DIO NEWS AMRAVATI 12.11.2024

 

दर्यापूर विधानसभा क्षेत्राची दुसरी खर्च तपासणी

*सर्व उमेदवारांनी सादर केला खर्च

अमरावती, दि. 12 (जिमाका) : दर्यापूर विधानसभा मतदारसंघात नामनिर्देशित उमेदवारांच्या खर्चाची दुसरी तपासणी सोमवार, दि. 11 नोव्हेंबर रोजी नवीन तहसिल इमारतीमध्ये पार पडली. यावेळी सर्व 16 उमेदवारांनी खर्च सादर केला.

दुसरी तपासणी खर्च निरीक्षक डॉ. उमा माहेश्वरी यांचे मार्गदर्शनाखाली पार पडली.  लेख्यांच्या तपासणीवेळी एकूण 16 उमेदवारांपैकी 16 उमेदवार उपस्थित राहिले. सदर खर्च तपासणीवेळी खर्च नोंदवहीत नोंदविलेला खर्च व खर्च सनियंत्रणन पथकाव्दारे नोंदविण्यात आलेला खर्च यात असलेली तफावत उमेवारांनी मान्य करून उमेदवारांच्या खर्च लेख्याचा ताळमेळ घेण्यात आला. उमेदवारांच्या लेख्याची तिसरी तपासणी दि. 15 नोव्हेंबर रोजी नविन तहसिल इमारत दर्यापूर येथील सभागृहात होणार आहे.

00000

                                                     नशामुक्त तरुणाई जागरूकता कार्यक्रम

अमरावती, दि. 12 (जिमाका) : नेहरु युवा केंद्रातर्फे धामणगांव रेल्वे येथील आदर्श महाविद्यालयात नशामुक्त तरुणाई, जागरूकता आणि शिक्षण कार्यक्रम पार पडला.

प्राचार्य डॉ. सुधीर बायस्कर अध्यक्षस्थानी होते. डॉ. मुकुंदराव पवार स्कूलच्या वसतिगृहाचे अधीक्षक ग्रामगिताचार्य हनुमंतदादा ठाकरे प्रमुख वक्ते म्हणून उपस्थित होते. अर्थशास्त्र विभागाचे विभाग प्रमुख डॉ. दिपक शृंगारे यांनी प्रास्ताविक केले.

कार्यक्रमाला डॉ. संजय पाटील, रासेयो कार्यक्रम अधिकारी डॉ. प्रवीण केचे, महिला कार्यक्रम अधिकारी डॉ. पूनम गहूकर, प्रा. विलास नागोसे, प्रा. विशाल मोकाशे, प्रा. समीक्षा वानखडे उपस्थित होते. कार्यक्रमासाठी वैष्णवी राठोड, सुवर्णा वंजारी, मैथिली वैद्य, स्नेहल पतालिया, विद्या बोबडे, महेंद्र काळे, भूमेश्वरी ठोंबरे यांनी पुढाकार घेतला. तानिया टेकाम हिने सूत्रसंचालन केले. प्रा. विशाल मोकाशे यांनी आभार मानले.

0000

DIO NEWS AMRAVATI 11.11.2024

 

मतदान जनजागृतीसाठी तिरंगा महारॅली

मतदारांच्या सक्रीय सहभागाने मतदानाचा टक्का वाढणार

-जिल्हाधिकारी सौरभ कटियार,

अमरावती, दि 11: स्वीप उपक्रमांतर्गत जिल्हा प्रशासन, महापालिका आणि विविध संस्था, संघटनांच्या मदतीने आज अमरावती येथे मतदार जनजागृतीसाठी तिरंगा महारॅली काढण्यात आली.

नेहरू मैदान येथे झालेल्या उद्घाटन कार्यक्रमाला जिल्हाधिकारी सौरभ कटियार, मुख्य कार्यकारी अधिकारी संजिता महापात्र, महापालिका आयुक्त सचिन कलंत्रे, पोलीस आयुक्त नवीनचंद्र रेड्डी आदी उपस्थित होते.

उपस्थित मान्यवरांनी रॅलीला हिरवा झेंडा दाखविला. राजकमल,  जयस्तंभ, इर्विन चौक मार्गे ही रॅली निघून विभागीय क्रीडा संकुलात समारोप करण्यात आला.

समारोपावेळी जिल्हाधिकारी श्री. कटियार यांनी महारॅलीचे आयोजन उत्कृष्ट प्रकारे झाले आहे. यात सर्व नागरिकांनी सहभाग नोंदविला आहे. लोकसभा निवडणुकीमध्ये नागरिकांनी सक्रिय सहभाग नोंदविल्यामुळे मतदानाच्या टक्केवारीत वाढ झाली होती. मात्र शहरी भागात मतदान कमी होत असल्यामुळे त्यांच्यापर्यंत पोहोचून जागरूकता करणे गरजेचे आहे. त्यांच्यापर्यंत मतदान करण्याचा संदेश पोहोचल्यास मतदानाच्या टक्केवारीत निश्चितच वाढ होणार आहे. त्यामुळे प्रत्येक नागरिकांनी आपले कर्तव्य समजून मतदान करावे, असे आवाहन केले.

श्री. कलंत्रे यांनी मतदारांमध्ये जनजागृतीसाठी रॅलीचा उपक्रम राबविण्यात आला. यामध्ये विविध घटकांनी उत्स्फूर्त सहभाग नोंदविला. त्यामुळे हा उपक्रम यशस्वी झाला आहे.

कार्यक्रमाच्या सुरुवातीला प्राथमिक शाळा रहाटगाव आणि प्रगती विद्यालय रहाटगाव यांनी पथनाट्य सादर केले. या पथनाट्यातून मतदान जागृतीचा संदेश देण्यात आला. त्यानंतर उपस्थित मान्यवरांना मतदानाची प्रतिज्ञा देण्यात आली. तसेच मतदानासाठी नागरिकांना जागरूक करण्यासाठी मान्यवरांनी हवेत फुगे सोडले.

