शहरात कलम 37 (1) व (3) लागू

 

शहरात  कलम 37 (1)  व (3) लागू

 

             अमरावती, दि. 30 (जिमाका) : शहरात शांतता व सुव्यवस्था अबाधित राहावी, यासाठी पोलीस आयुक्त  (अमरावती शहर) यांनी महाराष्ट्र पोलिस कायद्याचे कलम 37 (1) व (3) अन्वये प्रतिबंधात्मक आदेश जारी केला आहे.

 

             सदर प्रतिबंधात्मक आदेश शहरातील कायदा व सुव्यवस्था अबाधित राहावी, याकरिता पोलिस आयुक्तालयाच्या परिक्षेत्रात लागू करण्यात आला असून   दि. 3 सप्टेंबर ते 17 सप्टेंबर 2024 च्या मध्यरात्रीपर्यंत लागू राहील. या कलमाचा भंग करणाऱ्या व्यक्तीविरूध्द कायदेशीर कारवाई करण्यात येईल, असे पोलीस आयुक्त (अमरावती शहर)  नविनचंद्र रेड्डी  यांनी कळविले आहे.

00000

जिल्हा लोकशाही दिन 3 सप्टेंबरला

 

जिल्हा लोकशाही दिन 3 सप्टेंबरला

            अमरावती, दि. 30 (जिमाका) : जिल्हा लोकशाही दिन मंगळवार, दिनांक 3 सप्टेंबर 2024 रोजी दुपारी 11 वाजता जिल्हाधिकारी कार्यालयात आयोजित करण्यात आला आहे. तरी संबंधितांनी अहवालासह व्यक्तिश: उपस्थित राहण्याचे आवाहन निवासी उपजिल्हाधिकारी  यांनी केले आहे.

 

00000

इतर मागास बहुजन कल्याण विभागाच्या योजनांची माहिती लाभार्थ्यांपर्यंत पोहोचविण्यासाठी नांदगाव खंडेश्वर व तिवसा येथे मेळावा; लाभार्थ्यांचा उत्स्फूर्त प्रतिसाद

 

इतर मागास बहुजन कल्याण विभागाच्या योजनांची माहिती लाभार्थ्यांपर्यंत पोहोचविण्यासाठी नांदगाव खंडेश्वर व तिवसा येथे मेळावा; लाभार्थ्यांचा उत्स्फूर्त प्रतिसाद

 

           अमरावती, दि. 30 (जिमाका):  इतर मागास बहुजन कल्याण विभागामार्फत मागास बहुजनासाठी शासनाच्या विविध योजना राबविण्यात येतात. या योजनांची माहिती विद्यार्थ्यांना व्हावी यासाठी नांदगाव खंडेश्वर व तिवसा तालुकात  मेळाव्याचे आयोजन करण्यात आले होते. या मेळाव्याला विद्यार्थ्यांचा उत्स्फूर्त प्रतिसाद मिळाला असून योजनेची सविस्तर माहिती मेळाव्याच्या माध्यमातून लाभार्थ्यांपर्यंत पोहोचविण्यात आली.

 

            इतर मागास बहुजन कल्याण विभागाच्या योजनांची माहिती सर्व विद्यार्थी, लाभार्थी, पालकांपर्यंत तसेच सर्व शाळा प्रमुखांपर्यत पोहोचविण्यासाठी नांदगांव खंडेश्वर तालुक्यातील विनायक विज्ञान विद्यालय येथे तर तिवसा तालुक्यात यादव देशमुख कला वाणिज्य आणि विज्ञान महाविद्यालय येथे मेळाव्याचे आयोजन करण्यात आले होते. यावेळी योजनेची माहिती तसेच योजनेचा लाभ घेण्याकरीता आवश्यक पात्रता, अर्ज कुठे व कसे करायचा याची सविस्तर माहिती विद्यार्थी व  पालकांना देण्यात आली. तसेच योजनेच्या अनुषंगाने मान्यवरांनी लाभार्थ्यांना मार्गदर्शन केले.

