बेलोरा विमानतळ विकासाला गती मिळण्यासाठी शासन स्तरावर स्वतंत्र बैठक व्हावी

 

बेलोरा विमानतळ विकासाला गती मिळण्यासाठी शासन स्तरावर

स्वतंत्र बैठक व्हावी

पालकमंत्री ॲड. यशोमती ठाकूर यांच्याकडून मुख्यमंत्र्यांना निवेदन

 

अमरावती, दि. 5 : अमरावती येथील बेलोरा विमानतळाच्या विकासाची कामे मंद गतीने होत असून, त्यांना गती मिळण्यासाठी शासन स्तरावर स्वतंत्र बैठक व्हावी, असे निवेदन राज्याच्या महिला व बालविकास मंत्री तथा जिल्ह्याच्या पालकमंत्री ॲड. यशोमती ठाकूर यांनी मुख्यमंत्री उद्धव ठाकरे यांना दिले आहे.

अमरावतीच्या बेलोरा विमानतळाच्या विकासाचे काम महाराष्ट्र विमानतळ विकास प्राधिकरणातर्फे होत आहे. त्याच्या कामकाजाची माहिती व आढावा नुकताच पालकमंत्र्यांनी जिल्हाधिकारी कार्यालयात घेतला होता. अमरावती शहर व जिल्ह्याच्या विकासासाठी व येथील व्यापार- व्यवसाय, उद्योगवाढीच्या दृष्टीने विमानतळाची कामे सहा महिन्यांत पूर्ण होण्याची गरज त्यांनी व्यक्त केली होती. याबाबत मुख्यमंत्री उद्धव ठाकरे यांच्या अध्यक्षतेखाली  बैठक प्राधिकरणाच्या अधिका-यांसमवेत शासन स्तरावर मंत्रालयात व्हावी, अशी विनंती पालकमंत्री श्रीमती ठाकूर यांनी मुख्यमंत्र्यांनी केली आहे.

प्राधिकरणाने डिसेंबरपर्यंत धावपट्टीचे काम पूर्ण करण्याचे नियोजन केले आहे. तथापि, प्रशासकीय इमारत व इतर कामेही वेळेत पूर्ण होऊन विमानसेवेला प्रारंभ होणे आवश्यक आहे. त्यामुळे फेज-1 व 2 मधील प्रलंबित कामे पूर्ण करण्यासाठी पालकमंत्री श्रीमती ठाकूर यांच्याकडून पाठपुरावा होत आहे.

आतापर्यंत झालेल्या कामांमध्ये बडनेरा यवतमाळ राज्य वळण महामार्गाचे बांधकाम पूर्ण करण्यात आले आहे. विमानतळावर 1 लाख लीटर क्षमतेचे भूमिगत पाणीसाठा (जीएसआर) व्यवस्था झाली आहे.  संरक्षण भिंतीचे 15 कि.मी. लांबीचे बांधकाम हाती घेण्यात आले असून,  एटीआर 72-500 कोड सी-3 विमानाच्या तात्काळ उड्डाणासाठी आवश्यक साडेसात किमी संरक्षण भिंतीचे काम पूर्ण झाले आहे. उर्वरित दुस-या टप्प्यातील 60 टक्के काम पूर्ण झाले आहे. धावपट्टीचे विस्तारीकरण, टॅक्सीवे, अप्रॉन, आयसोलेशन बे, पेरिफेरल रोड, जीएसई एरिया, स्वच्छता यंत्रणा आदी कामे 70 टक्के पूर्ण झाली आहेत. ती डिसेंबरपर्यंत पूर्ण होतील.

मात्र, प्रशासकीय इमारतीचे अंदाजपत्रक, निविदा तयार करण्याचे काम अद्यापही झालेले नाही. त्यामुळे मंत्रालय स्तरावर या विषयाचा पाठपुरावा करून मुख्यमंत्र्यांच्या अध्यक्षतेखाली बैठक आयोजित करण्याची विनंती पालकमंत्र्यांनी केली आहे.

