DIO NEWS AMRAVATI 24-03-2025

 

               युवक-युवतींना रोजगाराच्या संधी

कौशल्य विकास केंद्राचा ‘प्लेसमेंट ड्राईव्ह’ येत्या 26 मार्चला

अमरावती, दि. 24 (जिमाका) : अमरावती जिल्हा कौशल्य विकास रोजगार व उद्योजकता मार्गदर्शन केंद्रामार्फत सुशिक्षित बेरोजगार युवक-युवतींना रोजगाराच्या संधी उपलब्ध करून देण्यासाठी ‘पंडित दिनदयाल उपाध्याय रोजगार मोहिमे’चे आयोजन करण्यात येणार आहे. त्या अंतर्गत जिल्हा कौशल्य विकास, रोजगार व उद्योजकता मार्गदर्शन केंद्र तथा मॉडल करिअर सेंटर अमरावती व भारतीय महाविद्यालय मोर्शी, ता. मोर्शी जि. अमरावती यांचे संयुक्त विद्यमाने रोजगार मेळाव्याचे आयोजन  येत्या 26 मार्च 2025 रोजी होणार आहे. तसेच मेळाव्यामध्ये विविध कंपन्यांचे प्रतिनिधी उपस्थित राहणार आहे.

जिल्ह्यातील युवक-युवतींना नोकरीच्या संधी मिळवून देण्याच्या उद्देशाने जास्तीत जास्त उमेदवारांना रोजगार मेळाव्यामधून नोकरी देण्याचा प्रयत्न जिल्हा कौशल्य विकास, रोजगार व उद्योजकता मार्गदर्शन केंद्रातर्फे करण्यात येतो. त्यात मुख्यमंत्री युवा कार्य प्रशिक्षण योजनेसाठी विविध आस्थापनांचे, कंपन्यांचे प्रतिनिधी प्रत्यक्ष उपस्थित राहून उमेदवारांच्या थेट मुलाखती घेतील. मुलाखतीनंतर पात्र ठरणा-या उमेदवारांना लगेच नोकरीची संधी मिळेल.

 या मेळाव्यामध्ये सहभागी होण्यासाठी www.mahaswayam.gov.in  या लिंकवर  जाऊन ऑनलाईन नोंदणी करावी. Employment वर क्लिक करावे. Job Seeker  हा पर्याय निवडून आपला नोंदणी, आधार कार्ड क्रमांक व पासवर्ड साईन इन करा. आपल्या होम पेजवरील Job Fair हा पर्याय निवडा. District मध्ये Amravati जिल्हा निवडून Fiter बटनवर क्किल करावे. नंतर दिनांकित मेळावा निदर्शनास येईल. त्यासमोर असलेल्या Action बटनच्या खाली View  व Apply बटन दिसेल. मेळाव्यास उपस्थित राहणारे उद्योजक व त्यांच्याकडील पदाबाबत माहिती दिसेल. आपल्या पात्रतेनुसार पदाची निवड करून Apply बटनवर क्लिक करा. I Agree हा पर्याय निवडा. शेवटी Successfully Applied for the Job असा Message दिसेल. अशा रितीने आपण ऑनलाईन सहभाग नोंदवावा. आपली रजिट्रेशन Slip PDF ची प्रिंट काढून मेळाव्याच्या दिनांकास उपस्थित राहावे.

 याबाबत काही अडचण असल्यास अमरावती जिल्हा कौशल्य विकास, रोजगार व उद्योजकता मार्गदर्शन केंद्र, दुरध्वनी क्रमांक 0721-2566066 किंवा amravatirojgar@gmail.com या इमेलवर संपर्क साधावा. तसेच 26 मार्च  2025 रोजी भारतीय महाविद्यालय, मोर्शी, ता. मोर्शी  अमरावती येथे स्वखर्चाने बायोडाटा, पासपोर्ट साईज फोटो व आवश्यक कागदपत्रासंह कार्यालयात प्रत्यक्ष उपस्थित रहावे, असे आवाहन अमरावती जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्त प्रांजली बारस्कर  यांनी केले आहे.

