शासकीय तंत्रनिकेतन येथे नि:शुल्क रेफ्रिजरेशन ॲण्ड एअर कंडिशनर प्रशिक्षण

 

शासकीय तंत्रनिकेतन येथे नि:शुल्क रेफ्रिजरेशन ॲण्ड एअर कंडिशनर प्रशिक्षण

          अमरावती, दि. 06 (जिमाका): भारत सरकार पुरस्कृत कौशल्य विकास व उद्योजकता विकास मंत्रालय व केंद्रिय प्रशिक्षण संचालनालय अंतर्गत कम्युनिटी डेव्हलपमेंट थ्रु पॉलीटेक्निक योजना शासकीय तंत्रनिकेतन, अमरावती येथे राबविण्यात येत. स्वंयरोजगारासाठी उपयुक्त तांत्रिक कौशल्यावर आधारित रेफ्रिजरेशन ॲण्ड एअर कंडिशनर या कोर्ससाठी सहा महिने कालावधीचे नि:शुल्क प्रशिक्षण शासकीय तंत्रनिकेतन येथे होणार आहे. 

             सदर प्रशिक्षण ग्रामिण अल्प शिक्षित युवक व युवतींसाठी असुन प्रशिक्षणासाठी वयाची अट नाही.  प्रशिक्षणासाठी अर्ज योजनेच्या कार्यालयामध्ये उपलब्ध असून मुलाखतीव्दारे प्रशिक्षणार्थ्यांची निवड करण्यात येईल. अधिक माहितीसाठी कम्युनिटी डेव्हलमेंट थ्रु पॉलिटेक्निक योजना कार्यालय, मुलींचे वसतीगृह समोर, शासकीय तंत्रनिकेतन परीसर गाडगे नगर, अमरावती येथे संपर्क साधावा, असे आवाहन संस्थेचे प्राचार्य डॉ. व्हि. आर. मानकर व योजनेचे समन्वयक प्रा.एम. डब्ल्यु. ठाकरे यांनी केले आहे.

00000

अनोळखी मृत इसमाची ओळख पटविण्याबाबत आवाहन

 

अनोळखी मृत इसमाची ओळख पटविण्याबाबत आवाहन

             अमरावती, दि. 06 (जिमाका): पोलिस ठाणे सिटी कोतवाली अमरावती (शहर) अंतर्गत एका अनोळखी इसमाचा मृतदेह पानपोईजवळ, इर्विन चौक येथे सापडला. मृतकाचे अंदाजे वय 32 वर्षे असून मृतकाचा रंग गोरा, चेहरा लाबंट, केस काळे, दाढी मिशी बारिक, अंगात पांढरा रंगाचा फुलबाह्याचा शर्ट निळा रंगाचा बरमुडा घातलेला होता.

 मृतकाच्या नातेवाईकाचा शोध लागावा व अनोळखी इसमाची ओळख पटविण्यास पोलीस नियंत्रण कक्ष, अमरावती शहर दुरध्वनी क्रमांक - 0721-2672001 किंवा सुरेश चिमोटे यांचा भ्रमणध्वनी क्रं. 8975349961 या क्रमांकावर संपर्क साधावा, असे आवाहन पोलीस स्टेशन सिटी कोतवाली, अमरावती यांनी केले आहे.

00000

शहरात कलम 37 (1) व (3) लागू

 

शहरात  कलम 37 (1)  व (3) लागू

 

            अमरावती, दि. 03 (जिमाका) :  शहरात शांतता व सुव्यवस्था अबाधित राहावी, यासाठी पोलीस आयुक्त  (अमरावती शहर) यांनी महाराष्ट्र पोलिस कायद्याचे कलम 37 (1) व (3) अन्वये प्रतिबंधात्मक आदेश जारी केला आहे.

 

            सदर प्रतिबंधात्मक आदेश शहरातील कायदा व सुव्यवस्था अबाधित राहावी, याकरिता पोलिस आयुक्तालयाच्या परिक्षेत्रात लागू करण्यात आला असून   दि. 6 ते 20 मे 2024 च्या मध्यरात्रीपर्यंत लागू राहील. या कलमाचा भंग करणाऱ्या व्यक्तीविरूध्द कायदेशीर कारवाई करण्यात येईल, असे पोलीस आयुक्त (अमरावती शहर)  नविनचंद्र रेड्डी  यांनी कळविले आहे.