विभागीय क्रीडा संकुलात मानवी साखळी करण्यात आली. यातून 'गो वोट'चा संदेश देण्यात आला. तसेच मनपा शाळेने पथनाट्य सादर करण्यात आले. दिव्यांनी 'गो वोट' साकारण्यात आले. शिक्षणाधिकारी श्री. मेश्राम यांनी आभार मानले.

00000

 

दिव्यांगांना मतदानासाठी दिव्यांग रथाची सोय

अमरावती, दि. 11(जिमाका) : अमरावती विधानसभा मतदारसंघासाठी दि. 20 नोव्हेंबर रोजी मतदान होणार आहे. दिव्यांग मतदारांना मतदान केंद्रावर जाणे सुलभ व्हावे, यासाठी दिव्यांग रथ तयार करण्यात आला आहे. हा दिव्यांग रथ दिव्यांगांना मतदान केंद्रावर घेऊन जाणार आहे.

विधानसभा सार्वत्रिक निवडणूकीच्या अनुषंगाने दिव्यांग मतदारांकरीता मतदान केंद्रापर्यंत पोहोचविणेकरीता अमरावती विधानसभा मतदारसंघात दिव्यांग रथाची सोय करण्यात आली आहे. मतदारसंघ क्षेत्रातील दिव्यांग मतदारांच्या सोयीकरीता या दिव्यांग रथाची निर्मिती करण्यात आली आहे. ज्या दिव्यांग मतदारांना मतदानकेंद्रापर्यंत पोहोचण्यासाठी सहाय्याची गरज आहे, अशा मतदारांनी दि. 20 नोव्हेंबर 2024 रोजी या दिव्यांग रथाचा लाभ घ्यावा, असे आवाहन प्रशासनाच्या वतीने करण्यात आलेले आहे.

तसेच अमरावती विधानसभा मतदारसंघ क्षेत्रातील दिव्यांग मतदारांकरीता मदत कक्षाची स्थापना केले आहे. दिव्यांग रथाची आवश्यकता असलेल्या मतदारांना मदत कक्ष प्रतिनिधी तथा ग्राम महसूल अधिकारी सुनिल भगत, संपर्क क्रमांक 9890698712 यांचेशी दि. 20 नोव्हेंबर 2024 रोजी संपर्क साधावा, असे आवाहन करण्यात आले आहे.

000000

मतदानासाठी कामगारांना सुटी देण्याचे आवाहन

अपवादात्मक स्थितीत दोन तासांची सवलत

            अमरावती, दि. 11 (जिमाका): विधानसभा सार्वत्रिक निवडणूकीत सर्वांना मतदान करता यावे यासाठी, कामगार आणि कर्मचाऱ्यांना सुटी दयावी, असे आवाहन करण्यात आले आहे.

            विधानसभा सार्वत्रिक निवडणूकीसाठी मतदान दि. 20 नोव्हेंबर 2024 रोजी होणार आहे. या निवडणूकीमध्ये सर्व मतदारांना त्यांच्या मतदानाचा हक्क बजावता यावा यासाठी निवडणूक होणाऱ्या मतदान क्षेत्रातील कोणत्याही व्यवसायात, व्यापारात, औद्योगिक उपक्रमात किंवा इतर कोणत्याही आस्थापनेमध्ये कार्यरत असलेल्या आणि राज्याच्या विधानसभेच्या निवडणूकीत मतदान करण्याचा अधिकार असलेल्या प्रत्येक व्यक्तीला, मतदानाच्या दिवशी सुटी दिली जाईल. मतदानाच्या दिवशीची सुटी उद्योग विभागांतर्गत येणाऱ्या सर्व उद्योग समूह, महामंडळ, कंपन्या व संस्था, औद्योगिक उपक्रम किंवा इतर आस्थापना इत्यादींना लागू राहील.

            जिल्ह्यातील सर्व विधानसभा मतदार संघातील सर्व कामगार, कर्मचारी मतदारांना मतदानाच्या दिवशी मतदान करण्यासाठी भरपगारी सुटी देण्यात यावी. अपवादात्मक परिस्थितीत कामगार, अधिकारी, कर्मचारी इत्यादींना पूर्ण दिवस सुटी देणे शक्य नसेल तर, मतदान क्षेत्रातील कामगारांना मतदानाचा हक्क बजावण्यासाठी सुटी ऐवजी कमीत कमी दोन तासांची सवलत देता येईल. मात्र त्याबाबत जिल्हाधिकारी तथा जिल्हा निवडणूक अधिकारी, यांची पूर्व परवानगी घेणे आवश्यक राहील. कोणत्याही परिस्थितीत मतदारांना मतदानासाठी किमान दोन तासांची सवलत मिळेल याची दक्षता संबंधित आस्थापनांनी घेणे आवश्यक राहील.

            उद्योग विभागांतर्गत येणाऱ्या सर्व महामंडळ, उद्योग समुह, कंपन्या व संस्थामध्ये, औद्योगिक उपक्रम इत्यादींच्या आस्थापनांनी वरील सूचनांचे योग्य ते अनुपालन होईल, याची काटेकोरपणे खबरदारी घ्यावी. मतदारांकडून मतदानासाठी  सुटी किंवा सवलत प्राप्त न झाल्याने मतदान करता येणे शक्य न झाल्याबाबत तक्रार आल्यास, त्यांच्याविरूध्द योग्य कारवाई करण्यात येणार आहे.

जिल्ह्यातील सर्व कामगार मतदारांना मतदानाचा हक्क बजावता यावा यासाठी सर्व प्रकाराच्या आस्थापना धाराकांनी भरपगारी सुटी द्यावी, असे आवाहन सहायक कामगार आयुक्त यांनी केले आहे.