0000000

DIO NEWS AMRAVATI 22-03-2025

 

केंद्रीय मंत्री नितीन गडकरी यांना शिक्षण महर्षी डॉ. पंजाबराव देशमुख पुरस्कार प्रदान

भविष्याचा वेध घेऊन उद्दिष्टपूर्ती करावी - नितीन गडकरी

 

     अमरावती, दि. 22 : येत्या काळात शेती आणि जलसंवर्धन क्षेत्रात नवीन दृष्टिकोन बाळगणे गरजेचे आहे. यासाठी पुढील शतकाचा वेध घेऊन आज कार्य करणे गरजेचे आहे. प्रत्येकाने भविष्याचा वेध घेऊन उद्दिष्टपूर्ती करावी, त्यासाठी आवश्यक असलेले ज्ञान आत्मसात करावे, असे आवाहन केंद्रीय मंत्री नितीन गडकरी यांनी केले.

 

     श्री शिवाजी शिक्षण संस्थेच्या वतीने नितीन गडकरी यांना शिक्षण महर्षी डॉ. पंजाबराव देशमुख पुरस्कार प्रदान करण्यात आला. यावेळी खासदार अनिल बोंडे, बळवंत वानखेडे, आमदार संजय खोडके, सुलभा खोडके, प्रवीण पोटे, शिवाजी शिक्षण संस्थेचे अध्यक्ष हर्षवर्धन देशमुख, कमलताई गवई आदी उपस्थित होते.

 

     श्री. गडकरी यांनी कृषी आणि शिक्षण क्षेत्रात डॉ. पंजाबराव देशमुख यांनी महत्त्वाचे योगदान दिले आहे. त्यातूनच मागास भागाचा बदल घडविणे शक्य झाले. सामाजिक सुधारणा या काळ बदलविणाऱ्या असतात. त्यामुळे अशा व्यक्तिमत्त्वातून प्रेरणा मिळते. समाजाप्रती त्यांचा असलेला दृष्टिकोन महत्त्वाचा असल्याने त्यांच्या विचारावरच मार्गक्रमण करण्यात येत आहे.

 

     येत्या काळात ज्ञान हीच शक्ती राहणार आहे. त्यामुळे शेतीच्या क्षेत्रात जगभरात होत असलेल्या प्रयोगाची माहिती घेऊन त्यानुसार आपल्यातही बदल घडून येणे गरजेचे आहे. शेतकऱ्यांनीही शेतीमध्ये बदल घडविताना आधुनिक शिक्षण मार्गदर्शक ठरणार आहे. शेतीतील प्रयोग यशस्वी होण्यासाठी त्यांना प्रेरणा मिळावी यासाठी पुरस्काराची संकल्पना ही गरजेची आहे. शेतकऱ्यांनी आधुनिक पद्धतीने शेती करावी यासाठी त्यांना प्रशिक्षणही देणे गरजेचे असल्याचे त्यांनी सांगितले. त्याचबरोबर पुरस्काराच्या मिळालेल्या पाच लाख रुपयांमध्ये वीस लाख रुपयांची भर घालून त्यातून दरवर्षी पाच शेतकऱ्यांना पुरस्कार देण्यात यावा, असे आवाहन केले.

       सुरुवातीला हर्षवर्धन देशमुख यांनी संस्थेचे कार्य आणि पुरस्काराबद्दल माहिती दिली. यावेळी मिथीला कवीश्वर, श्रीमती राठोड, वैष्णवी मानवटकर, वैष्णवी कदम, समीक्षा नागापुरे, धनश्री मोये, आयुष्य दिवाण, सौम्या राऊत, दीप्ती काळमेघ यांना विविध क्षेत्रात केलेल्या कामगिरीबद्दल अभ्यासवृत्ति प्रदान करण्यात आली. उत्कृष्ट महिला शेतकरी वंदना धोत्रे आणि वंदना वैद्य यांचा सन्मान करण्यात आला. तसेच नवनियुक्त आमदार संजय खोडके यांचा सत्कार करण्यात आला.

