DIO NEWS AMRAVATI 06.12.2024

 आयटीआयमध्ये सोमवारी शिकाऊ उमेदवारी भरती मेळवा

        अमरावती, दि. 6 (जिमाका) : अमरावती येथील शासकीय औद्योगिक प्रशिक्षण संस्थेत सोमवार, दि. 9 डिसेंबर रोजी सकाळी 10 वाजता प्रधानमंत्री राष्ट्रीय शिकाऊ उमेदवारी भरती मेळावा आयोजित करण्यात आला आहे.

भरती मेळाव्यात जॉन डिरे इंडिया प्रायव्हेट लिमिटेट, पुणे तसेच जिल्ह्यातील स्थानिक कंपनीचे प्रतिनिधी उपस्थित राहणार आहेत. या भरती मेळाव्यासाठी आयटीआय आर्किटेक्चर, ड्राफ्टस्मन, सिविल ड्राफ्टस्‍मन, मेकॅनिक ड्राफ्टस्मन, फिटर, वायरमन, टर्नर, मशिनिस्ट, वेल्डर, इलेक्ट्रिशियन, कारपेंटर, इलेक्ट्रॉनिक्स, अकाऊटंट, सुइंग टेक्नॉलॉजी, ड्रेस मेकिंग, फॅशन टेक्नॉलॉजी, कोपा, ट्रॅक्टर मेकॅनिक, डिझेल मेकॅनिक आणि मोटर मेकॅनिक व्यवसाय उत्तीर्ण उमेदवारांनी सहभागी व्हावे. प्रशिक्षणार्थ्यांनी बायोडाटा आणि मूळ कागदपत्राच्या झेरॉक्स प्रती सोबत आणणे आवश्यक आहे. या संधीचा लाभ घ्यावा, असे आवाहन उपसंचालक, औद्योगिक प्रशिक्षण संस्थेचे सहायक प्रशिक्षणार्थी सल्लागार यांनी केले आहे.

00000

महापरिनिर्वाण दिनानिमित्त अभिवादन

अमरावती, दि. 6 (जिमाका) : नेहरू युवा केंद्रातर्फे मातोश्री विमलाबाई देशमुख महाविद्यालयात डॉ. बाबासाहेब आंबेडकर महापरिनिर्वाण दिनानिमित्त अभिवादन करण्यात आले.

प्राचार्य डॉ. स्मिता देशमुख अध्यक्षस्थानी होत्या. प्रमुख पाहुणे म्हणून जिल्हा युवा अधिकारी स्नेहल बासुतकर, प्रा. डॉ देविदास बांबोळे, प्रा. जनार्दन सांगोळे, प्रा. डॉ. मंदा नांदूरकर आदी उपस्थित होते. डॉ. सतीश तराळ यांनी यावेळी मार्गदर्शन केले. प्रा. रूपाली तळेगावकर यांनी सूत्रसंचालन केले.

00000

मृद चाचणी प्रयोगशाळेतील कर्मचाऱ्यांचा सन्मान

अमरावती, दि. 9 (जिमाका): जागतिक मृदा दिनी कै. वसंतराव नाईक शेती स्वावलंबन मिशनचे अध्यक्ष ॲड. निलेश हेलोंडे पाटील यांच्या हस्ते जिल्हा मृद सर्वेक्षण मृद चाचणी प्रयोगशाळतील कर्मचाऱ्यांचा सन्मान करण्यात आला.

आपल्या दैनंदिन जीवनात मृदा महत्त्वाची आहे आपल्याला मातीचे महत्व सांगण्यासाठी व मातीच्या गुणवत्तेची जाणीव करून देण्यासाठी दरवर्षी 5 डिसेंबर रोजी जागतिक मृदा दिन साजरा केला जातो. परंतु माती वाचवण्याची गरज का आहे हे देखील महत्त्वाचे असते. प्रदूषण व कीटकनाशकाच्या अतिवापरामुळे दरवर्षी मातीची गुणवत्ता ही कमी होत आहे. त्याकरिता माती परीक्षण करणे गरजेचे आहे. त्या अनुषंगाने अँड. निलेश हेलोंडे पाटील यांनी जिल्हा मृदा सर्वेक्षण मृद चाचणी प्रयोगशाळा अमरावती येथे प्रत्यक्ष माती परीक्षण याबाबत माहिती घेऊन प्रयोग शाळेमध्ये कर्मचाऱ्याचा सन्मान केला.

यावेळी विभागीय कृषी सहसंचालक प्रमोद लहाले, विभागीय अधिक्षक डॉ. प्रशांत नाईक, जिल्हाधिक्षक कृषी अधिकारी राहुल सातपुते, उपविभागीय कृषी अधिकारी प्रफुल्ल सातव, कृषी पर्यवेक्षक भास्कर भंकाळे,  कृषी सहायक वृषाली पाटील, कल्पना ढोके, कांचन बोंडे, जनसंपर्क अधिकारी प्रमोद कापडे उपस्थित होते.