00000

 

तिवसा विधानसभा क्षेत्रात तीन उमेदवारांना नोटीस

*खर्च सादर करण्याचे निर्देश

अमरावती, दि. 11 (जिमाका) : तिवसा विधानसभा मतदारसंघात नामनिर्देशित उमेदवारांच्या खर्चाची पहिली तपासणी शुक्रवार, दि. 8 नोव्हेंबर रोजी पार पडली. यात खर्च सादर केलेला नाही, अशा तीन उमेदवारांना नोटीस देऊन 48 तासाच्या आत खर्च सादर करण्याचे निर्देश देण्यात आले आहे.

उमेदवारांच्या खर्चावर देखरेख ठेवण्यासाठी खर्च निरीक्षक म्हणून वेंकन्ना तेजावथ यांची नियुक्ती केली आहे.

            लेख्यांच्या पहिल्या तपासणीवेळी एकूण 16 उमेदवारांपैकी 2 उमेदवार अनुपस्थित राहिले. अनुपस्थित उमेदवारांना 48 तासांत निवडणूक खर्चाचे लेखे निवडणूक संनियंत्रण कक्ष, तहसिल कार्यालय, तिवसा येथे सादर करण्याबाबत नोटीस देण्यात आली. विहित मुदतीत खर्च सादर केला नसल्यास नियमानुसार तक्रार दाखल करण्यात येणार आहे. तसेच देण्यात आलेल्या सर्व परवानग्या तात्काळ रद्द करण्यात येणार आहे.

14 उमेदवारांनी पहिल्या तपासणीवेळी त्यांचा दैनंदिन खर्चाचा लेखा सादर केला. 11 उमेदवारांनी खर्च जुळलेला असून उर्वरित 3 उमेदवारांनी  सादर केला नसल्यास शॅडो खर्चानुसार खर्च नोंदविण्यात येणार आहे. पहिल्या तपासणीअंती उमेदवारनिहाय खर्च हा तात्पुरत्या स्वरुपाचा असून निकालानंतर आयोजित लेखा ताळमेळ बैठकीमध्ये ताळमेळ घेऊन सदर खर्चास अंतिम स्वरुप देण्यात येणार आहे. अंतिम बैठकीनंतर खर्चाचा ताळमेळ झाल्यानंतरच सदरचा खर्च हा भारत निवडणूक आयोगास सादर केला जाणार आहे, सदर तपासणीवेळी खर्च निरीक्षक वेंकन्ना तेजावथ, उपविभागीय अधिकारी तथा तिवसा निवडणूक निर्णय अधिकारी  मिन्नु पी.एम.,सहायक खर्च निरीक्षक आसिफ गनी, लेखा अधिकारी डी.बी. जाधव, सहायक लेखा अधिकारी सतिश इंगळे, उपकोषागार अधिकारी तुषार रत्नपारखी, तसेच उमेदवारांचे प्रतिनिधी उपस्थित होते.   

00000

शासकीय वैद्यकीय महाविद्यालयातील विद्यार्थ्यांना इफेक्टीव्ह लिसनिंग स्किल या विषयावर मार्गदर्शन

अमरावती, दि. 11 (जिमाका): शासकीय वैद्यकीय महाविद्यालय, अमरावती येथील विद्यार्थ्यांना 'इफेक्टीव्ह लिसनिंग स्किल ' या विषयावर अतिरिक्त जिल्हाधिकारी रविंद्र धुरजड यांनी नुकतेच मार्गदर्शन  केले.  श्री धुरजड यांनी शासकीय वैद्यकीय महाविद्यालयातील प्रथम वर्ष एमबीबीएसच्या विद्यार्थ्यांना इफेक्टिव्ह लिसनिंग स्कील या विषयावर विद्यार्थ्यांशी संवाद साधून त्यांना याबाबत मार्गदर्शन केले.  नवनिर्मित वैद्यकीय महाविद्यालयाचा अधिकाधिक लाभ विद्यार्थ्यांनी घ्यावा, असे आवाहन त्यांनी यावेळी केले.

  कार्यक्रमाचे अध्यक्षस्थानी शासकीय वैद्यकीय महाविद्यालयाचे अधिष्ठाता डॉ. किशोर इंगोले होते. कार्यक्रमाचे प्रास्ताविक उपअधिष्ठाता डॉ.नितीन अंभोरे यांनी केले. सहायक प्राध्यापक डॉ. मिनोती पोकळे यांनी संचालन केले तर आभार सहयोगी प्राध्यापक डॉ. कुमूद हरले यांनी मानले.

000

DIO NEWS AMRAVATI 10.11.2024

 

अमरावती विधानसभा क्षेत्रात तीन उमेदवारांना नोटीस

*खर्च सादर करण्याचे निर्देश

अमरावती, दि. 10 (जिमाका) : अमरावती विधानसभा मतदारसंघात नामनिर्देशित उमेदवारांच्या खर्चाची पहिली तपासणी गुरूवार, दि. 7 नोव्हेंबर रोजी पार पडली. यात खर्च सादर केलेला नाही, अशा तीन उमेदवारांना नोटीस देऊन 48 तासाच्या आत खर्च सादर करण्याचे निर्देश देण्यात आले आहे.

उमेदवारांच्या खर्चावर देखरेख ठेवण्यासाठी खर्च निरीक्षक म्हणून वेंकन्ना तेजावथ यांची नियुक्ती केली आहे. लेख्यांच्या पहिल्या तपासणीवेळी एकूण 22 उमेदवारांपैकी 4 उमेदवार अनुपस्थित राहिले. अनुपस्थित उमेदवारांना 48 तासांत निवडणूक खर्चाचे लेखे उपविभागीय अधिकारी कार्यालय, उपविभागीय अधिकारी कार्यालय येथील पहिल्या माळ्यावरील सभागृह, नवीन प्रशासकीय इमारत, संत ज्ञानेश्वर सांस्कृतिक भवनासमोर, अमरावती येथे सादर करण्याबाबत नोटीस देण्यात आली. विहित मुदतीत खर्च सादर केला नसल्यास नियमानुसार तक्रार दाखल करण्यात येणार आहे. तसेच देण्यात आलेल्या सर्व परवानग्या तात्काळ रद्द करण्यात येणार आहे.