000000

अमरावती विधानसभा मतदारसंघाची प्रारुप मतदार यादी प्रसिध्द

 

अमरावती विधानसभा मतदारसंघाची प्रारुप मतदार यादी प्रसिध्द

 

               अमरावती, दि. 30 (जिमाका): आगामी विधानसभा सार्वत्रिक निवडणुक - 2024 च्या अनुषंगाने दि. 1 जुलै 2024 या अहर्ता दिनांकावर आधारित प्रारुप मतदार यादी आज दि. 30 ऑगस्ट रोजी  038- अमरावती विधानसभा मतदारसंघातील सर्व 322 मतदान केंद्र तसेच अमरावती महानगरपालिका, तहसील कार्यालय व उपविभागीय अधिकारी कार्यालय यांच्या नोटीस बोर्डावर प्रसिद्ध करण्यात आलेली आहे. मतदान केंद्रावरील मतदार यादीत आपल्या नावाची नोंद असल्याची खात्री करावी, असे आवाहन अमरावती विधानसभा मतदारसंघाचे मतदार नोंदणी अधिकारी यांनी केले आहे.

 

          अंतिम मतदार यादी शासकीय कामाकाजाचे वेळेत मतदार नोंदणी अधिकारी, 038 –अमरावती विधानसभा मतदारसंघ तथा उपविभागीय अधिकारी अमरावती यांचे कार्यालयात उपलब्ध करण्यात आलेली आहे. सर्व मतदारांनी आपले मतदान केंदावर मतदान केंद्रस्तरीय अधिकारी बिएलओ यांचेकडे किंवा तहसिल कार्यालय, अमरावती येथील निवडणूक विभागात जाऊन मतदान यादीमध्ये आपल्या नावाची नोंद असल्याची खात्री करावी. मतदारांचे नाव मतदार यादीमध्ये नसेल तर नाव समाविष्ट करण्यासाठी नमुना-6तसेच नाव किंवा इतर तपशिलात दुरूस्ती करावयाची असल्यास नुमुना-8 भरून व नाव वगळायचे असल्यास नमुना-7 भरून मतदार नोंदणी अधिकारी, 038-अमरावती विधानसभा मतदासंघ तथा उपविभागीय अधिकारी, अमरावती यांचे कार्यालयास सादर करावे.

           

            मतदार यादीमध्ये नाव नोंदणी करण्यासाठी https://votres.eci.gov.in किंवा व्होटर हेल्पलाईन अप्लीकेशनवर भेट देऊन मतदार घरबसल्यासुध्दा आपले नाव मतदार यादीमध्ये समाविष्ट करू शकतात. तसेच मतदार यादीमध्ये नाव शोधण्याकरीता https://electoralsearch.ecigov.in येथे भेट द्यावी, असेही आवाहन करण्यात आले आहे. 

00000

अमरावतीच्या जिल्हा माहिती अधिकारी पदी गजानन कोटुरवार रुजू

 

अमरावतीच्या जिल्हा माहिती अधिकारी

पदी गजानन कोटुरवार रुजू

 

           अमरावती,दि.30 (जिमाका):-  जिल्हा माहिती कार्यालय, अमरावती येथील जिल्हा माहिती अधिकारी या पदावर गजानन शेषराव कोटुरवार आज रुजू झाले आहेत. जिल्हा माहिती अधिकारी या पदावर त्यांची प्रशासकीय बदली झाली असून त्यांनी आज दि.  30 ऑगस्ट 2024 रोजी माहिती अधिकारी श्रीमती अपर्णा यावलकर यांच्याकडून जिल्हा माहिती अधिकारी या पदाचा कार्यभार स्वीकारला.

 

              माहिती अधिकारी श्रीमती अपर्णा यावलकर, माहिती सहायक सतिश बगमारे, वरीष्ठ लिपीक प्रतिक फुलाडी, योगेश गावंडे, छायाचित्रकार सागर राणे, कनिष्ठ लिपीक गजानन परटके, कोमल भगत, वाहनचालक हर्षल हाडे, शिपाई राजश्री चौरपगार, प्रतिक वानखडे आदी यावेळी उपस्थित होते.