00000

उमेश रमेश नाईक यांनी हजर होण्याचे आवाहन

अमरावती, दि. 9 (जिमाका): जिल्हा महिला व बाल विकास अधिकारी कार्यालय, अमरावती यांचे अधिनस्त अधिक्षक शासकीय मुलांचे अनुरक्षणगृह, वरिष्ठ बालगृह, अमरावती संस्थेत स्वयंपाकी पदावर उमेश रमेश नाईक हे काम करीत होते. उमेश रमेश नाईक यांनी स्वयंपाकी पदावर कार्यरत असताना कर्तव्यात कसूर केल्याबाबत त्यांच्यावर दोषारोप लावण्यात आले आहे. त्यानुसार त्यांना हजर होण्याचे आवाहन करण्यात आले आहे.

उमेश रमेश नाईक स्वयंपाकी यांनी म्हणणे मांडणे कामी त्यांचेकडे असलेल्या आवश्यक पुरावे, कागदपत्रासह त्यांना दि. 29 ऑक्टोबर, दि. 6 नोव्हेंबर, दि. 14 नोव्हेंबर, व दि. 28 नोव्हेंबर 2024 रोजी जिल्हा महिला व बालविकास अधिकारी कार्यालय, महिला व बाल विकास भवन, राणी दुर्गवती चौक, कॅम्प रोड, अमरावती येथे हजर राहण्यासाठी कळविण्यात आले आहे. परंतू उपरोक्त दिनांकास ते गैरहजर राहिले आहेत. त्यामुळे त्यांचे म्हणणे या कार्यालयासमोर आलेले नाही.

त्यांचे म्हणणे मांडणे कामी असलेल्या आवश्यक पुरावे, कागदपत्रासह आठ दिवसाचे आत न चुकता हजर राहावे. ही अंतिम संधी देण्यात येत आहे. सदर कालावधीत म्हणणे आवश्यक कागदपत्र व पुराव्यासह हजर न झाल्यास आपले काहीही म्हणणे नाही असे गृहित धरून श्री नाईक यांच्या प्रकरणावर पुढील कार्यवाही करण्यात येणार आहे. याची गांर्भीयाने नोंद घेण्यात यावी, असे जिल्हा महिला व बाल विकास अधिकारी यांनी कळविले आहे.

0000

 

DIO NEWS AMRAVATI 05.12.2024

 

निम्न पेढी प्रकल्पाच्या पूनर्वसनाला गती द्यावी

-जिल्हाधिकारी सौरभ कटियार

अमरावती, दि. 5 (जिमाका) : निम्न पेढी प्रकल्प राज्याचा प्राधान्याचा प्रकल्प आहे. त्यामुळे या प्रकल्पात बाधीत गावांचे तातडीने पूनर्वसन करण्यासाठी पावले उचलण्यात यावी. तसेच पूनर्वसनासाठी जागा उपलब्ध करून देण्यात आलेल्या गावातील शासकीय सेवा पूनर्वसीत गावात स्थलांतरीत करून सुरू कराव्यात, अशा सूचना जिल्हाधिकारी सौरभ कटियार यांनी दिल्या.

जिल्हाधिकारी कार्यालयात निम्नपेढी प्रकल्पाचा आढावा घेण्यात आला. यावेळी उपजिल्हाधिकारी अमर राऊत, निवासी उपजिल्हाधिकारी अनिल भटकर आदी उपस्थित होते.

श्री. कटियार यांनी, प्रकल्पाचे काम सुरू करण्यासाठी बाधीत गावातील नागरिकांचे स्थलांतर होणे आवश्यक आहे. पूनर्वसित गावात सोयी-सुविधा उपलब्ध करून द्याव्यात, प्रामुख्याने पिण्याच्या पाण्याची सोय प्राधान्याने करण्यात यावी. नागरिकांनी स्थलांतरीत होण्यासाठी यंत्रणांनी लक्ष केंद्रीत करावे. तसेच याठिकाणी असलेल्या सार्वजनिक सेवा स्थलांतरीत करून नवीन गावात सुरू कराव्यात.

प्रकल्पाला गती येण्यासाठी तातडीने नोटीस प्रसिद्ध करण्यात यावी. तसेच नवीन गावात ग्रामसभा घेण्यासाठी सूचना देण्यात याव्यात. स्थलांतरणासाठी मार्चपर्यंतची मुदत देण्यात यावी. दोन गावांच्या पूनर्वसनासाठी खासगी जागेचे भूसंपादन करणे आवश्यक आहे. यासाठी तातडीने कार्यवाही करण्यात यावी. यात जागेची निश्चित होऊन ग्रामसभेत ठराव घेण्यात यावा, अशा सूचनाही त्यांनी यावेळी दिल्या.