18 उमेदवारांनी पहिल्या तपासणीवेळी त्यांचा दैनंदिन खर्चाचा लेखा सादर केला. 4 उमेदवारांनी खर्च सादर केला नसल्यास शॅडो खर्चानुसार खर्च नोंदविण्यात येणार आहे. पहिल्या तपासणीअंती उमेदवारनिहाय खर्च हा तात्पुरत्या स्वरुपाचा असून निकालानंतर आयोजित लेखा ताळमेळ बैठकीमध्ये ताळमेळ घेऊन सदर खर्चास अंतिम स्वरुप देण्यात येणार आहे. अंतिम बैठकीनंतर खर्चाचा ताळमेळ झाल्यानंतरच सदरचा खर्च हा भारत निवडणूक आयोगास सादर केला जाणार आहे, असे निवडणूक निर्णय अधिकारी अनिलकुमार भटकर यांनी कळविले आहे.

00000

दिव्यांग मतदारांना ईव्हीएमचे प्रात्यक्षिक

            अमरावती, दि. 10 (जिमाका) : विधानसभेची सार्वत्रिक निवडणूक दि. 20 नोव्हेंबर 2024 रोजी होणार आहे. त्यानुषंगाने ईव्हीएम मशीनवर मतदान करणे सुलभ व्हावे, यासाठी शनिवार, दि. 9 नोव्हेंबर रोजी दिव्यांग मतदारांसाठी कार्यशाळा आयोजित करून त्यांना प्रत्यक्ष ईव्हीएम मशीनवर मतदानाचे प्रात्यक्षिक देण्यात आले.

अमरावती  विधानसभा मतदारसंघाचे निवडणूक निर्णय अधिकारी अनिल भटकर यांनी तहसिल कार्यालयात दिव्यांग मतदारांसाठी प्रत्यक्ष ईव्हीएम मशीनवर प्रात्यक्षिक दिले. दिव्यांग मतदारांना ईव्हीएम मशीनवर मतदान करताना समस्या येऊ नये आणि मतदान करणे सुलभ व्हावे, यासाठी ही विशेष कार्यशाळा फक्त दिव्यांग मतदारांसाठी आयोजित करण्यात आली. यात दिव्यांग बांधवांनी सहभाग नोंदविला.

यावेळी दिव्यांग मतदारांचे जिल्हा सहायक नोडल अधिकारी पंकज मुदगल, द्विभाषिक म्हणून निरज तिवारी यांनी प्रात्यक्षिक देण्याची जबाबदारी पार पाडली. कार्यशाळेला तहसिलदार विजय लोखंडे उपस्थित होते. कार्यशाळेसाठी नायब तहसिलदार निवडणूक राजू दंडाळे, निवडणूक विभागाचे भारत कांबळे, पवन बोंडे यांनी पुढाकार घेतला.

00000

मतदानाचा टक्का वाढविण्यासाठी सक्रीय सहभागी नोंदवा - जिल्हाधिकारी सौरभ कटियार

 

मतदानाचा टक्का वाढविण्यासाठी सक्रीय सहभागी नोंदवा

-        जिल्हाधिकारी सौरभ कटियार

 

अमरावती, दि. 9 : लोकसभा निवडणुकीत प्रशासन, नागरिक आणि संस्थांच्या मदतीने व्यापक जनजागृती मोहिम राबविण्यात आली. याचा परिणाम म्हणून मतदानाची टक्केवारीत तीन टक्यां्कनी वाढ झाली. सर्वांनी दिलेल्या योगदानामुळे हे शक्य झाले आहे. या विधानसभा निवडणुकीतही सर्वांनी सक्रीय सहभाग नोंदवत मतदानाचा टक्का वाढवावा, असे आवाहन जिल्हाधिकारी सौरभ कटियार यांनी केले.

नियेाजन भवनात मतदार जनजागृतीचा कार्यक्रम पार पडला. यावेळी मुख्य कार्यकारी अधिकारी संजीता महापात्र, महापालिका आयुक्त सचिन कलंत्रे, उपायुक्त कल्पना बावरकर, कौन बनेगा करोडपतीच्या विजेत्या बबीता ताडे यांच्यासह विविध संस्था, संघटनांचे प्रतिनिधी उपस्थित होते.

जिल्हाधिकारी श्री. कटियार यांनी, लोकसभा निवडणुकीत संस्था आणि संघटनांच्या माध्यमातून विविध उपक्रम राबविण्यात आले. यातून मतदारांमध्ये जनजागृतीसोबतच त्यांना मतदानासाठी प्रवृत्त करण्याचे कार्य करण्यात आले. इतर ठिकाणी कमी मतदान झालेले असताना आपल्या जिल्ह्यात मतदानाची टक्केवारी वाढली हे स्वीप उपक्रमांचे यश आहे. समाजातील युवक, महिला, दिव्यांग, ज्येष्ठ नागरिक, तृतीयपंथी अशा सर्व घटकांना उपक्रमांमध्ये सहभागी करून घेण्यात येत आहे.

ग्रामीण भागात 75 टक्के मतदान होत असताना या तुलनेत शहरी भागात मतदान होत नाही. यावेळी प्रामुख्याने शहरी भागामध्ये लक्ष केंद्रीत करून जनजागृती करण्यावर भर देण्यात येणार आहे. तसेच कमी मतदान झालेल्या मतदान क्षेत्रामध्येही स्वीपचे उपक्रम जाणीवपूर्वक राबविण्यात येणार आहे. जनजागृतीसोबतच मतदानासाठी येणाऱ्या नागरिकांना सोयीसुविधा उपलब्ध करून देण्यात येणार आहे. प्रामुख्याने पाणी, स्वच्छता, बसण्याची सोय आदी बाबींवर लक्ष देण्यात येणार आहे. मतदारांना सोयीचे व्हावे, यासाठी वोटर स्लीप देण्यात येत आहे. मतदारांना मतदान केंद्राची माहिती आणि याठिकाणी योग्य सुविधा मिळाल्यास मतदानाचा टक्का निश्चितच वाढण्यास मदत होणार आहे.

