अनुसुचित जाती, जमातीच्या शेतकऱ्यांनी
‘प्रति थेंब अधिक पीक’ योजनेचा लाभ घ्यावा
*कृषी विभागाचे आवाहन
अमरावती, दि. 9 (जिमाका): राष्ट्रीय कृषि विकास योजना ‘प्रति थेंब अधिक पीक’ अंतर्गत जिल्ह्यातील अनुसूचित जाती आणि अनुसूचित जमाती प्रवर्गातील शेतकऱ्यांचा समावेश करण्यासाठी कृषी विभागाने पुढाकार घेतला आहे. या योजनेंतर्गत पात्र शेतकऱ्यांना ठिबक व तुषार सिंचन संचाच्या खरेदीसाठी विविध योजनांच्या समन्वयातून तब्बल 90 टक्क्यांपर्यंत अनुदान दिले जात आहे. इच्छुक शेतकऱ्यांनी याचा लाभ घ्यावा, असे आवाहन करण्यात आले आहे.
योजनेंतर्गत अनुसूचित जाती व अनुसूचित जमाती प्रवर्गातील लाभार्थ्यांना विविध टप्प्यात पूरक अनुदान देऊन आर्थिक दिलासा दिला जात आहे. प्रधानमंत्री कृषि सिंचन योजनेतून अल्प व अत्यल्प भूधारक शेतकऱ्यांना 55 टक्के, तर इतर शेतकऱ्यांना 45 टक्के अनुदान दिले जाते. मुख्यमंत्री शाश्वत कृषि सिंचन योजनेच्या माध्यमातून अल्प व अत्यल्प भूधारक लाभार्थ्यांना 25 टक्के, तर इतर लाभार्थ्यांना 30 टक्के पूरक अनुदान मिळते. तसेच जिल्हा परिषदेच्या डॉ. बाबासाहेब आंबेडकर स्वावलंबन मिशन योजना आणि बिरसा मुंडा कृषि क्रांती योजनेमधून अल्प व अत्यल्प भूधारकांना 10 टक्के, तर इतर लाभार्थ्यांना 15 टक्के पूरक अनुदान दिले जाते.
इच्छुक शेतकऱ्याकडे स्वतःच्या मालकी हक्काचा सातबारा आणि आठ अ उतारा असणे आवश्यक आहे. शेतकऱ्याकडे शेतीसाठी ओलिताची सोय असणे बंधनकारक आहे. या सिंचन योजनेचा लाभासाठी पात्र व इच्छुक लाभार्थ्यांनी महाडीबीटी पोर्टलवर mahadbt.maharashtra.gov.in या संकेतस्थळावर ऑनलाईन अर्ज करावा लागणार आहे.
जिल्ह्यातील अनुसूचित जाती व जमाती प्रवर्गातील शेतकऱ्यांनी याचा लाभ घेऊन आधुनिक सिंचन पद्धतीचा वापर करावा, असे आवाहन जिल्हा अधीक्षक कृषी अधिकारी राहुल सातपुते यांनी केले आहे.
0000000
जिल्ह्यातील 498 ग्रामपंचायतींच्या सदस्य आरक्षणाची सोडत जाहीर
अमरावती, दि. 9 (जिमाका) : राज्यातील बिगर व अंशतः अनुसूचित क्षेत्रातील सन 2024 आणि 2025 मध्ये मुदत संपलेल्या, तसेच सन 2026 च्या कालावधीत मुदत संपणाऱ्या नवनिर्मित ग्रामपंचायतींच्या सार्वत्रिक निवडणुकांसाठी राज्य निवडणूक आयोगाच्या आदेशानुसार जिल्ह्यातील 498 ग्रामपंचायतींच्या सार्वत्रिक निवडणुकीसाठी सदस्यांच्या आरक्षण निश्चितीचा आणि आरक्षण फिरवण्याचा कार्यक्रम अधिकृतपणे जाहीर करण्यात आला आहे.