शहर व जिल्ह्याच्या विकासाच्या दृष्टीने अमरावती येथून विमानसेवेला लवकरात लवकर आरंभ होणे आवश्यक आहे. राष्ट्रीय महामार्ग क्र. सहा व राज्य महामार्गाला जोडणारा 03. 10 किमी लांबीच्या प्रमुख जिल्हा मार्ग क्र. 49 चे मजबुतीकरण, सुधारणा, त्याचप्रमाणे, डीव्हीओआर सेक्शनजवळील निंभोरा- जळू ॲप्रोच रोडचे बांधकाम या अडीच किलोमीटर लांबीच्या कामालाही गती मिळणे गरजेचे आहे. जिल्ह्याच्या औद्योगिक, वाणिज्यिक विकासाच्या दृष्टीने विमानतळ लवकरात लवकर होणे गरजेचे आहे. त्यामुळे या विषयांबाबत मुख्यमंत्री महोदयांच्या उपस्थितीत व प्राधिकरणांच्या अधिका-यांसमवेत चर्चा बैठकीद्वारे होणार आहे.

 

000000

 

खासगी रूग्णालयांनी निश्चित शुल्कानुसारच आकारणी करावी - पालकमंत्री ॲड. यशोमती ठाकूर

 

कोरोना उपचारासाठी दर नियंत्रणाच्या निर्णयाला मुदतवाढ

खासगी रूग्णालयांनी निश्चित शुल्कानुसारच आकारणी करावी

-     पालकमंत्री ॲड. यशोमती ठाकूर

 

         अमरावती, दि. 4:  कोरोना प्रतिबंधक उपाययोजनांच्या पार्श्वभूमीवर खासगी रूग्णालयांमधील शासनाने दर नियंत्रित करण्याच्या महत्वपूर्ण निर्णयाला राज्य शासनाने तीन महिन्यांची मुदतवाढ दिली आहे. सर्व खासगी, तसेच धर्मादाय आयुक्तांकडे नोंदणीकृत असलेल्या रूग्णालयांना हे आदेश लागू राहतील. या निर्णयामुळे उपचाराच्या दरावर नियंत्रण राहण्यास मदत होणार आहे, असे राज्याच्या महिला व बालविकास मंत्री तथा पालकमंत्री ॲड. यशोमती ठाकूर यांनी सांगितले.

 

           कोरोना प्रतिबंधक उपाययोजना सर्वदूर होत असताना खासगी रूग्णालयांतही उपचार उपलब्ध असावेत व जादा दर आकारले जाऊ नयेत, यासाठी राज्य शासनाने हा निर्णय घेतला आहे. आरोग्य विभागातर्फे तशी अधिसूचनाही जारी करण्यात आली आहे. मेस्मा, आपत्कालिन व्यवस्थापन कायदा, साथरोग नियंत्रण कायदा, बॉम्बे चॅरीटेबल ट्रस्ट आणि बॉम्बे नर्सींग होम कायद्यांमधील तरतुदींच्या अनुषगांने खासगी रुग्णालयांना राज्य शासनाने काढलेल्या आदेशाचे पालन करणे बंधनकारक आहे. त्यामुळे कोरोनाच्या रुग्णांना उपचाराच्या दरावर नियंत्रण राहणे शक्य होणार आहे.

 

त्याचप्रमाणे, कोरोनाच्या पार्श्वभूमीवर सर्वनागरिकांना महात्मा फुले  जनआरोग्य योजनेचा लाभ देण्याच्या निर्णयालाही महाविकास आघाडी शासनाने यापूर्वीच 31 ऑक्टोबरपर्यंत मुदतवाढ दिली आहे. त्यामुळे आता या योजनेच्या अंगीकृत असलेल्या सर्व रुग्णालयांमध्ये नागरिकांना उपचार घेता येणार आहेत, असेही पालकमंत्र्यांनी सांगितले.  

 

राज्य या शासनाच्या या आदेशानुसार खासगी रूग्णालयांना शासन निर्धारित दरानुसार रुग्णांवर उपचार करणे बंधनकारक आहे. रूग्णांसाठी खासगी रूग्णालयांत खाटा राखीव ठेवण्याची गरज पडल्यास त्याचे अधिकार महापालिका क्षेत्र वगळता जिल्हाधिकारी यांना, तर महापालिका क्षेत्रासाठी महापालिका आयुक्त यांना प्राधिकृत करण्यात आले आहे. राज्यस्तरावर राज्य आरोग्य हमी सोसायटीच्या मुख्य कार्यकारी अधिकाऱ्यांना हे अधिकार देण्यात आले आहेत. 

 

खासगी रूग्णालये कोरोनाच्या रूग्णांकडून मनमानी करत बिल आकारणी करत असल्याच्या तक्रारी प्राप्त होत होत्या. त्यामुळे शासन आदेशानुसार खासगी रुग्णालयांना या अधिसुचनेत जे दर निश्चित करून देण्यात आले आहेत त्याप्रमाणेच आकारणी करावी लागणार आहे.