000000

कृषी निविष्ठा विक्रेत्यांसाठी प्रशिक्षणाचे आयोजन

*31 डिसेंबरपर्यंत अर्ज करण्यासाठी मुदत

            अमरावती, दि. 5 (जिमाका) : जिल्ह्यातील कृषी निविष्ठा विक्रेत्यांसाठी डेसी (डिप्लोमा इन ॲग्रीकल्चर एक्सटेंशन सर्व्हीसेस फॉर इनपूट डिलर्स) हा एक वर्ष कालावधीच्या प्रशिक्षण वर्गाचे आयोजन करण्यात आले आहे. यासाठी इच्छुकांना दि. 31 डिसेंबरपर्यंत अर्ज करता येणार आहे.

सदर प्रशिक्षण प्राचार्य, प्रादेशिक कृषी विस्तार व्यवस्थापन प्रशिक्षण संस्था, रामेती, अमरावतीमार्फत चालविण्यात येणार आहे. प्रवेशासाठी पात्रता कमीतकमी दहावी उत्तीर्ण असणे आवश्यक आहे. इच्छुकांना दहावी किंवा बारावी पासचे प्रमाणपत्र आणि गुणपत्रिका, आधार कार्ड, चार पासपोर्ट आकाराचे छायाचित्रे, कृषी निविष्ठा विक्रीचा परवाना असल्यास परवान्याची छायांकित प्रत आदी कागदपत्रे प्रवेशासाठी आवश्यक आहेत. प्रशिक्षण वर्गासाठी नव्याने परवाना काढू इच्छिणाऱ्या प्रवेश पात्र उमेदवारासाठी प्रवेश शुल्क 20 हजार रुपये आहे. तसेच कृषी निविष्ठा परवाना असलेल्या प्रवेश पात्र विक्रेत्यांसाठी प्रवेश शुल्क 10 हजार रूपये राहणार आहे. प्रवेश अर्जासाठी प्रकल्प संचालक, आत्मा कार्यालय, विसावा कॉलनी, जुना बायपास रोड, अमरावती येथे संपर्क करावा. उमेदवारांनी दोन प्रतीत अर्ज सादर करणे आवश्यक आहे. तसेच प्रवेश अर्ज www.manage.gov.in या वेबसाईटवरही उपलब्ध आहे.

नव्याने कृषी निविष्ठा परवाना काढु इच्छिणाऱ्या प्रवेश पात्र उमेदवार, तसेच परवाना असलेले पात्र उमेदवारांनी दि. 31 डिसेंबरपर्यंत अर्ज करावे, असे आवाहन आत्माच्या प्रकल्प संचालक अर्चना निस्ताने यांनी केले आहे.

00000

मत्स्यव्यवसायीकांनी नोंदणी करण्याचे आवाहन

अमरावती, दि. 05 (जिमाका) : नॅशनल फिशरीज डिजिटल प्लॅटफॉर्मवर वैयक्तिक, मत्स्यव्यवसाय संबंधित व्यक्ती, मासेमार सहकारी संस्था, फर्म नोंदणी करावी, असे आवाहन करण्यात आले आहे.

मत्स्य व्यावसायिकांनी नोंदणी केल्यास सरकारी योजना आणि इतर मत्स्य व्यवसायाच्या संधी उपलब्ध होणार आहे, यामुळे मच्छीमार आणि मत्स्यपालक शेतकरी, मत्स्य व्यवसायातील पारंपारिक मासेमारांचे जीवनमान उंचावण्यास मदत होणार आहे.

            एनएफडीपीवर नोंदणी केल्याने मत्स्यपालन विकासासाठी सरकारी योजना आणि अनुदाने मिळणे सोयीस्कर होईल. सरकारी योजनेमध्ये सहभाग घेता येईल. नोंदणीकृत वापरकर्त्यांना सर्वोत्तम पद्धतीने आणि नवीन मत्स्य व्यवसाय तंत्रज्ञानाबद्दल अद्ययावत माहिती आणि इशारा प्राप्त होईल. नोंदणीकृत वापर करते देशभरातील व्यावसायिक आणि इतर मच्छीमारांच्या नेटवर्कशी जुळू शकतील. पोर्टलवर मच्छिमार, मत्स्य पालक आणि इतर भागधारकांची डिजिटल नोंदणी तयार होईल, ज्यामुळे सेवा आणि आर्थिक लाभ मिळणे सोपे होईल.

माशांचे उत्पादन, संसाधनाची उपलब्धता, बाजारपेठेतील कल आणि इतर महत्त्वाच्या माहितीवरील वास्तविक डेटा वेळेत संकलित होऊन त्या अनुषंगाने योजनेची आखणी करता येऊ शकेल. मत्स्यव्यवसाय संबंधित घटकासाठी नवीन विकासाची उभारणी करण्यास मदत होईल. एका क्षेत्राखाली म्हणून जिल्ह्यातील सर्व मत्स्यकास्तकार, मत्स्य शेतकरी, मत्स्य विक्रेते, मत्स्यफर्म, मत्स्य कंपनी, मत्स्यव्यवसाय सहकारी संस्था, मत्स्य शेतकरी उत्पादक संस्था तसेच त्यांचे सर्व सभासदांनी एनफडीपी पोर्टलवर नाव नोंदणी वैयक्तिक किंवा संस्थेतर्फे करावी, असे आवाहन मत्स्यव्यवसायचे सहायक आयुक्त एम. एम. मेश्राम यांनी केले आहे.