जिल्ह्यातील तालुक्यांतर्गत येणाऱ्या ग्रामपंचायतींसाठी आरक्षण सोडतीचा कार्यक्रम 10 ते 12 जून 2026 या तीन दिवसांच्या कालावधीत राबविला जाणार आहे. नागरिकांनी आरक्षण सोडतीला उपस्थित राहावे, असे आवाहन उपजिल्हाधिकारी ज्ञानेश्वर घ्यार यांनी केले आहे.
0000000
शहरात प्रतिबंधात्मक आदेश लागू
अमरावती, दि. 09 (जिमाका) : शहरात शांतता व सुव्यवस्था अबाधित राहावी, यासाठी अमरावती शहर पोलीस आयुक्त यांनी महाराष्ट्र पोलिस कायद्याचे कलम 37 (1) व (3) नुसार प्रतिबंधात्मक आदेश जारी केले आहेत.
सदर प्रतिबंधात्मक आदेश पोलिस आयुक्तालयाच्या परिक्षेत्रात लागू करण्यात आला आहे. हा आदेश दि. 11 जून ते 25 जुन 2026च्या मध्यरात्रीपर्यंत लागू राहणार आहे. या आदेशाचे उल्लंघन करणाऱ्यांविरूद्ध कायदेशीर कारवाई करण्यात येणार आहे, असे पोलिस आयुक्त राकेश ओला यांनी कळविले आहे.
000000
निंभोरा येथील शासकीय वसतिगृह प्रवेश प्रक्रिया सुरू
अमरावती, दि. 9 (जिमाका) : जिल्ह्यातील अनुसूचित जाती, अनुसूचित जमाती, विजाभज, इतर मागासवर्ग आणि आर्थिकदृष्ट्या मागास प्रवर्गातील उत्तीर्ण विद्यार्थ्यांसाठी सामाजिक न्याय विभागाच्या निंभोरा येथे कार्यरत शासकीय वसतिगृहांमध्ये शैक्षणिक वर्ष 2026-27 साठी प्रवेश प्रक्रिया अधिकृतपणे सुरू करण्यात आली आहे.
यात भारतरत्न डॉ. बाबासाहेब आंबेडकर शासकीय वसतिगृह (युनिट क्र. 1, 2, 3), निंभोरा, अमरावती, भारतरत्न डॉ. बाबासाहेब आंबेडकर (जुने नाव गुणवंत) शासकीय वसतिगृह, निंभोरा, अमरावती, संत गाडगे महाराज मुलांचे शासकीय वसतिगृह, निंभोरा, अमरावती या वसतिगृहांमध्ये प्रवेशित विद्यार्थ्यांना शासनातर्फे सर्व प्रकारच्या सोयी-सुविधा मोफत पुरविल्या जाणार आहे.
इच्छुक विद्यार्थ्यांनी सर्वप्रथम hmas.mahait.org या अधिकृत पोर्टलवर जाऊन ऑनलाईन अर्ज भरणे आवश्यक आहे. ऑनलाईन अर्ज भरल्यानंतर, त्या अर्जाची प्रिंट डाऊनलोड करावी. डाऊनलोड केलेली प्रिंट घेऊन संबंधित वसतिगृहामध्ये ऑफलाइन पद्धतीने अर्ज सादर करणे बंधनकारक आहे. कनिष्ठ महाविद्यालय आणि अव्यावसायिक अभ्यासक्रमासाठी अर्ज स्वीकारण्याची अंतिम तारीख: 15 जुलै असून प्रवेशाची पहिली यादी 31 जुलै रोजी प्रसिद्ध होणार आहे. व्यावसायिक अभ्यासक्रमांचे प्रवेश वेळापत्रक स्वतंत्रपणे प्रसिद्ध केले जाणार आहे.
अधिक माहिती किंवा संपर्कासाठी विद्यार्थ्यांनी 9130948264 या दूरध्वनी क्रमांकावर संपर्क साधावा. तसेच विद्यार्थ्यांनी मुदतीत आपले अर्ज संबंधित वसतिगृहाकडे सादर करावेत, असे आवाहन गृहप्रमुख आणि गृहपाल यांनी केले आहे.