मुख्य कार्यकारी अधिकारी श्रीमती महापात्र यांनी, जनजागृतीसाठी गावपातळीवरही उपक्रम राबविण्यात येत आहे. तसेच मतदानासाठी येणाऱ्या नागरिकांना चांगला अनुभव येण्यासाठी मतदान केंद्रावर सुविधा उपलब्ध करून देण्यात येणार आहे.

महापालिका आयुक्त श्री. कलंत्रे यांनी, मतदानाचा टक्का वाढविण्यासाठी विविध प्रयत्न करण्यात येणार आहे. त्यात खासगी आस्थापनांनी कर्मचाऱ्यांना सवलत आणि पगारी सुट्टी देणे, मतदान केंद्रावर दिव्यांग आणि ज्येष्ठ नागरिकांना व्हीलचेअर आदी सुविधा देण्यात येणार आहे. तसेच जनजागृतीसाठी दि. 11 नोव्हेंबर रोजी रॅली काढण्यात येणार असून यात नागरिकांनी सहभागी होण्याचे आवाहन केले.

यावेळी विविध संस्था, संघटनांच्या प्रतिनिधींनी निवडणूक प्रक्रियेबाबत येणाऱ्या समस्यांची माहिती दिली. यावेळी आंतरराष्ट्रीय खेळाडूंचा सत्कार करण्यात आला आहे. क्षिप्रा मानकर यांनी सूत्रसंचालन केले. श्री. खाते यांनी आभार मानले.

00000

 

बडनेरा विधानसभा क्षेत्रात तीन उमेदवारांना नोटीस

*खर्च सादर करण्याचे निर्देश

अमरावती, दि. 09 (जिमाका) : बडनेरा विधानसभा मतदारसंघात नामनिर्देशित उमेदवारांच्या खर्चाची पहिली तपासणी गुरूवार, दि. 7 नोव्हेंबर रोजी पार पडली. यात खर्च सादर केलेला नाही, अशा तीन उमेदवारांना नोटीस देऊन 48 तासाच्या आत खर्च सादर करण्याचे निर्देश देण्यात आले आहे.

उमेदवारांच्या खर्चावर देखरेख ठेवण्यासाठी खर्च निरीक्षक म्हणून वेंकन्ना तेजावथ यांची नियुक्ती केली आहे. लेख्यांच्या पहिल्या तपासणीवेळी एकूण 26 उमेदवारांपैकी 3 उमेदवार अनुपस्थित राहिले. अनुपस्थित उमेदवारांना 48 तासांत निवडणूक खर्चाचे लेखे उपविभागीय अधिकारी कार्यालय, जुनी अमरावती तहसील कार्यालय, अमरावती येथे सादर करण्याबाबत नोटीस देण्यात आली आहे. विहीत मुदतीत खर्च सादर केला नसल्यास नियमानुसार तक्रार दाखल करण्यात येणार आहे. तसेच देण्यात आलेल्या सर्व परवानग्या तात्काळ रद्द करण्यात येणार आहे.

7 उमेदवारांनी पहिली तपासणीवेळी त्यांचा दैनंदिन खर्चाचा लेखा सादर केला असता छायांकित निरीक्षण नोंदवहीसोबत ताळमेळअंती योग्य वाटत नसल्याने त्यांनी खर्चाचा काही भाग सादर केला नाही. या सर्व उमेदवारांना उपविभागीय अधिकारी यांनी नोटीस बजावली. पहिल्या तपासणीअंती उमेदवारनिहाय खर्च हा तात्पुरत्या स्वरुपाचा असून निकालानंतर आयोजित लेखा ताळमेळ बैठकीमध्ये ताळमेळ घेऊन सदर खर्चास अंतिम स्वरुप देण्यात येणार आहे. अंतिम बैठकीनंतर खर्चाचा ताळमेळ झाल्यानंतरच सदरचा खर्च हा भारत निवडणूक आयोगास सादर केला जाणार आहे.

00000

DIO NEWS AMRAVATI 08.11.2024

                                               जिल्हाधिकाऱ्यांच्या हस्ते वोटर स्लिप चे नागरिकांना वाटप

जिल्हाधिकाऱ्यांनी केली विविध मतदान केंद्राची पाहणी

 

अमरावती, दि . 8 (जिमाका) :  विधानसभा  सार्वत्रिक निवडणूक - 2024 च्या पार्श्वभूमीवर जिल्हाधिकारी सौरभ कटियार यांच्या हस्ते  आज नागरिकांना वोटर स्लिप  व गुलाबपुष्प देवून मतदानाचा हक्क बजावण्याचे आवाहन करण्यात आले. यावेळी नागरिकांनी 'आम्ही मतदानाचा हक्क निश्चित बजावू व राष्ट्रीय कार्यात स्वयंस्फूर्तीने सहभाग घेवू', अशी ग्वाही दिली .

    जिल्हाधिकारी श्री. कटियार यांनी आज अमरावती तसेच बडनेरा येथील विविध मतदान केंद्रांना भेट देऊन तेथील व्यवस्थेचा आढावा घेतला. पोलीस आयुक्त नवीनचंद्र रेड्डी, जिल्हा परिषदेच्या मुख्य कार्यकारी अधिकारी संजिता मोहपात्र, मनपा आयुक्त सचिन कलंत्रे, पोलीस उपायुक्त गणेश शिंदे, सागर पाटील, कल्पना बारवकर, उपविभागीय अधिकारी अनिल भटकर, उपजिल्हाधिकारी विवेक जाधव  आदी मान्यवर यावेळी उपस्थित होते.