000000

 

महाडीबीटी प्रणालीवर शिष्यवृत्तीचे अर्ज करण्यास दि. 15 जूनपर्यंत मुदतवाढ

 

महाडीबीटी प्रणालीवर शिष्यवृत्तीचे अर्ज करण्यास दि. 15 जूनपर्यंत मुदतवाढ

 

              अमरावती दि. 03 (जिमाका) :  सामाजिक न्याय विभाग व इतर मागास बहुजन कल्याण विभागाच्या महाडीबीटी प्रणालीद्वारे  विद्यार्थ्यांना विविध शिष्यवृत्तीसाठी अर्ज करण्यास शनिवार दि. 15 जूनपर्यंत मुदतवाढ देण्यात आली आहे, अशी माहिती समाजकल्याण सहायक आयुक्त माया केदार यांनी कळविले आहे.

 

            सामाजिक न्याय विभाग व इतर मागास बहुजन कल्याण विभाग यांच्यामार्फत महाडीबीटी प्रणालीवर अनुसूचित जाती, विजाभज, इमाव, विमाप्र प्रवर्गांसाठी  भारत सरकार मॅट्रिकोत्तर शिष्यवृत्ती,  शिक्षण फी  परीक्षा फी योजना, राजर्षि छत्रपती शाहू महाराज  गुणवत्ता शिष्यवृत्ती, व्यावसायिक पाठ्यक्रम संलग्न्न वसतिगृहातील विद्यार्थ्यांना निर्वाहभत्ता व व्यवसाय प्रशिक्षण शुल्क प्रतीपूर्ती योजना या योजना राबविण्यात येतात.

 

          माहिती व तंत्रज्ञान विभागमार्फत सन 2023-24 वर्षातील महाडीबीटी पोर्टलवर अनुसूचित जाती प्रवर्गासाठी नवीन अर्ज भरण्यासाठी तसेच सन 2022-23 साठी रि-अप्लाय करण्यासाठी  दि. 15 जून 2024 पर्यंत मुदतवाढ देण्यात आली आहे.  ऑनलाईन नुतनीकरणाचे  अर्ज  विहित मुदतीत भरण्यासाठी  https://mahadbtmahait.gov.in  महाडीबीटीच्या या संकेतस्थळावर ऑनलाईन नुतनीकरणाचे अर्ज तसेच विद्यार्थ्यांच्या  लॉगिनमधील त्रुटी पुर्ततेसाठी सेंड बँक केलेल्या अर्जाची संबंधित महाविद्यालयानी त्वरीत त्रुटिपूर्तता  करुन जिल्हा लॉगीन वर पाठविण्यात यावे. विहित वेळेत अर्ज भरुन घेण्याची जबाबदारी संबंधित महाविद्यालयाची राहील.

 

           महाडीबीटी संकेतस्थळावर जिल्ह्यातील विद्यार्थ्यांनी तसेच महाविद्यालयांना नुतनीकरणाचे अर्ज भरुन रि-अप्लाय करण्यासाठी आणि सेंड बॅक केलेल्या अर्जाची त्रुटी पूर्तता करण्याचे आवाहन समाज कल्याण विभागाव्दारे करण्यात आले आहे.

00000

 

लोकसभा निवडणुकीत मतदानाचा टक्का वाढवणाऱ्या शिलेदारांचा सत्कार; मतदानाचा टक्का वाढविण्यात प्रत्येकांचे योगदान- जिल्हाधिकारी सौरभ कटियार

 

लोकसभा निवडणुकीत मतदानाचा टक्का वाढवणाऱ्या शिलेदारांचा सत्कार;

मतदानाचा टक्का वाढविण्यात प्रत्येकांचे योगदान- जिल्हाधिकारी सौरभ कटियार

 