 

     सुधारित अधिसूचनेमधील दरसूचित रुग्णाला वापरण्यात आलेल्या ऑक्सिजनचे दर देखील समाविष्ट करण्यात आले आहे. त्यामुळे रुग्णालयांना ऑक्सीजनपोटी स्वतंत्र रक्कम आकारता येणार नाही. पीपीई कीटच्या दरांबाबत देखील या अधिसूचनेमध्ये उल्लेख करण्यात आला असून सामान्य वॉर्डमध्ये पीपीई कीट वापरल्यास प्रति दिवस ६०० रुपये आकारले जातील तर अतिदक्षता आणि व्हेंटीलेटरची व्यवस्था असलेल्या ठिकाणी पीपीई कीट वापरासाठी प्रति दिवस १२०० रुपये इतके आकारले जातील. त्यापेक्षा जास्त दर आकारल्यास रुग्णालयांना कारणमीमांसा द्यावी लागणार आहे. रुग्णाला बिल देण्यापूर्वी ते नेमण्यात आलेल्या लेखा परिक्षकाकडून तपासूनच देण्यात यावे, असे निर्देश शासनाने जारी केले आहेत. रुग्णालयांकडून मनमानी पद्धतीने होणाऱ्या दर आकारणी बाबत तक्रार complaints.healthcharges@jeevandayee.gov.in  या ईमेलवर नागरिकांनी पाठवावी असे आवाहन करण्यात आले आहे. त्याचप्रमाणे, जिल्हाधिकारी, महापालिका आयुक्त आणि राज्य  आरोग्य सेवा सोसायटीचे मुख्य कार्यकारी अधिकारी सुधाकर शिंदे यांना तक्रार निवारणासाठी शासनाकडून  प्राधिकृत करण्यात आले आहे.

 

 

 

00000

 

आयटीआयच्या विद्यार्थ्यांना प्लेसमेंट कौशल्य विकासासह रोजगार निर्मितीवर भर - पालकमंत्री ॲड. यशोमती ठाकूर

 

आयटीआयच्या विद्यार्थ्यांना प्लेसमेंट

कौशल्यविकासासह रोजगारनिर्मितीवर भर

-   पालकमंत्री ॲड. यशोमती ठाकूर

 

अमरावती, दि. 3 : येथील औद्योगिक प्रशिक्षण संस्था, तसेच एमसीव्हीसी प्रशिक्षण घेतलेल्या 70 विद्यार्थी आपल्या नव्या नोकरीसाठी बसने औरंगाबादला नुकतेच रवाना झाले. नव्या प्रशिक्षणार्थींना शिकाऊ उमेदवार म्हणून प्लेसमेंट मिळवून देण्यासाठी खास उपक्रम हाती घेण्यात आला असून, त्यात एका हजारावर विद्यार्थ्यांची नोंदणी करण्यात आली आहे.  

 

युवकांमध्ये कौशल्य विकास व रोजगारनिर्मितीवर शासनाकडून भर देण्यात येत आहे. शिकाऊंना योग्य रोजगार मिळवून देण्यासाठी प्रशिक्षण संस्थांकडूनही उपक्रम राबवला जात आहे. त्याचप्रमाणे, कौशल्य विकास, रोजगार व उद्योजकता विभागातर्फेही ऑनलाईन मेळाव्याच्या माध्यमातून इच्छूकांना रोजगार मिळत आहे.  या मेळाव्यांमुळे विविध कंपन्यांनाही कुशल मनुष्यबळ उपलब्ध होत आहे. भरीव रोजगारनिर्मिती, कुशल मनुष्यबळ उपलब्धता यातून विकासाला गती देण्याचा शासनाचा प्रयत्न आहे, असे राज्याच्या महिला व बालविकास मंत्री तथा जिल्ह्याच्या पालकमंत्री ॲड. यशोमती ठाकूर यांनी आज सांगितले. औद्योगिक प्रशिक्षण संस्थेतर्फे प्रशिक्षणार्थींना शिकाऊ उमेदवार म्हणून प्लेसमेंट मिळवून देण्याच्या उपक्रमाला त्यांनी शुभेच्छाही दिल्या आहेत.