       निवडणूक प्रक्रियेत सर्व अधिकारी-कर्मचाऱ्यांनी योग्य समन्वय राखावा. मतदानाच्या दिवशी मतदान केंद्रांवर सर्व मूलभूत सोयी-सुविधा उपलब्ध असल्याची खात्री उपविभागीय अधिकारी यांनी करून घेण्याचे निर्देश जिल्हाधिकारी श्री. कटियार यांनी यावेळी दिले .

            मतदान केंद्रांवर दिव्यांगांसाठी व्यवस्था, पाण्याची व्यवस्था, बैठक व्यवस्था, आवश्यक असेल तिथे पेंडॉल, स्वच्छतागृहे या मूलभूत  सोयी-सुविधा असणे आवश्यक आहे. मतदान करतेवेळी त्या कक्षामध्ये चांगला प्रकाशझोत असावा. मतदानाच्या दिवशी मतदान केंद्रावरील ईव्हीएम मशीन, मतदार संख्या आणि होणाऱ्या मतदानाच्या टक्केवारीबाबत तात्काळ अद्ययावत माहिती अपलोड करावी, असेही ते यावेळी म्हणाले.

            जिल्हाधिकारी श्री. कटियार यांनी जुनी वस्ती, बडनेरा येथील अमरावती मनपा उर्दू प्राथमिक कन्या शाळा क्रमांक -3,  साईनगर येथील साईबाबा विद्यालय, हलिमा उर्दू शाळा, बिस्मिल्ला नगर येथील मनपा उर्दू प्राथमिक शाळा, जमील कॉलनी येथील मनपा उर्दू हायस्कूल, छत्रसालगंज येथील मनपा हिंदी प्राथमिक शाळा क्रमांक -2, वलगाव रोड येथील जिल्हा परिषद प्राथमिक शाळा विद्योचित ॲकेडेमीक माध्यमिक शाळा या मतदान केंद्रांना भेट देऊन तेथे व्यवस्थेची पाहणी केली.

     'मी मतदान करणारच' या सेल्फी पॉईंटवर जिल्हाधिकारी तसेच सर्व मान्यवर यांनी सेल्फी काढून मतदानाचा हक्क बजावण्याबाबत  नागरिकांना आवाहन केले.  पोलीस आयुक्त श्री. रेड्डी, मुख्य कार्यकारी अधिकारी, श्रीमती मोहपात्र, मनपा आयुक्त श्री कलंत्रे यांनीही यावेळी  नागरिकांना मतदानाचा हक्क बजावून  राष्ट्रीय कर्तव्य पार पाडावे, आम्हीही करतो, तुम्हीही मतदान करा, असा संदेश दिला. यावेळी नागरिकांनी  मतदानाचा हक्क बजावण्याबाबत प्रतिज्ञा घेतली.  चांदणी चौक ते राजकमल चौक या मार्गाने मतदानाबाबत जनजागृती करणारी रॅली यावेळी काढण्यात आली.

0000

 

‘उर्ध्व वर्धा’तून रब्बी सिंचनासाठी पाच पाणीपाळ्या प्रस्तावित

शेतक-यांना अर्ज करण्याचे आवाहन

       अमरावती, दि. 08 (जिमाका): उर्ध्व वर्धा प्रकल्पातून रब्बी हंगामासाठी  पाणीसाठा उपलब्ध असून पाच पाणी पाळ्या देण्याचे प्रस्तावित आहे. यासाठी लाभक्षेत्रातील शेतकरी बांधवांनी 10 नोव्हेंबरपूर्वी संबंधित शाखा कार्यालयास अर्ज करण्याचे आवाहन करण्यात आले आहे.

       उजवा मुख्य कालव्याच्या आरंभापासून  14.34 किमीपर्यंत व डावा मुख्य कालव्याच्या  22.44 किमीपर्यंतच्या लाभक्षेत्रातील सर्व वितरिका, जलाशयावरील अधिसूचित नदीनाल्यांवरील लाभधारकांना रब्बी हंगामासाठी  पाणी देण्यात येईल. वितरण व्यवस्थेद्वारे जिथे सुलभपणे पाणी जाऊ शकते तिथपर्यंत कालवा संचलन कार्यक्रमानुसार  ‘पुच्छ भागाकडून ते मुखाकडे’ (टेल टु हेड) या तत्त्वानुसार सिंचन होणे आवश्यक आहे.

नोव्हेंबर ते मार्च दरम्यान पाच वेळा पाणी मिळेल.

       कालव्याचे प्रवाही किंवा कालव्यावरील, नदी-नाल्यांवरील मंजूर उपसा सिंचन योजनांद्वारे सिंचनासाठी पाणी घ्यावयाचे असल्यास पाणी मागणी अर्ज नमुना क्र. 7 संबंधित शाखा कार्यालयात विनामूल्य उपलब्ध आहेत. ते भरून 10  नोव्हेंबरपर्यंत तिथेच सादर करावेत, असे आवाहन उर्ध्व वर्धा पाटबंधारे विभागाच्या कार्यकारी अभियंत्यांनी केले आहे. रब्बी हंगामात  नोव्हेंबर 2024 अखेरपर्यंत  या कालावधीत मागणीप्रमाणे पाच पाणी पाळ्या देण्यात येतील.

लाभधारकांनी नियम पाळणे आवश्यक

            इच्छुक लाभधारकांनी त्यांच्याकडील थकबाकीची एक तृतीयांश व चालू हंगामाची अग्रिम पाणीपट्टी भरावी. उपसा सिंचन लाभधारकांनी नळमार्गावर पाणी मोजमाप यंत्र बसवावे. पिकांचे मागणी क्षेत्र 20 आर या पटीत असावे. पाणी अर्ज मंजूर करुन घेऊनच उपसा सिंचनासाठी पाणी वापर करावा.