 

            जिल्हा माहिती अधिकारी श्री. कोटुरवार यांनी यापूर्वी माहिती व जनसंपर्क महासंचालनालयाच्या मुंबई व जिल्हा माहिती कार्यालय, यवतमाळ येथे उपसंपादक पदावर तसेच विभागीय माहिती कार्यालय, अमरावती येथे सहायक संचालक तर जिल्हा माहिती कार्यालय, बुलडाणा येथे जिल्हा माहिती अधिकारी या पदावर काम केले आहे. या कालावधीत अनेक वैशिष्ट्यपूर्ण शासकीय उपक्रम राबवून त्यांनी योगदान दिले आहे.

 

00000

प्रादेशिक चालक प्रशिक्षण केंद्राचे रस्ते वाहतूक मंत्री नितीन गडकरी यांच्या हस्ते लोकार्पण; अपघात नियंत्रणासाठी प्रशिक्षित वाहनचालक आवश्यक - नितीन गडकरी

 

प्रादेशिक चालक प्रशिक्षण केंद्राचे रस्ते वाहतूक मंत्री नितीन गडकरी यांच्या हस्ते लोकार्पण;

अपघात नियंत्रणासाठी प्रशिक्षित वाहनचालक आवश्यक - नितीन गडकरी

            अमरावती, दि. 28 (जिमाका): देशामध्ये राष्ट्रीय महामार्ग व रस्ते बांधणीचे कामे वेगाने सुरु असून वाहतुकीचा वेग वाढला आहे. वाढत्या वेगासोबतच रस्ते अपघातामध्येही लक्षणीय वाढ चिंताजनक आहे. अपघात होण्याचे मुख्य कारण परिपूर्ण प्रशिक्षित नसल्याचे  निदर्शनास आले आहे. त्यामुळे रस्ते अपघात कमी करण्यासाठी वाहनचालकांना योग्य प्रशिक्षण देणे गरजेचे आहे. अशा प्रादेशिक प्रशिक्षण केंद्राच्या माध्यमातून उत्तम प्रशिक्षित वाहनचालक निर्माण होऊन अपघात कमी होण्यास निश्चित मदत होईल, असे प्रतिपादन केंद्रीय रस्ते वाहतूक व महामार्ग मंत्री नितीन गडकरी यांनी केले.

 

             मार्डी रोडवरील प्रादेशिक चालक प्रशिक्षण केंद्राचे उद्घाटन केंद्रीयमंत्री श्री. गडकरी यांच्या हस्ते आज झाले, त्यावेळी ते बोलत होते. यावेळी खासदार डॉ. अनिल बोंडे, परिवहन आयुक्त विवेक भीमनवार, विशेष पोलीस महानिरीक्षक रामनाथ पोकळे, पोलीस आयुक्त नवीनचंद्र रेड्डी, विभागीय परिवहन अधिकारी उर्मिला पवार, निवासी उपजिल्हाधिकारी अनिल भटकर, सिपना शिक्षण प्रसारक मंडळ व प्रादेशिक चालक प्रशिक्षण केंद्राचे अध्यक्ष जगदिश गुप्ता आदी उपस्थित होते.

 

            देशात राष्ट्रीय महामार्ग जलद गतीने तयार होत असून यामुळे पैसा, पर्यावरण व वेळेत बचत होत आहे. वाहतुकीचा वेग वाढल्यामुळे रस्ते अपघातामुळे मृत्यूचे प्रमाण वाढले आहे. ही बाब लक्षात घेऊन प्रत्येक ठिकाणी प्रशिक्षण केंद्र निर्माण करण्यात येत आहे. यातून प्रशिक्षित वाहनचालक निर्माण करण्याचे धोरण आहे. त्याचाच एक भाग म्हणून येथील प्रादेशिक चालक प्रशिक्षण केंद्र सुरु करण्यात आले आहे. हे राज्यातील पहिले केंद्र आहे. या प्रशिक्षण केंद्रामुळे प्रशिक्षित वाहनचालक तयार होतील, असा विश्वास केंद्रीयमंत्री नितिन गडकरी यांनी व्यक्त केला.