0000

 

दहावी, बारावीचे अंतिम वेळापत्रक जाहिर

अमरावती, दि. 05 (जिमाका): महाराष्ट्र राज्य माध्यमिक व उच्च माध्यमिक शिक्षण मंडळातर्फै दहावी आणि बारावीच्या परिक्षांचे अंतिम वेळापत्रक जाहिर केले आहे.

उच्च माध्यमिक प्रमाणपत्र इयत्ता बारावी परीक्षा सर्वसाधारण, द्विलक्षी व व्यवसाय अभ्यासक्रम, तसेच माहिती तंत्रज्ञान व सामान्यज्ञान विषयांची ऑनलाईन परीक्षा मंगळवार, दि. 11 फेब्रुवारी, 2025 ते दि. 18 मार्च 2025, प्रात्यक्षिक, श्रेणी, तोंडी व अंतर्गत मूल्यमापन तसेच एनएसक्यूएफ अंतर्गत व्यावसायिक अभ्याक्रम प्रात्यक्षिक परीक्षा शुक्रवार, दि. 24 जानेवारी 2025 ते सोमवार, दि. 10 फेब्रुवारी 2025, माध्यमिक शालन्त प्रमाणपत्र इयत्ता दहावी परीक्षा शुक्रवार, दि. 21 फेब्रुवारी, 2025 ते सोमवार, दि. 17 मार्च, 2025, प्रात्यक्षिक श्रेणी, तोंडी परीक्षा व अंतर्गत मूल्यमापन परीक्षा सोमवार, दि. 3 फेब्रुवारी, 2025 ते गुरूवार, दि. 20 फेब्रुवारी, 2025 या कालावधीमध्ये आयोजित केली आहे.

परीक्षेचे सविस्तर वेळापत्रक मंडळाच्या mahahsscboard.in या संकेतस्थळावर उपलब्ध आहे. मंडळाच्या संकेतस्थळावरील वेळापत्रकांची सुविधा केवळ माहितीसाठी आहे. परीक्षेपूर्वी माध्यमिक शाळा, उच्च माध्यमिक शाळा, कनिष्ठ महाविद्यालय यांच्याकडे छापील स्वरूपात देण्यात येणारे वेळापत्रक अंतिम राहणार आहे. सदर छापील वेळापत्रकावरूनच परीक्षेच्या तारखाची खात्री करून विद्यार्थ्यांनी परीक्षेस प्रविष्ट व्हावे. अन्य संकेतस्थळावरील किंवा अन्य यंत्रणेने छपाई केलेले तसेच व्हॉट्सॲप किंवा तत्सम माध्यमातून व्हायरल झालेले वेळापत्रक ग्राह्य धरू नये, याबाबत संबंधितांनी नोंद घ्यावी, असे माध्यमिक शिक्षणाधिकारी प्रिया देशमुख यांनी कळविले आहे.

0000

सोमवारपासून राष्ट्रीय शालेय कब्बडी स्पर्धा

अमरावती, दि. 5 (जिमाका) : जिल्हा क्रीडा अधिकारी कार्यालयातर्फे 14 वर्षाखालील मुला-मुलींची 68वी राष्ट्रीय शालेय क्रीडा स्पर्धा आयोजित करण्यात आली आहे. सोमवार, दि. 9 ते दि. 12 डिसेंबरपर्यंत या क्रीडास्पर्धा विभागीय क्रीडा संकुलातील इनडोअर हॉलमध्ये चालणार आहे, असे जिल्हा क्रीडा अधिकारी गणेश जाधव यांनी कळविले आहे.

000000

जिल्हास्तरीय युवा महोत्सवाचा उत्साहात समारोप

अमरावती, दि. 5 (जिमाका): जिल्हा क्रीडा अधिकारी कार्यालय, नेहरू युवा केंद्र, राष्ट्रीय सेवा योजना व श्री शिवाजी शिक्षण संस्था यांच्यातर्फे आयोजित जिल्हास्तरीय युवा महोत्सव श्रीमती विमलाबाई देशमुख सभागृहात उत्साहात पार पडला.

क्रीडा उपसंचालक विजय संतान अध्यक्षस्थानी होते. पंडीतजी पंडागडे, प्रा. पंकज नागपूरे, प्राचार्य गजानन कोरपे, प्रमोद गावंडे, जिल्हा युवा अधिकारी स्नेहल बासुतकर, जिल्हा क्रीडा अधिकारी गणेश जाधव प्रमुख पाहुणे म्हणून उपस्थित होते.