 

अमरावती जिल्ह्यामधून एमसीवीसी इलेक्ट्रिकल टेक्नॉलॉजी तसेच शासकीय आयटीआय महाविद्यालयामधील 70 विद्यार्थी औरंगाबाद येथील धूत ट्रान्समिशन या कंपनीमध्ये शिकाऊ उमेदवार म्हणून निवडण्यात आले. त्यात चाळीस मुली तसेच 30 मुलांचा सहभाग आहे. औरंगाबाद येथून आलेल्या धूत ट्रान्समिशनच्या दोन बसेसने शासकीय आयटीआय कॉलेज येथील हे प्रशिक्षणार्थी औरंगाबाद येथे जाण्याकरिता रवाना झाले.

 

या उपक्रमात एमसीव्हीसीच्या 467 विद्यार्थ्यांची तसेच आयटीआयच्या 627 विद्यार्थ्यांची नोंदणी करण्यात आली. लवकरच उर्वरित विद्यार्थीही औरंगाबादला रवाना होऊन आपल्या कामासाठी रूजू होतील, अशी माहिती जिल्ह्याचे व्यवसाय शिक्षण व प्रशिक्षण अधिकारी माननीय श्री  कमलाकर जी. विसाळे यांनी यावेळी दिली. त्यांच्या हस्ते सर्व विद्यार्थ्यांना गुलाब पुष्प देऊन शुभेच्छा देण्यात आल्या. औद्योगिक शिक्षण व प्रशिक्षण संस्थेच्या प्राचार्या मंगलाताई देशमुख, सुनील वानखडे साहेब यांच्यासह सर्व अधिकारी व कर्मचारी उपस्थित होते.जिल्हाधिकारी शैलेश नवाल यांनीही विद्यार्थी व स्टाफला उपक्रमासाठी शुभेच्छा दिल्या आहेत.या उपक्रमामुळे सर्व शिक्षकांमध्ये तसेच सर्व विद्यार्थ्यांमध्ये उत्साह व समाधान निर्माण झाले आहे.

 

त्याचप्रमाणे, कौशल्य विकास, उद्योजकता व रोजगार विभागातर्फे कुशल मनुष्यबळ विकास व रोजगारनिर्मितीसाठी  विविध कार्यक्रम हाती घेण्यात आले आहेत. कोरोनाच्या काळात अनेक जण रोजगारापासून वंचित झाले. त्यामुळे पुन्हा स्थिती पूर्ववत करण्यासाठी व कोरोनाच्या आव्हानावर मात करुन सर्वांना रोजगार मिळवून देण्यासाठी शासन व्यापक प्रयत्न करित आहे. त्याच उद्देशाने नोकरीसाठी इच्छूक  असलेले उमेदवार आणि उद्योजकांमध्ये सांगड घालण्यासाठी महास्वयंम आणि महाजॉब्ससारखी संकेतस्थळे सुरु करण्यात आली आहेत. ऑनलाईन रोजगार मेळावे घेण्यात येत आहेत.  उपक्रमात अधिकाधिक उद्योगांचा समावेश करून जिल्ह्यातील युवकांना रोजगार मिळवून द्यावा व ऑनलाईन मेळाव्यांत सातत्य ठेवावे, असे निर्देश पालकमंत्री श्रीमती ठाकूर यांनी दिले आहेत.              

 

00000

 

खादी उत्पादने विपणनासाठी संपूर्ण सहकार्य करणार - पालकमंत्री ॲड. यशोमती ठाकूर

 

खादी उत्पादने विपणनासाठी संपूर्ण सहकार्य करणार

-पालकमंत्री ॲड. यशोमती ठाकूर

 

पालकमंत्र्यांच्या हस्ते खादी महोत्सवाचे उद्घाटन

 

अमरावती, दि. २ : खादी ही देशाची संस्कृती आहे. स्वातंत्र्य लढ्यात अनन्यसाधारण महत्व असलेल्या खादीचा विकास होणे गरजेचे आहे. यासाठी खादीची उत्पादने विपणनासाठी संपूर्ण सहकार्य करण्यात येईल, असे आश्वासन पालकमंत्री ॲड. यशोमती ठाकूर यांनी दिले.