        अमरावती, दि. 3 (जिमाका): लोकसभा सार्वत्रिक निवडणुकीमध्ये मतदानाची टक्केवारी वाढविणारे प्रशासनातील अधिकारी, कर्मचारी तसेच नागरिक, शैक्षणिक संस्था व स्वयंसेवी संस्थाच्या प्रयत्नाने अमरावती लोकसभा निवडणुकीत मतदानाच्या टक्केवारीत ऐतिहासिक नोंद केली आहे. ही बाब निश्चितच अमरावती जिल्हा प्रशासनाला व ही कामगिरी करणाऱ्या प्रत्येक घटकाला भूषणावह आहे, असे प्रतिपादन जिल्हाधिकारी सौरभ कटियार यांनी मतदानाचा टक्का वाढविणाऱ्या शिलेदारांचा सत्कार सभारंभात केले.

 

           लोकसभा सार्वत्रिक निवडणूकीत स्विप अंतर्गत उत्कृष्ट कार्य केलेल्या संस्था व कार्यालये यांच्या कार्यगौरव सोहळाचे जिल्हा नियोजन भवन येथे आज आयोजन करण्यात आले होते, त्यावेळी ते बोलत होते. मुख्य कार्यकारी अधिकारी संतोष जोशी, सहायक जिल्हाधिकारी नरेश अकुनूरी, निवासी उपजिल्हाधिकारी अनिल भटकर, पोलीस उपायुक्त सागर पाटील, स्विपचे नोडल अधिकारी डॉ. कैलास घोडके, उपमुख्य कार्यकारी अधिकारी बाळासाहेब बायस, जिल्हा परिषदचे मुख्य लेखाधिकारी चंद्रशेखर खंडारे, केबीसी विजेता बबीता ताडे, राजेश मित्तल तसेच तालुक्यातील सर्व स्विप नोडल अधिकारी, कर्मचारी आदी उपस्थित होते.

 

            जिल्हाधिकारी श्री. कटियार म्हणाले की, लोकसभा निवडणूक निर्भयपणे व निष्पक्षपणे पार पडावी यासाठी सर्व प्रशासकीय यंत्रणा काम करित होती. सोबतच जिल्ह्यातील मतदानाची टक्केवारी वाढविण्यासाठीही प्रयत्न सुरु होते. स्विपअंतर्गत जिल्ह्यात विविध उपक्रम राबविण्यात आले. या उपक्रमामध्ये शहरी व ग्रामीण भागातील प्रशासकीय यंत्रणा, स्वयंसेवी संस्था, शैक्षणिक संस्था व नागरिकांनी स्वयंस्फुर्तीने सहभाग घेत मतदान जनजागृती कार्यक्रम राबविले. सर्वांच्या प्रयत्नानेच यापूर्वी झालेल्या लोकसभा निवडणूकीपेक्षा या निवडणूकीत मतदानाच्या टक्केवारीत विक्रमी वाढ झाली आहे. ही बाब सर्वांसाठी भूषणावह असल्याचे श्री. कटियार यांनी सांगितले.

 

                लोकसभा निवडणूकीत केलेला कामाचा सर्वांना अनुभव आला आहे. याचा फायदा आगामी विधानसभा निवडणुकीमध्ये मतदानाची टक्केवारी शंभर टक्के पर्यंत नेण्याकरिता सर्वतोपरी प्रयत्न प्रशासन, स्वयंसेवी संस्था, शैक्षणिक संस्था व नागरिकांनी करावेत, असे आवाहन श्री. कटियार यांनी यावेळी केले. तसेच स्विप अंतर्गत केलेल्या कामांचा सर्वांना शुभेच्छा देऊन अभिनंदन केले.

 