            युवा महोत्सवांतर्गत ‘विज्ञान व तंत्रज्ञान यामधील नव संकल्पना’ स्पर्धेचे उद्घाटन उद्यान विज्ञान महाविद्यालयातील सायन्स सेंटर येथे झाले. या स्पर्धेमध्ये वैयक्तिक गटात प्रथम क्रमांक संकेत कोरडे, द्वितीय क्रमांक आभा बंड, तृतीय क्रमांक अर्पिता जिचकार आणि विज्ञान व तंत्रज्ञान यामधील नव संकल्पना स्पर्धेमध्ये सामुहिक गटात प्रथम क्रमांक वैभवी जगताप, नचिकेत यावले, द्वितीय क्रमांक गायत्री सरदार आणि वैष्णवी ठाकरे, तृतीय क्रमांक सिद्धी ठाकूर आणि तनिषा तायडे यांनी पटकविला. स्पर्धेचे परिक्षक म्हणून डॉ. स्वप्नील अरसड, डॉ. श्रीकांत वडाळ, डॉ. सौरभ पवनीकर यांनी काम पाहले. मंजित मेश्राम, शिशीर मेश्राम यांनी सूत्रसंचालन केले. स्नेहल बासुतकर यांनी आभार मानले.

00000

DIO NEWS AMRAVATI 04.12.2024

 

निरोगी बालकांसाठी जंतनाशक मोहिम यशस्वी करावी

-जिल्हाधिकारी सौरभ कटियार

*नांदगाव पेठ येथे जंतनाशक मोहिमेला सुरवात

अमरावती, दि. 4 : बालकांच्या सुदृढ आणि निरोगी आयुष्यासाठी राष्ट्रीय जंतनाशक मोहिम राबविण्यात येत आहे. यात सर्व बालकांनी सहभागी होऊन गोळी घ्यावी. तसेच आरोग्य, महिला व बालविकास, आशासेविकांनी घरोघरी पोहोचून जंतनाशक मोहिम यशस्वी करावी, असे आवाहन जिल्हाधिकारी सौरभ कटियार यांनी केले.

जंतनाशक मोहिमेची सुरवात नांदगाव पेठ येथील सरस्वती गोसावी विद्यामंदिर आश्रमशाळेतून करण्यात आली. यावेळी नांदगाव पेठच्या सरपंच कविता डांगे, संस्थेचे उपाध्यक्ष सतिश पुरी, सचिव विनोद गोसावी,  जिल्हा आरोग्य अधिकारी डॉ. सुरेश असोले, अतिरिक्त जिल्हा आरोग्य अधिकारी डॉ. प्रविण पारिसे, जिल्हा साथ रोग अधिकारी डॉ. अली, जिल्हा आयुष अधिकारी डॉ. पल्लवी आगरकर, तालुका अधिकारी डॉ. सुर्यवंशी, शिक्षणाधिकारी अरविंद मोहरे, प्राचार्य श्रावण पवार, ग्रामपंचायत सदस्य वृशाली इंगळे, आदी उपस्थित होते.

श्री. कटियार यांनी, बालकांच्या आरोग्याच्या दृष्टीने ही महत्वाची मोहिम आहे. जिल्ह्यात पाच लाखाहून अधिक बालकांना जंतनाशकाची गोळी देण्यात येणार आहे. या मोहिमेचा चांगला फायदा होणार आहे. बालकांची वाढ थांबलेली असल्यास यामुळे दूर करता येणार आहे. यात पालक, ग्रामपंचायत मोलाची भूमिका बजावू शकत असल्याने त्‍यांनी जनजागृती करावी. तसेच शाळा, अंगणवाडी यांनी बालकांना गोळी उपलब्ध करून द्यावी. या मोहिमेत एकही बालक वंचित राहू नये याची काळजी घ्यावी, असे सांगितले.

डॉ. असोले यांनी प्रास्ताविकातून गोळी घेण्याचे महत्व सांगतिले. वर्षातून दोन वेळा ही मोहिम राबविण्यात येते. याचा बालकांनी लाभ घ्यावा, तसेच हात धुण्याची सवय बाळगण्याचे आवाहन केले. यावेळी उपस्थित मान्यवरांच्या हस्ते शाळेतील बालकांना गोळी देऊन मोहिमेला सुरवात करण्यात आली. निलेश दळवी यांनी सूत्रसंचालन केले. एस. एस. पवार यांनी आभार मानले.

000000

ध्वजनिधी संकलनाला सुरवात

        अमरावती, दि. 04 (जिमाका):  जिल्ह्यातील ध्वजनिधी संकलनाला सोमवार, दि. 16 डिसेंबर रोजी सकाळी 10.30 वाजता सुरवात होणार आहे. जिल्हाधिकारी कार्यालयातील नियोजन भवनात ध्वजनिधी संकलन व माजी सैनिकांचा मेळावा होणार आहे. यावेळी माजी सैनिक, विधवा यांनी परिवारासह उपस्थित राहावे. असे आवाहन जिल्हा सैनिक कल्याण अधिकारी यांनी केले आहे.   