पालकमंत्री श्रीमती ठाकूर यांच्या हस्ते आज येथील एमआयडीसीतील सामुहिक सुविधा केंद्रात खादी महोत्सवाचे उद्घाटन करण्यात आले. यावेळी त्या बोलत होत्या. जिल्हाधिकारी शैलेश नवाल, जिल्हा खादी ग्रामोद्योग अधिकारी प्रदिप चेचेरे, जिल्हा उद्योग केंद्राचे महाव्यवस्थापक उदय पुरी, समितीच्या अध्यक्ष रूपाली खडसे, सचिव प्रणिता किडीले, उपाध्यक्ष कल्पना शेंडोकार, प्रकल्प व्यवस्थापक नेत्रदिप चौधरी आदी उपस्थित होते.

श्रीमती ठाकूर म्हणाल्या, खादीच्या विविध उत्पादनासोबतच विपणन क्षेत्रावर लक्ष देणे गरजेचे आहे. आरोग्य, पोलिस विभागासह विविध शासकीय कार्यालयात केल्या जाणाऱ्या खरेदीमध्ये खादीची उत्पादने खरेदीसाठी प्रयत्न होणे गरजेचे आहे. यासाठी राज्यपातळीवर खादीचे खरेदीदर निश्चित करण्यासाठी प्रयत्न करण्यात येतील. जेम पोर्टलवरून शासकीय कार्यालये साहित्य खरेदी करीत असल्यामुळे खादी समितीने या पोर्टलवर उत्पादनांच्या विक्रीची नोंदणी करावी, जेणेकरून या कार्यालयांना खरेदी करणे सुकर होईल. खादी प्रक्रिया उद्योगामध्ये प्रामुख्याने महिलांना रोजगार देण्यात आला आहे. त्यामुळे यातून महिला सक्षमीकरण होत असल्याचे श्रीमती ठाकूर यांनी सांगितले.

राष्ट्रपिता महात्मा गांधी यांच्या 150 व्या जयंतीनिमित्त कस्तुरबा सोलार खादी महिला समितीतर्फे 2 सप्टेंबर ते 2 ऑक्टोबर दरम्यान खादी महोत्सव आयोजित करण्यात आला आहे. या महोत्सवाचे उद्घाटन पालकमंत्री श्रीमती ठाकूर यांनी केले. सुरवातीला श्रीमती ठाकूर यांनी महात्मा गांधी यांच्या पुतळ्याला सुताचा हार अर्पण करून अभिवादन केले. त्यानंतर त्यांनी चरख्यावर सुतकताई केली. त्यांनी प्रकल्पस्थळी असलेल्या प्रदर्शन आणि प्रकल्पाची पाहणी केली. या महोत्सवादरम्यान प्रदर्शनात आधुनिक पद्धतीने तयार करण्यात आलेली उत्पादने विक्रीसाठी ठेवण्यात आली आहेत. यात प्रामुख्याने लेडीज शर्ट, साडी, कुर्ता, पैजामा, मास्क, टॉवेल्स, बेडशिट, खादी कुशन कव्हर आदी उत्पादने आहेत. अमरावती येथील जुना बाय पास, एमआयडीसी, ए-25 येथील सामुहीक सुविधा केंद्र येथे सुरू असलेल्या महोत्सवाला नागरिकांनी भेट देऊन खादीची उत्पादने विकत घ्यावीत, असे आवाहन समितीतर्फे करण्यात आले आहे.

 

 

पालकमंत्र्यांकडून तिवसा तालुक्यातील नुकसानग्रस्त भागाची पाहणी

 

पालकमंत्र्यांकडून तिवसा तालुक्यातील नुकसानग्रस्त भागाची पाहणी

पुनवर्सनाच्या कामांना गती देणार

-         पालकमंत्री ऍड. यशोमती ठाकूर

 

अमरावती, दि. 1 :  पूर येऊन बाधित होणाऱ्या परिसराचे पुनर्वसन होण्याच्या अनुषंगाने आवश्यक कार्यवाही गतीने करण्यात येईल, असे राज्याच्या महिला व बालविकास मंत्री तथा जिल्ह्याच्या पालकमंत्री ऍड. यशोमती ठाकूर यांनी आज तिवसा तालुक्यातील शिंदवाडी येथे सांगितले.

पालकमंत्री श्रीमती ठाकूर यांनी आज तिवसा तालुक्यातील नमस्कारी, शिंदवाडी, कौडण्यपूर, दुर्गवाडा आदी गावांना भेट देऊन पाहणी केली. जि. प. सभापती पूजाताई आमले, पं स सभापती शिल्पाताई हांडे, तिवसा येथील नगराध्यक्ष वैभव वानखेडे व विविध मान्यवर, अधिकारी आदी यावेळी उपस्थित होते.पालकमंत्री श्रीमती ठाकूर म्हणाल्या की,  बाधित परिसरातील पुनर्वसनासाठी प्रयत्न करण्यात येतील. नागरिकांना सर्व सुविधा मिळवून देण्यात येतील, असेही त्यांनी सांगितले.