             मंजूर क्षेत्रासाठी कालव्याचे पाणी घेण्यात येणारी शेतचारी व विहिरीवरील शेतचारी यात तीन मीटरचे अंतर असावे. उपसा सिंचन धारकांनी (उदा. कालवा, नदी व नाले) पाणी मंजुर करून घेवूनच उपसा सिंचनास पाणी वापर करावा. पाटबंधारे अधिनियमानुसार प्रवाही सिंचनाच्या मूळ दराच्या 20 टक्के  दर लागू असेल.

पाणीपट्टी न भरणा-या लाभधारकास सिंचनासाठी पाणी देणे या कार्यालयावर बंधनकारक राहणार नाही. व त्यांचा पाणीपुरवठा केव्हाही बंद करण्यात येईल व थकबाकीवर शासन निर्णय नियमानुसार द.सा.द.शे. 10 टक्के दरान विलंब आकारण्यात येईल.

शेतचारा स्वच्छ ठेवा

कालव्याचे पाणी शेतात नेण्यासाठी असलेली शेतचारी स्वच्छ व व्यवस्थित ठेवण्याची जबाबदारी लाभधारकांची आहे. शेतचारी स्वच्छतेअभावी पाणी पुरवठ्यामध्ये व्यत्यय आल्यास हे कार्यालय जबाबदार राहणार नाही. उडाफ्याचे क्षेत्रास पाणीपुरवठा करण्यात येणार नाही व तसेच लाभधारकांनी मंजूर क्षेत्राचे मर्यादेपर्यंत कालवा व नदी-नाल्याच्या पाण्याचा वापर करावा. मंजूरीपेक्षा जादा क्षेत्र भिजविल्यास व अनधिकृतपणे पाणी घेतल्यास नियमाप्रमाणे पंचनामा करुन दंडनीय आकारणी करण्यात येईल. मंजूर न केलेल्या क्षेत्रास पाणी पुरवठा करण्याची जबाबदारी या कार्यालयावर राहणार नाही.

     लाभधारकाने दिवस व रात्री पाणी घेणे बंधनकारक आहे. अडचणी असल्यास कोणत्याही प्रकारची आगाऊ सूचना न देता पाणी पाळी पत्रकात बदल करण्याचे अधिकार कार्यकारी अभियंता यांना राहतील.

थकबाकीदार लाभधारक व थकबाकीदार पाणीवापर संस्थांना पाणी देणे बंधनकारक राहणार नाही.   वितरिका पाणी पाळीमध्ये पाणी चालू असताना लाभधारक वितरिकेचा दरवाजा  वेळी-अवेळी कमी-जास्त प्रमाणात उघडतात. त्यामुळे त्या वितरिकेवरील चालू असलेल्या पाण्याचा विसर्ग कमी जास्त होऊन ‘टेल टू हेड’ सिंचनावर विपरीत परिणाम होतो व त्यामुळे त्या वितरिकावरील पिकांना संचलनाप्रमाणे पाणीपुरवठा होत नाही. त्यामुळे प्रस्तावित पाणी पाळी कालावधीत वाढ होते.

 

रब्बी हंगाम 2024-25 संभाव्य पाणी पाळी नियोजन

कालव्यात पाणी सोडण्याचा कालावधी  दि. 15 नोव्हेंबर  ते 29 नोव्हेंबर 2024  (15 दिवस) तर  कालवा बंद कालावधी 30 नोव्हेंबर ते 6 डिसेंबर 2024 राहील. दि. 7 डिसेंबर 2024 ते 21 डिसेंबर 2024 कालव्यात  (15 दिवस) पाणी सोडण्यात येईल तर दि. 22 ते 28  डिसेंबर 2024  कालवा बंद राहील. दि. 29 डिसेंबर ते  दि. 1 जानेवारी 2025 (15 दिवस) पाणी सोडण्यात येईल तर दि. 13 ते 19 जानेवारी 2025 कालवा बंद राहील.  दि. 20 ते  दि. 3  फेब्रुवारी 2025 (15 दिवस) पाणी सोडण्यात येईल तर  दि. 4 ते दि. 10 फेब्रुवारी 2025  कालवा बंद राहील. दि. 11  ते 25 फेब्रुवारी 2025 (15 दिवस) पाणी सोडण्यात येईल. तर दि. 26 फेब्रुवारी ते दि. 4 मार्च 2025 कालवा बंद राहील.  कालव्यात एकूण 75 दिवस पाणी सोडण्यात येईल.

जर लाभधारकांनी संचलन कार्यक्रमाप्रमाणे टेल टू हेड रात्रंदिवस शेजपाळीपध्दतीने पिकांना पाणी घेतले तर संभाव्य पाणीपाळीचा कालावधी कमी होवून पाण्याचा अधिकाधिक लाभ होईल. संपूर्ण प्रकल्पाच्या लाभक्षेत्रात शेतकऱ्यांनी कोठेही दारे स्वतः उघडून टेल टू हेड सिंचन प्रकारात अडथळा आणल्यास पाण्याचा नाश तर होतोच शिवाय पाणीपाळी कालावधी वाढतो. उर्ध्व वर्धा प्रकल्पांतर्गत असलेल्या लाभधारकांनी या बाबत योग्य ते सहकार्य करावे, असे आवाहन उर्ध्व वर्धा पाटबंधारे विभागामार्फत करण्यात आले आहे.