DIO NEWS AMRAVATI 03.12.2024

 

कारागृहातील बंद्यांसाठी आध्यात्मिक प्रवचन

अमरावती, दि. 03 (जिमाका) : सकल जैन समाज संस्था आणि श्री महाकाली माता शक्तीपीठ यांच्यातर्फे अमरावती येथील मध्यवर्ती कारागृहात आध्यात्मिक प्रवचन सोमवार, दि. 2 डिसेंबर रोजी पार पडले.

अपर पोलीस महासंचालक, कारागृह व सुधारसेवा प्रशांत बुरडे आणि कारागृह उपमहानिरीक्षक कारागृह व सुधारसेवा स्वाती साठे यांच्या मार्गदर्शनाखाली सदर कार्यक्रम घेण्यात आला.

सकल जैन समाज संस्थेचे सचिव अभिनंदन पेंढारी यांनी संस्थेचा अल्प परिचय करुन दिला. विविक्त श्री माताजी यांच्या आध्यात्मिक कार्याविषयी माहिती दिली. विविक्त श्री माताजी यांनी बंद्यांनी आहार, आचरण, विचाराबाबत मार्गदर्शन केले. महाकाली शक्तीपीठाचे शक्तीजी महाराज यांनी कारागृहातून सुटल्यानंतर स्वत:चा रोजगार करुन अनिष्ठ व्यक्ती आणि व्यसनांपासून दूर राहण्याचे आवाहन केले. कारागृह अधीक्षक किर्ती चिंतामणी यांनी आध्यात्मिक विचार आचरणात आणून वाईट प्रवृत्तीपासून दूर राहण्याचे सांगितले. कारागृहातील 270 बंद्यांनी यात सहभाग घेऊन सकारात्मक प्रतिसाद दिला. 

कार्यक्रमाचे आयोजन ललित मुंडे, संजय घोलप यांनी केले. कार्यक्रमासाठी शक्तीजी महाराज यांनी सकारात्मक प्रतिसाद दिला. यावेळी तुरुंगाधिकारी शामराव गिते,  कारागृह शिक्षक मिलींद बनसोड, संजय घोलप व ललित मुंडे, सुभेदार गोपाल कचरे, श्रीकृष्ण लांजेवार उपस्थित होते. 

00000

DIO NEWS AMRAVATI 02.12.2024

 नामांकित शिक्षण संस्थेतील शिष्यवृत्तीसाठी अर्ज करण्याची मुदतवाढ

            अमरावती, दि. 02 (जिमाका) : देशातील नामांकित शैक्षणिक संस्थामध्ये उच्च शिक्षण घेण्यासाठी अनुसूचित जातीच्या विद्यार्थ्यांना राजर्षी शाहू महाराज शिष्यवृत्ती योजना राबविण्यात येते. पात्र इच्छुकांकडून सन 2024-25 या वर्षासाठी अर्ज करण्यास 31 डिसेंबरपर्यंत मुदतवाढ देण्यात आली आहे.

            शैक्षणिक संस्थामधील सन 2024-25 मधील प्रवेश प्रक्रीया अद्याप पूर्ण झाली नाही. परिपूर्ण अर्ज आणि आवश्यक कागदपत्रासह दि. 31 डिसेंबर 2024 रोजी सायंकाळी 6.15 वाजेपर्यंत पोस्ट किंवा समक्ष समाज कल्याण आयुक्तालय, 3 चर्च रोड, पुणे-411001 येथे सादर करावे लागणार आहे. अर्जाचा नमुना आणि अधिक माहितीसाठी maharashtra.gov.in या संकेतस्थळाला भेट द्यावी, असे आवाहन समाज कल्याणचे सहायक आयुक्त राजेंद्र जाधवर यांनी केले आहे.

00000

फलोत्पादन अभियानात शेतकऱ्यांकडून अर्ज आमंत्रित

        अमरावती, दि. 02 (जिमाका) : एकात्मिक फलोत्पादन विकास अभियानांतर्गत सन 2024-25 या वर्षासाठी अनुसूचित जाती प्रवर्गातील शेतकऱ्यांना लाभ देण्यात येणार आहे. यासाठी मोहिम स्वरूपात अर्ज मागविण्यात आले आहे.