नुकसानग्रस्त भागातील नागरिकांना न्याय मिळवून देण्यासाठी तत्काळ पाहणी व पंचनामे करावे. त्याचप्रमाणे, नादुरुस्त रस्त्यांची तात्काळ सुधारणा करावी. नमस्कारी या गावाचा संपर्क तुटू नये, म्हणून रस्ते दुरुस्तीसह पूल उभारण्यासाठी पावले उचलावीत, असे निर्देश त्यांनी दिले. 

तालुक्यात पांदणरस्त्यांची कामे प्राधान्याने राबविण्यात येतील. त्यादृष्टीने कामांची आवश्यकता व लक्षात घेऊन प्रशासनाने नियोजन करावे, असे निर्देश त्यांनी यावेळी दिले.

00000

तिवसा येथे वनउद्यानाच्या कामास सुरुवात आनंदवाडीत आदर्श वनोद्यानाची निर्मिती व्हावी - पालकमंत्री ऍड. यशोमती ठाकूर

 

तिवसा येथे वनउद्यानाच्या कामास सुरुवात

आनंदवाडीत आदर्श वनोद्यानाची निर्मिती व्हावी

- पालकमंत्री ऍड. यशोमती ठाकूर

 

अमरावती, दि. 1 : तिवसा येथील आनंदवाडीत वन उद्यानाच्या कामाला सुरुवात झाली असून येथे सुंदर व आदर्श वनोद्यान उभे राहावे, असे निर्देश राज्याच्या महिला व बालविकास मंत्री तथा जिल्ह्याच्या पालकमंत्री ऍड. यशोमती ठाकूर यांनी आज तिवसा येथे दिले.

आनंदवाडी (तिवसा) येथील वनोद्यानाच्या कामाला पालकमंत्री श्रीमती ठाकूर यांच्या उपस्थितीत सुरुवात आज झाली.  तिवसा येथील नगराध्यक्ष वैभव वानखडे,जि प सभापती पूजा आमले, प स सभापती शिल्पा हांडे, उपसभापती शरद वानखडे,प.स सदस्य रोशनी पुनसे, निलेश खुळे,अब्दुल सत्तार,न प उपाध्यक्ष संध्या मुंदाणे, अतुल देशमुख,योगेश वानखडे, दिवाकर भुरभुरे,संध्या पखाले, मुकूंद देशमुख,दिलिप काळबांडे, संजय देशमुख, तहसीलदार वैभव फरतारे, मुख्याधीकारी पल्लवी सोटे, कार्यकारी अभियंता श्रीमती वैद्य , वनविभागाचे सूरकते व नागरिक यावेळी उपस्थित होते.

आनंदवाडी येथे वन विभागाची जागा असून सार्वजनिक बांधकाम विभागातर्फे १ हजार ६७० मीटरचे कुंपण उभारण्याच्या कामाला सुरुवात झाली आहे. 

वनविभागाकडून येथे निसर्ग पर्यटन केंद्र उभारले जाणार आहे. येथे सुंदर व आदर्श वनोद्यान उभे राहण्यासाठी नियोजनपूर्वक कामे करावी. विविध प्रजातींची वृक्षसंपदा व विविध सुविधायुक्त असे एक आदर्श वनोद्यान तिवसानगरीत उभे राहावे, अशी अपेक्षा पालकमंत्री श्रीमती ठाकूर यांनी व्यक्त केली.

राज्य शासनाकडून  वृक्ष लागवड व पर्यावरण संरक्षणबाबत जागृती व्हावी म्हणून शाळा रोपवाटिका योजना राबविण्यात येणार आहे.त्याचप्रमाणे, नगर वन उद्यान योजनेद्वारे शहरातील नागरिकांमध्ये वन व जंगलाबाबत जागृती निर्माण होण्यास मदत होणार आहे.

