांचा लाभ प्रभावीपणे आणि वेळेत पोहोचवण्यासाठी शैक्षणिक संस्था आणि विभागीय यंत्रणा यांच्यात योग्य समन्वय वाढविणे अत्यंत आवश्यक असल्याचे त्यांनी अधोरेखित केले.
०००००
३० नोव्हेंबरपर्यंत जात वैधता प्रमाणपत्र अर्ज सादर करण्याचे आवाहन
अमरावती, दि.५ (जिमाका): अनुसूचित जमाती प्रमाणपत्र तपासणी समिती, अमरावतीच्या कार्यक्षेत्रांतर्गत येणाऱ्या अमरावती, अकोला व बुलढाणा जिल्ह्यांमध्ये सध्या 'सेवा संकल्प अभियानांतर्गत' व्यावसायिक अभ्यासक्रमांसाठी आवश्यक असणारे जात वैधता प्रमाणपत्र मिळवण्यासाठी विद्यार्थ्यांनी ३० नोव्हेंबर २०२६ पर्यंत ऑनलाइन पद्धतीने अर्ज भरणे अनिवार्य असल्याने मुदतीत प्रस्ताव सादर करण्याचे आवाहन, अनुसूचित जमाती प्रमाणपत्र तपासणी समितीचे सहआयुक्त तथा उपाध्यक्ष सुदर्शन नगरे यांनी केले आहे.
इयत्ता १०वी पास, तसेच सध्या ११वी व १२वी मध्ये शिकत असलेल्या आणि शैक्षणिक सत्र २०२७-२८ मध्ये नीट,सीईटी,जेईई आदी प्रवेश परीक्षांद्वारे व्यावसायिक अभ्यासक्रमांना प्रवेश घेऊ इच्छिणाऱ्या विद्यार्थ्यांसाठी हे प्रमाणपत्र अत्यंत महत्त्वाचे असून विद्यार्थ्यांनी आपला जात वैधता प्रमाणपत्र अर्ज trti-maharashtra.gov.in या संकेतस्थळावर ३० नोव्हेंबरपर्यंत ऑनलाइन भरणे आवश्यक आहे.
ऑनलाइन अर्ज भरल्यानंतर, अर्जाची मूळ प्रत सर्व आवश्यक कागदपत्रांसह अनुसूचित जमाती प्रमाणपत्र तपासणी समिती, (सहआयुक्त तथा उपाध्यक्ष कार्यालय),राज्य माहिती आयोग कार्यालयाच्या समोर, सना बिल्डिंग, चपराशीपुरा, अमरावती, पिन- ४४४६०२ या पत्त्यावर सादर करणे अनिवार्य आहे असून अधिक माहितीसाठी कार्यालयाच्या ०७२१-२५५०९९५ दूरध्वनी क्रमांकावर संपर्क साधता येणार आहे.
व्यावसायिक अभ्यासक्रमासाठी प्रवेश घेऊ इच्छिणाऱ्या विद्यार्थ्यांचे प्रस्ताव मुदतीत सादर व्हावेत, यासाठी संबंधित सर्व शाळा व महाविद्यालयांनी १० डिसेंबर २०१९ च्या शासन निर्णयाचे काटेकोरपणे पालन करावे, असे आवाहन सहआयुक्त तथा उपाध्यक्ष सुदर्शन नगरे यांनी केले आहे.
०००००