मंजूर कार्यक्रमाच्या तुलनेत खर्च आणि प्राप्त अर्जाचे प्रमाण कमी असल्याने दि. 5 डिसेंबर 2024 पर्यंत क्षेत्रियस्तरावरून शेतकऱ्यांना महाडीबीटी प्रणालीवर उपलब्ध असणाऱ्या सुविधा, त्यावर अर्ज करण्याची कर्यपद्धतीबाबत विशेष मोहिम आयोजित करण्यात आली आहे. अनूसुचित जातीच्या शेतकऱ्यांनी क्षेत्रविस्तार घटाकांतर्गत फुलशेती, मिरची लागवड, नियंत्रित शेती घटकांतर्गत शेडनेट हाऊस, पॉली हाऊस, प्लॉस्टिक मलचिंग, काढणीत्तोर व्यवस्थापन घटकांतर्गत पॅक हाऊस, कांदाचाळ यांत्रिकीकरण घटाकांतर्गत ट्रॅक्टर, पॉवर टिलरसाठी घटकनिहाय महाडीबीटी प्रणालीवर अर्ज करावे, असे आवाहन जिल्हा अधिक्षक कृषी अधिकारी राहुल सातपूते यांनी केले आहे.

0000

प्रति थेंब पीक योजनेच्या अनुदानासाठी अर्ज करण्याचे आवाहन

        अमरावती, दि. 02 (जिमाका) : राष्ट्रीय कृषी विकास योजना प्रति थेंब अधिक पीक या योजनेंतर्गत शेतकऱ्यांसाठी ठिंबक व तुषार संच खरेदीसाठी अनुदान दिले जाते. यासाठी अनुसूचित जाती, जमातीतील पात्र इच्छुक शेतकऱ्यांनी अर्ज करावेत, असे आवाहन करण्यात आले आहे.

या योजनेत अनुसूचित जाती आणि अनुसूचित जमाती प्रवर्गातील लाभार्थ्यांना 90 टक्के अनुदान देय आहे. सदर अनुदान हे प्रधानमंत्री कृषि सिंचन योजना, मुख्यमंत्री शाश्वत कृषि सिंचन योजना, डॉ. बाबासाहेब आंबेडकर स्वावलंबन मिशन योजना, बिरसा मुंडा योजना या योजनांमधून दिले जाणार आहे. या योजनेंतर्गत ठिंबक व तुषार सिंचन संचाचा लाभ घेण्यास इच्छुक शेतकऱ्याकडे मालकी हक्काचा सातबारा व आठ अ आवश्यक आहे. तसेच ओलीताची सोय असणे आवश्यक आहे. या योजनोचा लाभ घेण्यासाठी लाभार्थ्यांने महाडीबीटी पोर्टलवर अर्ज करणे आवश्यक आहे. या योजनेचा अनूसूचित जाती, जमातीच्या लाभार्थ्यांनी लाभ घ्यावा, असे आवाहन जिल्हा अधिक्षक कृषी अधिकारी राहुल सातपूते यांनी केले आहे.

00000

जिल्हास्तरीय युवा महोत्सवला उत्स्फूर्त प्रतिसाद

        अमरावती, दि. 02 (जिमाका): नेहरू युवा केंद्रातर्फे मातोश्री विमलाबाई देशमुख महाविद्यालयात जिल्हास्तरीय युवा उत्साव घेण्यात आला. या महोत्सवाला विद्यार्थ्यांचा उत्स्फुर्त प्रतिसाद लाभला. यात विविध स्पर्धांमध्ये विजेत्यांना गौरविण्यात आले.

महोत्सवाचे उद्घाटन मातोश्री विमलाबाई देशमुख महाविद्यालयाच्या प्राचार्य डॉ. स्मिता देशमुख, नेहरू युवा केंद्राच्या जिल्हा युवा अधिकारी स्नेहल बासुतकर, क्रीडा अधिकारी राज वडते, त्रिवेणी बानते, राष्ट्रीय सेवा योजना सेवा योजना जिल्हा समन्वय डॉ. विशाल मेश्राम, राष्ट्रीय सेवा योजना कार्याक्रम अधिकारी प्रा. मंदा नांदुरकर, पर्यवेक्षिका प्रा. ममता म्हस्की यांच्या शुभहस्ते करण्यात आले.

            महोत्सवातील पहिल्या टप्प्यात स्मार्टफोन फोटोग्राफी, चित्रकला, कविता लेखन, कथा लेखन आणि वक्तृत्व स्पर्धा पार पडल्या. यात चित्रकला स्पर्धेत मुकेश अढाऊ - प्रथम, जयंत गीड - द्वितीय, मेघना नांदगवळी - तृतीय, कविता लेखन स्पर्धेत सिया परिहार - प्रथम, जुही वानखडे - द्वितीय, पुजा गुंजरकर - तृतीय, वक्तृत्व स्पर्धेत सौरभ गुडदे - प्रथम, श्रावणी शेटे - द्वितीय, मुक्तिका कुबडे - तृतीय, कथा लेखन स्पर्धेत शेजल गडदे - प्रथम, वेंकटेश नेरकर - द्वितीय, अवंतिका मिलखे - तृतीय यांनी क्रमांक पटकाविला.

युवा महोत्सवाच्या दुसऱ्या टप्पात समूह लोकनृत्य, समूह लोकगीत स्पर्धा मातोश्री विमलाबाई देशमुख सभागृह आणि समूह आणि वैयक्तिक गटातील विज्ञान मेळावा शिवाजी विज्ञान महाविद्यालयात दि. 4 डिसेंबर रोजी घेण्यात येणार आहे.