 

पालकमंत्री यांच्या पाठपुराव्याने तिवसा येथे विविध विकासकामे

 

तिवसा येथील विकासकामांबाबत स्वतंत्र बैठक मुंबईत वनमंत्री संजय राठोड यांच्या दालनात

झाली होती. पालकमंत्री श्रीमती ठाकूर यांच्यासह वनखात्याचे सचिव , मुख्य वनसंरक्षक, नगराध्यक्ष वैभव स वानखडे, न प मुख्याधिकारी आदी त्यावेळी उपस्थित होते.यावेळी पालकमंत्री यांच्या मागणीनुसार तिवसा न प क्षेत्रातील वनजमिनीवरील श्री ऋषि महाराज मंदिर टेकडी सभागृह , शेख फरीद बाबा टेकडी, परिसर विकास साठी निधी सहाय्य योजनेतून निधी उपलब्ध करून देण्यात आला.

याच धर्तीवर आनंदवाडी येथील जिल्हा नियोजन समिती मार्फत मंजूर डीपी व पोलचे काम सुद्धा पूर्ण झाले. तिवसा येथे वनउद्यान व संरक्षक भिंतीच्या कामाला  मंजुरी वन खात्याकडून देण्यात आली. त्यानुसार हे काम आज सुरू झाले.

00000

पालकमंत्र्यांकडून मोर्शी तालुक्यात शेतीच्या नुकसानाची पाहणी

 

पालकमंत्र्यांकडून मोर्शी तालुक्यात शेतीच्या नुकसानाची पाहणी

नुकसानग्रस्त शेतकरी बांधवांना न्याय मिळवून द्यावा

सविस्तर व परिपूर्ण पंचनामे करा

- पालकमंत्री ऍड. यशोमती ठाकूर

 

 

अमरावती, दि. 1 : अतिवृष्टीमुळे शेतीचे नुकसान होऊन शेतकरी बांधव अडचणीत सापडला आहे. त्यांना अधिकाधिक मदत मिळावी यासाठी सविस्तर पाहणी करून परिपूर्ण पंचनामे करावे व शेतकरी बांधवाना न्याय मिळवून द्यावा, असे निर्देश राज्याच्या महिला व बालविकास मंत्री तथा जिल्ह्याच्या पालकमंत्री ऍड. यशोमती ठाकूर यांनी आज दिले.

 

अतिवृष्टीने आलेल्या पुरामुळे नदीकाठच्या गावात शेतीचे मोठे नुकसान झाले. पालकमंत्री श्रीमती ठाकूर यांनी आज मोर्शी तालुक्यातील राजूरवाडी, निंभारणी, लेहगाव येथे भेट देऊन शेतीची पाहणी केली, तसेच गावकरी बांधवांशी संवाद साधून त्यांच्या अडचणी जाणून घेतल्या. उपविभागीय अधिकारी नितीनकुमार हिंगोले, मोर्शीचे तहसीलदार सिध्दार्थ मोरे,

तालुका कृषी अधिकारी कल्पना राठोड, अभिजित मानकर, रमेश काळे, श्याम सोमवंशी आदी यावेळी उपस्थित होते.

 

पालकमंत्री श्रीमती ठाकूर म्हणाल्या की, अतिवृष्टीने नदीकाठच्या गावांतील शेतीत पुराचे पाणी घुसून नुकसान झाले. नैसर्गिक संकटात सापडलेल्या शेतकरी बांधवाना न्याय मिळवून देण्यासाठी महाविकास आघाडी शासन खंबीरपणे शेतकरी बांधवांच्या पाठीशी उभे आहे. प्रशासनाने काटेकोरपणे पाहणी करून सर्व नुकसानाच्या सविस्तर नोंदी घेऊन परिपूर्ण पंचनामे करावेत, असे निर्देश पालकमंत्री श्रीमती ठाकूर यांनी  दिले.

पालकमंत्री श्रीमती ठाकूर पुढे म्हणाल्या की, यंदा कोरोनाच्या प्रादुर्भावामुळे अनेक अडचणी आल्या. कोरोनावर मात करण्यासाठी विविध प्रयत्न होत आहेत. मात्र, नागरिकांनीही आपली जबाबदारी  ओळखून दक्षता घ्यावी.

 

नागरिकांनी मास्कचा वापर, स्वच्छता व सोशल डिस्टन्स या त्रिसूत्रीचा अवलंब करावा, असे आवाहनही त्यांनी केले.यावेळी पालकमंत्री श्रीमती ठाकूर यांनी निंभारणी येथील अंगणवाडीला भेट देऊन पाहणी केली व विविध कामकाजाची माहिती घेतली.

 

00000