              लोकसभा निवडणुकीची टक्केवारी वाढविण्यासाठी जिल्हाधिकारी तथा जिल्हा निवडणूक अधिकारी सौरभ कटियार यांच्या मार्गदर्शनाखाली स्विप उपक्रमाचे जिल्हा नोडल अधिकारी डॉ. कैलास घोडके व तालुका नोडल अधिकारी व त्यांच्या चमूने अत्यंत काटेकोर व सूत्रबद्ध नियोजन करून प्रत्येक मतदारांशी घरोघरी संपर्क साधून, त्यांना मतदाना करीता प्रवृत्त करून व त्यांचे प्रत्यक्ष मतदान घडवून आणण्यासाठी प्रयत्न केले.  यासाठी अहोरात्र परिश्रम घेणारे अधिकारी, कर्मचारी, व्यक्ती, संस्था व संघटनांचा कार्यगौरव सोहळा नियोजन भवन येथे पार पडला. यावेळी प्रशासनातील विविध विभागाचे अधिकारी, कर्मचारी तसेच शाळा, महाविद्यालयाचे प्रतिनिधी, स्वयंसेवी संस्थेचे प्रतिनिधी, पत्रकार, पिंक फोर्सचे सदस्यांना जिल्हाधिकारी यांच्या स्वाक्षरीचे प्रशस्ती पत्र, सन्मान चिन्ह व पुष्प देऊन सत्कार करण्यात आला.

 

         लोकसभा सार्वत्रिक निवडणुकीत स्विप उपक्रमाअंतर्गत केलेल्या कार्यक्रमाची माहिती जिल्हा नोडल अधिकारी डॉ. घोडके यांनी प्रास्ताविकेतून दिले. तर आभार जिल्हा परिषदचे संजय राठी यांनी मानले.

0000

हरविलेल्या व्यक्तीबाबत आवाहन (विठ्ठलराव गुलाबराव मैदनकर)

 

हरविलेल्या व्यक्तीबाबत आवाहन (विठ्ठलराव गुलाबराव मैदनकर)

 

            अमरावती, दि. 02 (जिमाका):  येथील  विठ्ठलराव गुलाबराव मैदनकर  (वय 59 वर्षे, रा. धनगरपुरा, नांदगाव पेठ, अमरावती ही व्यक्ती हरविल्याची फिर्याद नांदगाव पेठ पोलीस ठाण्यात दाखल झाली आहे.

 

           विठ्ठीलराव गुलाबराव मैदनकर  हे दि. 13 एप्रिल, 2024 रोजी घरून कोणालाही न सांगता घरून  निघून गेले. त्यानंतर शोध घेतला असता ते सापडले नाहीत. त्यांचा वर्ण निमगोरा, उंची पाच फूट 1 इंच, उजव्या हातावर विठ्ठल व नागाचे चित्र गोंदलेले, घरून जातेवेळी  अंगात पांढरे रंगाचा शर्ट, निळा रंगाचा फुल पँन्ट  घातलेले  होते. केस बारिक पायात पिवळा पांढरा रंगाचा बुट घातलेला होता. या वर्णनाची व्यक्ती कुणाला आढळल्यास त्यांनी नांदगाव पेठ पोलीस ठाण्यात संपर्क साधावा, असे आवाहन नांदगाव पेठ पोलीस स्टेशनचे वरिष्ठ पोलीस निरीक्षक यांनी केले आहे.

0000

हरविलेल्या व्यक्तीबाबत आवाहन (शुभम दामोदर राऊत)

 

हरविलेल्या व्यक्तीबाबत आवाहन (शुभम दामोदर राऊत)

 

            अमरावती, दि. 02 (जिमाका):  येथील  शुभम दामोदर राऊत  (वय 27 वर्षे, रा. यावलपूरा, नांदगाव पेठ, अमरावती ही व्यक्ती हरविल्याची फिर्याद नांदगाव पेठ पोलीस ठाण्यात दाखल झाली आहे.

 

          शुभम दामोदर राऊत  हे दि. 14 एप्रिल, 2024 रोजी बॅग भरून काहीन सांगता घरून  निघून गेले. त्यानंतर शोध घेतला असता ते सापडले नाहीत. त्यांचा वर्ण सावळा, उंची 5 फूट 8 इंच, बांधा सडपातळ, घरून जातेवेळी  अंगात पांढरे शर्ट, सोबत बॅग, निळा रंगाचा जिन्स  घातलेले  होते. या वर्णनाची व्यक्ती कुणाला आढळल्यास त्यांनी नांदगाव पेठ पोलीस ठाण्यात संपर्क साधावा, असे आवाहन नांदगाव पेठ पोलीस स्टेशनचे वरिष्ठ पोलीस निरीक्षक यांनी केले आहे.

0000