0000

समाजकल्याण विभागातर्फे आज दिव्यांग जनजागृती रॅली

अमरावती, दि. 02 (जिमाक) : जिल्हा परिषदेच्या जिल्हा समाज कल्याण अधिकारी कार्यालयातर्फे मंगळवार, दि. 3 डिसेंबर रोजी दिव्यांग जनजागृती रॅलीचे आयोजन करण्यात आले आहे. जिल्हा परिषद येथून सकाळी 10.30 वाजता रॅलीची सुरुवात होणार आहे.

शहरातील दिव्यांगांच्या विशेष शाळा आणि कार्यशाळेच्या वतीन शहरात दिव्यांग जनजागृती रॅली काढण्यात येणार आहे. जनजागृती रॅली ही जिल्हाधिकारी कार्यालय चौक येथून सुरू होऊन गर्ल्स हायस्कूल चौक, डॉ. बाबासाहेब आंबेडकर पुतळा, इर्विन चौक ते सांस्कृतिक भवन असा राहणार आहे.

रॅलीत अमरावती येथील अंध प्रवर्गाच्या 2 शाळा, मुकबधिरांच्या 3 शाळा, मतिमंदांच्या 6 शाळा, अस्थिव्यंगाच्या 2 कर्मशाळा अशा 13 शाळा, कर्मशाळेतील दिव्यांग विद्यार्थी आणि कर्मचारी सहभागी होणार आहेत. दिव्यांगाविषयी जनजागृतीचा संदेश, विविध प्रकारच्या वेशभूषा, ब्रिदवाक्य, बॅनर्स आदींचा रॅलीत समावेश राहणार आहे, असे जिल्हा परिषदेचे जिल्हा समाज कल्याण अधिकारी डी. एम. पुंड यांनी कळविले आहे.

000000

स्वाधार योजनेसाठी अर्ज करण्यास 16 डिसेंबरपर्यंत मुदतवाढ

अमरावती, दि. 02 (जिमाका): भारतरत्न डॉ. बाबासाहेब आंबेडकर स्वाधार योजनेसाठी गुरूवार, दि. 16 डिसेंबरपर्यंत मुदतवाढ देण्यात आली आहे. यासाठी इच्छुकांनी अर्ज करण्याचे आवाहन करण्यात आले आहे.

अनुसूचित जाती व नवबौद्ध प्रवर्गातील विद्यार्थांना शासकीय वसतिगृहात प्रवेश मिळालेला नसल्यास विद्यार्थ्यांना शिक्षण घेता यावे यासाठी भोजन, निवास व इतर शैक्षणिक सुविधांसाठी विद्यार्थ्यांच्या आधार संलग्न बँक खात्यामध्ये थेट लाभ जमा करण्यासाठी भारतरत्न डॉ. बाबासाहेब आंबेडकर स्वाधार योजना राबविण्यात येते. योजनेचे निकष व अटी पोर्टलवर उपलब्ध आहेत. योजनेचा लाभ घेण्यासाठी अर्जाचा विहित नमुना hmas.mahait.org  वर उपलब्ध आहे.

परिपूर्ण कागदपत्रासह महाविद्यालयातील समानसंधी केंद्रामार्फत सहायक आयुक्त समाज कल्याण कार्यालयामध्ये दि. 16 डिसेंबर 2024 पर्यंत विद्यार्थ्यांनी अर्ज सादर करावा. अधिक माहितीसाठी सामाजिक न्याय भवन, सहायक आयुक्त, समाज कल्याण, अमरावती, तसेच speldswo_amt@rediffmail.com व दुरध्वनी क्रमांक 0721-2661261 यावर संपर्क साधावा, असे आवाहन समाज कल्याणचे सहायक आयुक्त राजेंद्र जाधवर यांनी केले आहे.

00000

शहरात  कलम 37 (1)  व (3) लागू

अमरावती, दि. 02 (जिमाका) : शहरात शांतता व सुव्यवस्था अबाधित राहावी, यासाठी पोलीस आयुक्त  (अमरावती शहर) यांनी महाराष्ट्र पोलिस कायद्याचे कलम 37 (1) व (3) अन्वये प्रतिबंधात्मक आदेश जारी केले आहे.

सदर प्रतिबंधात्मक आदेश शहरातील कायदा व सुव्यवस्था अबाधित राहावी, याकरिता पोलिस आयुक्तालयाच्या परिक्षेत्रात लागू करण्यात आला आहे. सदर आदेश दि. 3 डिसेंबर ते  दि. 17 डिसेंबर 2024च्या मध्यरात्रीपर्यंत लागू राहील. या कलमाचा भंग करणाऱ्या व्यक्तीविरूद्ध कायदेशीर कारवाई करण्यात येईल, असे पोलीस आयुक्त नविनचंद्र रेड्डी यांनी कळविले आहे.

0000