000000

मध्यप्रदेशातून येणा-या अवैध गावठी हातभट्टी दारुवर राज्य उत्पादन शुल्क विभागाची कारवाई

 

            अमरावती, दि. 08 (जिमाका): विभागीय उपआयुक्त अर्जुन ओहोळ, राज्य उत्पादन शुल्क अमरावती विभाग व अधीक्षक राज्य उत्पादन शुल्क श्रीमती ज्ञानेश्वरी आहेर  यांच्या मार्गदर्शनाखाली आदर्श आचारसंहीता विधानसभा निवडणुक - 2024च्या पार्श्वभूमीवर विशेष मोहिमेत भरारी पथक यांनी नुकतीच धारूळ ते चिंचोली रोडवर, बस थांब्यांच्या बाजुला ता. मोशी येथे एक बजाज कंपनीची डिस्ककवर दुचाकी मोटरसायकल, (क्रमांक एमएच 27 ऐपी 1399 )  दुचाकीच्या मागील सीटवर एका नॉयलानच्या पोत्यात दोरीच्या साहाय्याने बांधलेला रबरी ट्युबमध्ये अंदाजे 70 लीटर गावठी हातभट्टी दारु भरलेली होती. कारवाई दरम्यान दुचाकी वाहनासह गावठी हातभट्टी दारुची अंदाजे किंमत 55 हजार 200 रुपयाचा मुद्देमाल जप्त करण्यात आला. आरोपी इसम रामकिशन झनकराम धुर्वे, वय 35  वर्ष, रा. तरोडा ता. मोर्शी यांच्यावर महाराष्ट्र दारुबंदी कायदयानुसार गुन्हा नोंद करण्यात आला.

            तसेच धामणगाव गढ़ी ते धारणी रोडवर वझ्झर धरणाजवळ ता. अचलपुर येथे एक दुचाकी मोटरसायकल ( क्रमांक एमएच 27 / 7154) या दुचाकीच्या मागील सीटवर एका नॉयलानच्या पोत्यात दोरीच्या साहाय्याने बांधलेल्या 60 लीटर क्षमतेच्या एक रबरी ट्युब व 30 लीटर क्षमतेचे दोन रबरी ट्युबमध्ये अंदाजे 120 लीटर गावठी हातभट्टी दारू जप्त करण्यात आली. कारवाई दरम्यान दुचाकी वाहनासह गावठी हातभट्टी दारुची अंदाजे कींमत 52 हजार 400 रुपयाचा मुद्देमाल जप्त करण्यात आला. यावेळी आरोपी इसम आकाश गणेश उईके, वय 28 वर्ष, रा. गौलान मोहल्ला खोमई ता. भैसदेही, जि. बैतुल यांच्यावर महाराष्ट्र दारुबंदी कायदयानुसार गुन्हा नोंद करण्यात आला.

       ही कारवाई दुय्यम निरीक्षक एस.पी. वायाळ, पी. पी. देशमुख,  एस. एस. पेंढारकर, एस टी. जाधव, पी. आर. भोरे, जवान के. एम. मातकर,  व्ही. बी. पारखी, डी. डी. मानकर यांचे संयुक्त पथकाने केली. या कारवाईचा पुढील तपास दुय्यम निरीक्षक एस. पी. वायाळ व पी. पी. देशमुख भरारी पथक हे करीत आहेत.

0000

खर्च संनियंत्रण पथकाकडून उमेदवारांच्या लेख्यांची प्रथम तपासणी पूर्ण

 

            अमरावती, दि. 08 (जिमाका): विधानसभा निवडणुकीच्या नामनिर्देशित झालेल्या उमेदवारांच्या खर्चाची तपासणी करण्यात आली. यानंतर पहिली तपासणी 11 नोव्हेंबर तर दुसरी तपासणी 15 नोवव्हेंबर रोजी होणार आहे.

विधानसभा सार्वत्रिक निवडणुक - 2024 च्या अनुषंगाने अमरावती विधानसभा मतदारसंघात दि. 20 नोव्हेंबर 2024 रोजी निवडणूक होणार असून निवडणुका शांततापूर्ण, भयमुक्त व पारदर्शकरित्या पार पाडण्यासाठी निवडणुक आयोगाने आदर्श आचार संहिता लागू केलेली आहे. उमेदवारांच्या खर्चावर देखरेख ठेवण्याकरीता भारत निवडणुक आयोगाने खर्च निरीक्षक उमा माहेस्वरी यांची नियुक्ती केली आहे. खर्च निरीक्षक यांनी उमेदवरांच्या लेख्याची तपासणी करण्याकरीता तीन तारखा निश्चित करण्यात आलेल्या आहेत. त्यातील पहिली तपासणी खर्च निरीक्षक उमा माहेस्वरी यांचे मार्गदर्शनाखाली  दि. 7 नोव्हेंबर 2024 रोजी नवीन तहसिल इमारत, दर्यापूर येथील सभागृहात पार पडली.

             उमेदवारांच्या लेख्याच्या तपासणीवेळी एकुण 16 उमेदवारांपैकी 15 उमेदवार, प्रतिनिधी उपस्थित होते. अनुपस्थित एका उमेदवारास 48 तासाचे आत निवडणुक खर्चाचे लेखे निवडणुक संनियंत्रण कक्ष, नवीन तहसिल इमारत, दर्यापूर येथे सादर करण्याबाबत नोटीस देण्यात आली. विहित मुदतीत खर्च सादर न केल्यास कायद्यान्वये तक्रार दाखल करण्यात येईल. तसेच वाहने, सभा इत्यादी साठी देण्यात आलेल्या सर्व परवानग्या तात्काळ प्रभावाने रद्द करण्यात येतील, असे कळविण्यात आले आहे. या खर्च तपासणीचे वेळी उपस्थित 15 उमेदवार, प्रतिनिधी यांनी त्यांच्या खर्च नोंदवहीत नोंदविलेला खर्च व खर्च सनियंत्रण पथकाद्वारे नोंदविण्यात आलेला खर्च यात असलेली तफावत उमेदवारांनी मान्य करून प्रथम तपासणीत सदर पंधराही उमेदवारांचे खर्च लेख्याचे ताळमेळ घेण्यात आला.

       उमेदवरांच्या लेख्याची दुसरी व तिसरी तपासणी अनुक्रमे दि. 11 व 15 नोव्हेंबर 2024 रोजी नवीन तहसिल इमारत, दर्यापूर येथील सभागृहात आयोजिली आहे, संबंधितांनी याची नोंद घेण्याच्या आवाहन करण्यात आले आहे.

00000