000000
वसतिगृह इमारतीसाठी प्रस्ताव आमंत्रित
*15 दिवसांत अर्ज करण्याचे आवाहन
अमरावती, दि. 9 (जिमाका) : इतर मागास बहुजन कल्याण विभागाद्वारे विमुक्त जाती, भटक्या जमाती, इतर मागास प्रवर्ग व विशेष मागास प्रवर्गातील 100 विद्यार्थ्यांसाठी अमरावती येथे मुलांचे वसतिगृह सुरू करण्यात आले आहे. या वसतिगृहासाठी सर्व सोयी-सुविधांनी युक्त अशी इमारत भाडेतत्त्वावर घ्यावयाची आहे. यासाठी 15 दिवसांच्या आत प्रस्ताव सादर करावेत, असे आवाहन करण्यात आले आहे.
शासन निर्णयानुसार अंदाजे 9 हजार 200 चौरस फूट बांधकाम असलेली इमारत भाड्याने हवी आहे. शहरातील स्थानिक इच्छुक इमारत मालकांनी यासाठी आपले अर्ज सादर करावे लागणार आहे. इच्छुक इमारत मालकांनी आपले अर्ज विहित नमुन्यात सहायक संचालक, इतर मागास बहुजन कल्याण, अमरावती, डॉ. बाबासाहेब आंबेडकर सामाजिक न्याय भवन, पोलिस आयुक्तालयाच्या मागे, चांदूर रेल्वे रोड, अमरावती येथे सादर करावेत.
अर्जाचा नमुना आणि यासंबंधीचा इतर संपूर्ण तपशील माहितीसाठी कार्यालयात उपलब्ध आहे. तसेच अधिक माहितीसाठी कार्यालयाचा ई-मेल आयडी adobbwoamravati@gmail.com येथे संपर्क साधता येईल. शहरातील इच्छुक इमारत मालकांनी मुदतीच्या आत अर्ज सादर करावेत, असे आवाहन इतर मागास बहुजन कल्याण विभागाचे सहायक संचालक यांनी केले आहे.
00000
शासकीय वसतिगृहात मोफत प्रवेशासाठी अर्ज सुरु
अमरावती, दि. 09 (जिमाका): धामणगाव रेल्वे येथील सामाजिक न्याय व विशेष सहाय्य विभागाच्या क्रांतीज्योती सावित्रीबाई फुले मुलींचे शासकीय वसतिगृहात शैक्षणिक सत्र 2026-27 साठी मोफत प्रवेश प्रक्रियेस सुरवात झाली आहे.
अनुसूचित जाती, अनुसूचित जमाती, विमुक्त जाती-भटक्या जमाती, इतर मागासवर्गीय, विशेष मागास प्रवर्ग तसेच इतर पात्र प्रवर्गातील आठवीपासून उच्च व व्यावसायिक शिक्षण घेणारे विद्यार्थी ऑनलाईन अर्ज करू शकतील. विद्यार्थ्यांना निवास, भोजन, शैक्षणिक साहित्य, निर्वाह भत्ता, ग्रंथालय, जिम आणि वाय-फाय सुविधा विनामुल्य उपलब्ध होणार आहेत.
विद्यार्थ्यांना गुणवत्ता आणि रिक्त जागांनुसार वसतिगृहात प्रवेश दिला जाणार आहे. शालेय विद्यार्थ्यांना अर्जाची अंतिम मुदत 30 जून असून अकरावी व बिगर व्यावसायिक (महाविद्यालयीन) अभ्यासक्रमासाठी 15 जुलैपर्यंत अर्ज करता येतील. अर्जासाठी hmas.mahait.org संकेतस्थळाला भेट द्यावी, तसेच अधिक माहितीसाठी वसतिगृहातील गृहपाल यांच्याशी संपर्क साधावा, असे आवाहन करण्यात आले आहे.
00000000
No comments:
Post a Comment