 

      श्री. गडकरी यांच्या हस्ते श्री संत अच्युत महाराज हार्ट हॉस्पिटलच्या नवीन इमारत आणि कार्डीयाक कॅथलॅबचे उद्घाटन करण्यात आले. यावेळी खासदार अनिल बोंडे, आमदार संजय खोडके, दादाराव केचे, सुलभा खोडके, प्रताप अडसड, उमेश यावलकर, केवलराम काळे, सुमित वानखेडे, राजेश वानखेडे, प्रवीण तायडे, प्रवीण पोटे, सचिन देव महाराज आदी उपस्थित होते.

 

     यावेळी त्यांनी गोरगरीब जनतेची सेवा ही महत्त्वाची असून अशा कार्यांना कायम मदत केली जाईल. रुग्णालयामार्फत देणगी आणि नागरिकांच्या सहभागातून शस्त्रक्रिया करण्यात येत आहे. यातून अनेकांचे प्राण वाचले. गरजूंना मदत झाली. त्यामुळे संत अच्युत महाराजांना अभिप्रेत असलेली सेवा घडली आहे. या रुग्णालयाचा तळागाळातील नागरिकांना लाभ होणार आहे. येत्या काळात फुफ्फुस आणि हृदय प्रत्यारोपण आदींच्या शस्त्रक्रिया करण्यासाठी रुग्णालयाने पुढाकार घ्यावा. रुग्णालयाच्या विकासाचे ध्येय ठरविण्यात यावे. तसेच येत्या काळातही रुग्णालयाने निस्वार्थी भावनेने कार्य करावे, असे आवाहन केले.

 

शारदा उद्योग मंदिराला भेट देऊन महिला उद्योगाबद्दल मत व्यक्त करताना त्यांनी उद्योगात महिलांनी पुढे येण्याची गरज आहे. यासाठी महिलांनी कौशल्य आत्मसात करावे. दर्जेदार सेवा दिल्यास त्यातून उत्तम उत्पन्न मिळू शकेल,असे मत त्यांनी व्यक्त केले. श्री. गडकरी यांनी पंचवटी येथील डॉ. पंजाबराव देशमुख यांच्या पुतळा आणि शिवाजी महाराजांच्या पुतळ्याला पुष्पहार अर्पण करून अभिवादन केले.

 

      दरम्यान बेलोरा विमानतळ येथे श्री. गडकरी यांचे आगमन झाले. यावेळी खासदार डॉ. अनिल बोंडे, आमदार उमेश यावलकर, प्रविण पोटे, विभागीय आयुक्त श्वेता सिंघल, जिल्हाधिकारी सौरभ कटियार, मुख्य कार्यकारी अधिकारी संजीता महापात्र, महापालिका आयुक्त सचिन कलंत्रे आदी उपस्थित होते.

000000

DIO NEWS AMRAVATI 21-03-2025

 चिखलदरा येथे रविवारी ‘मेळघाट रंगोत्सव’

*सांस्कृतिक महोत्सवात सेवा आणि स्पर्धांचा संगम

अमरावती, दि. 21(जिमाका) : जिल्हाधिकारी कार्यालय, जिल्हा परिषद अमरावती आणि एकात्मिक आदिवासी विकास प्रकल्प धारणी यांच्या वतीने चिखलदरा येथे 'मेळघाट रंगोत्सव 2025'चे आयोजन करण्यात आले आहे. रविवार, दि. 23 मार्च रोजी गिरीजन शाळेसमोरील मैदानावर सकाळी 10 वाजल्यापासून या महोत्सवाला सुरुवात होणार आहे.

पालकमंत्री चंद्रशेखर बावनकुळे अध्यक्षस्थानी राहतील. तसेच, तसेच खासदार डॉ. अनिल बोंडे, बळवंत वानखडे, आमदार किरण सरनाईक, धिरज लिंगाडे आणि केवलराम काळे उपस्थित राहणार आहेत.

महोत्सवात विविध सेवांची माहिती आणि स्पर्धांचे आयोजन करण्यात आले आहे. यात नागरिकांसाठी आधार अपडेट, ऍग्रीस्टॉक नोंदणी, रेशनकार्ड नोंदणी, गोल्डन कार्ड नोंदणी, असंसर्गजन्य रोगांची चाचणी, सिकलसेल तपासणी, मोफत डोळे तपासणी, विनाशुल्क मौखिक तपासणी, घरकुल योजना आणि रोजगार हमी योजना आणि पोस्ट ऑफिस व बँक खाते उघडण्याची सुविधा राहणार आहे. तसेच लोकनृत्य स्पर्धा, पाककला स्पर्धा, पारंपरिक वेशभूषा आणि पथनाट्य यांसारख्या सांस्कृतिक स्पर्धांही आयोजित करण्यात आल्या आहे.

मेळघाट रंगोत्सवातील विविध शासकीय सेवा आणि योजनांची माहिती देण्यात येणार असल्याने नागरिकांनी सहभागी होऊन शासकीय योजनांचा लाभ घ्यावा, असे आवाहन विभागीय आयुक्त श्वेता सिंघल, जिल्हाधिकारी सौरभ कटियार, मुख्य कार्यकारी अधिकारी संजीता महापात्र, धारणीच्या उपविभागीय अधिकारी प्रियंवदा म्हाडदळकर यांनी केले आहे.

00000

रमजाननिमित्त मिना बाजारमुळे वाहतुकीत बदल

अमरावती, दि. 21 (जिमाका) : अमरावती शहरात रमजान महिन्यानिमित्त मीना बाजार भरणार आहे. यामुळे दि. 24 ते 29 मार्च दरम्यान जवाहर गेट ते टांगापडाव रोडवरील वाहतुकीत बदल करण्यात आला आहे. त्यानुसार अधिसूचना जारी करण्यात आली आहे.

या आदेशामुळे इतवारा बाजार (टांगापडाव) ते जवाहर गेटपर्यंत सर्व प्रकारच्या वाहनांसाठी सायकलसह वाहतूक बंद राहील. हे निर्बंध 24 मार्च रोजी सकाळी 6 वाजल्यापासून ते 29 मार्च रोजी रात्री 12 वाजेपर्यंत लागू असतील.   

या निर्बंद कालावधीत पर्यायी मार्ग म्हणून गद्रे चौकाकडून शहरात येणारी आणि जाणारी जड वाहतूक गिट्टी, रेती, मुरूम, माल वाहतूक गद्रे चौक, राजकमल चौक, जयस्तंभ चौक, मालवीय चौक, दीपक चौक मार्गे चित्रा चौक किंवा जुना बायपास मार्गे चपराशीपुरा चौक, बियाणी चौक, गर्ल्स हायस्कूल चौक, इर्विन चौक, दीपक चौक मार्गे चित्रा चौकाकडे वळविण्यात आली आहे. मोटारसायकल आणि सायकलस्वार राजकमल चौक, श्याम चौक, तहसील कार्यालय, साबनपुरा चौकी, प्रभात चौक ते चित्रा चौकाकडे जाऊ शकतील.

गद्रे चौक आणि रविनगर चौकाकडून गांधी चौक मार्गे इतवारा बाजारकडे, तसेच इतवारा बाजार चौकाकडून गांधी चौक मार्गे गद्रे चौकाकडे आणि राजकमल चौक ते गांधी चौक मार्गे इतवारा बाजारकडे तसेच इतवारा बाजार चौक ते गांधी चौक मार्ग राजकमल चौक या मार्गावर मालवाहतूक करणाऱ्या जड व हलक्या वाहनांसाठी बंदी राहणार आहे.

निर्बंधाचे उल्लंघन केल्यास मोटर वाहन कायद्यानुसार कारवाई करण्यात येणार असल्याचे पोलिस उपायुक्त गणेश शिंदे यांनी कळविले आहे.

00000

शनिवारी राष्ट्रीय लोक अदालतीचे आयोजन

अमरावती, दि.21 :  सर्व न्यायालयात शनिवार, दिनांक 22 मार्च रोजी राष्ट्रीय लोक अदालतीचे आयोजन करण्यात आले आहे. याचा नागरिकांनी लाभ घ्यावा, असे आवाहन करण्यात आले आहे.

लोकअदालतीमध्ये दाखल व दाखलपूर्व असे प्रकरणे तडजोडीने व सामंजस्याने निकाली काढण्यासाठी ठेवण्यात येणार आहेत. राष्ट्रीय लोक अदालतीत सहभागी होण्यासाठी कोणत्याही प्रकारचे अतिरिक्त शुल्क भरावे लागणार नाही. नागरिक तसेच पक्षकारांनी तडजोडप्राप्त प्रलंबित खटले राष्ट्रीय लोक अदालत समक्ष तडजोडीने व सामंजस्याने मिटविण्यासाठी संबंधित न्यायालयात अर्ज करावा. तसेच दाखलपूर्व प्रकरणाबाबत नजीकच्या संबंधित जिल्हा किंवा तालुका न्यायालय यांच्याशी संपर्क साधावा. नागरिक तसेच पक्षकारांनी राष्ट्रीय लोकअदालती समक्ष आपली प्रकरणे सामंजस्याने व तडजोडीने मिटवावीत, असे आवाहन जिल्हा विधी सेवा प्राधिकरणाचे अध्यक्ष तथा प्रमुख जिल्हा व सत्र न्यायाधीश सुधाकर यार्लगड्डा आणि सचिव मंगला कांबळे यांनी केले आहे.

0000

मंत्री प्रकाश आबिटकर यांचा दौरा

अमरावती, दि. 21 : सार्वजनिक आरोग्य व कुटुंब कल्याण मंत्री प्रकाश आबिटकर रविवार, दि. 23 आणि 24 मार्च रोजी जिल्ह्याच्या दौऱ्यावर येत आहेत.  

दौऱ्यानुसार, श्री. आबिटकर हे रविवार, दि. 23 मार्च रात्री 10.30 वाजता चिखलदरा ग्रामीण रुग्णालयाला भेट देतील.

सोमवार, दि. 24 मार्च रोजी सकाळी 10 वाजता हतरू प्राथमिक आरोग्य केंद्र, सकाळी 11 वाजता हिरडा गाव भेट, सकाळी 11.45 वाजता बारूगवाण गाव भेट, दुपारी 1.15 वाजता चुरणी ग्रामीण रुग्णालय भेट, दुपारी 2.40 वाजता काटकुंभ प्राथमिक आरोग्य केंद्राला भेट देतील. त्यानंतर सायंकाळी 6 वाजता डफरीन हॉस्पीटल येथे अमरावती विभागीय आढावा बैठक घेतील. सायंकाळी 7 वाजता हॉटेल ग्रँड मैफिल येथे अमरावतीमधील खासगी डॉक्टरांसमवेत संवाद साधतील. रात्री 8 वाजता नागपूरकडे प्रयाण करतील.

00000

जैन आर्थिक विकास महामंडळाचे अध्यक्ष ललित गांधी यांचा दौरा

अमरावती, दि. 21 (जिमाका) : जैन आर्थिक विकास महामंडळाचे अध्यक्ष ललित गांधी सोमवार, दि. 24 मार्च रोजी जिल्ह्याचा दौरा करणार आहेत.

दौऱ्यानुसार, श्री. गांधी दुपारी 4.30 वाजता जिल्हाधिकारी कार्यालयात जिल्हाधिकारी आणि जिल्हा प्रशासनातील प्रमुख अधिकाऱ्यांसोबत आढावा बैठक घेतील. सायंकाळी 5 वाजता नियोजन भवनात भगवान महावीर जन्म कल्याणक निबंध स्पर्धा प्रमाणपत्र वितरण आणि सकल जैन समाज प्रतिनिधींशी चर्चा करतील. सायंकाळी 6 वाजता व्यापारी, उद्योजक आणि संस्था संघटना पदाधिकाऱ्यांशी बैठक घेतील. सायंकाळी 7 वाजता गांधी चौक येथे जैन अल्पसंख्याक आर्थिक विकास महामंडळाच्या अमरावती जिल्हा कार्यालयाचे उद्घाटन करतील. सायंकाळी 7.30 वाजता स्थानिक जैन मंदिरांना भेटी देऊन रात्री 8.30 वाजता धामणगावकडे रवाना होतील.

00000