 

             रस्ता सुरक्षा व अपघात कमी करण्यासाठी केंद्र सरकार उपाययोजना करीत आहे. त्यामध्ये अपघात प्रवण स्थळाचा शोध घेऊन दुरुस्ती करणे, वाहननिर्मिती करणाऱ्या उद्योगांना वाहनामध्ये एअर बॅग, ऑटोमॅटिक ब्रेकींग सिस्टीम, आधुनिक तंत्राचा वापर करुन अपघात नियंत्रण सुविधा निर्माण करण्याचे निर्देश देण्यात आले आहे. पेट्रोल, डिझेलला पर्याय म्हणून इलेक्ट्रिक वाहन, सीएनजी, इॅथेनॉल इंधनावर चालणाऱ्या वाहनाचा एक सशक्त व परवडणाऱ्या पर्यायाला प्रोत्साहन देण्यात येत आहे. वाहतूक क्षेत्रामध्ये क्रांतिकारक बदल होत आहे.  प्रशिक्षित वाहनचालकांना देश-विदेशात 22 लाखापेक्षा जास्त रोजगार उपलब्ध होणार आहे. त्यामुळे बेरोजगारांना मोठ्या प्रमाणात रोजगार मिळणार असून देशाच्या विकासाला चालना मिळणार आहे. कौशल्य विकास क्षेत्रात मोठी मागणी असून प्रशिक्षण केंद्राच्या माध्यमातून या संधीचा युवकांनी लाभ घ्यावा, असे आवाहनही श्री. गडकरी यांनी केले.

 

            प्रादेशिक चालक प्रशिक्षण केंद्रामुळे शहराच्या वैभवात भर पडली आहे. या केंद्रामध्ये चांगले प्रशिक्षित वाहनचालक तयार होवून रोजगाराच्या अनेक संधी उपलब्ध होणार आहे. केंद्रीयमंत्री नितिन गडकरी यांच्या मार्गदर्शनाखाली देशात रस्ताचा विकास झपाट्याने होत असून पर्यावरणपूरक इंधनाला ते प्रोत्साहन देत आहे. त्यांच्या या अभिनव उपक्रमामुळे देशाच्या विकासात हातभार लागत असल्याचे डॉ. अनिल बोंडे यांनी सांगितले.

 

            कार्यक्रमाच्या सुरुवातील केंद्रीयमंत्री श्री. गडकरी यांनी प्रादेशिक चालक प्रशिक्षण केंद्राची पाहणी केली. सिपना शिक्षण प्रसारक मंडळ व प्रादेशिक चालक प्रशिक्षण केंद्राचे अध्यक्ष जगदिश गुप्ता यांनी प्रास्ताविक केले. कार्यक्रमाचे सूत्रसंचालन डॉ. इशांत राजगुरु यांनी केले. तर राखी गुप्ता यांनी आभार मानले.

00000

मुल्याधिष्ठित ज्ञान मिळविताना माणूसपणही जपा - केंद्रीय मंत्री नितीन गडकरी

 

मुल्याधिष्ठित ज्ञान मिळविताना माणूसपणही जपा

 

- केंद्रीय मंत्री नितीन गडकरी

 

अमरावती, दि. 30 (जिमाका) : अन्य देशांच्या तुलनेत आपल्या देशात पारिवारिक जीवन जपल्यामुळे संस्कारशील समाजरचना आजही कायम आहे. नवतंत्रज्ञानाच्या सहाय्याने आपापल्या क्षेत्रात मुल्याधिष्ठित ज्ञान मिळवितानाच माणूसपणही जपा. अर्थार्जन करताना उत्तम नागरिक म्हणून आपली कर्तव्ये पाळा, असे प्रतिपादन केंद्रीय रस्ते वाहतूक व महामार्ग मंत्री नितीन गडकरी यांनी आज येथे केले.

 

नेमाणी गोडाऊन समोरील सिपना कॉलेज ऑफ इंजिनिअरींग टेक्नॉलॉजीच्या रौप्य महोत्सवी सोहळ्याचा समारोपीय सोहळा विद्यालयाच्या स्व. अरविंदजी उर्फ भाऊ लिमये सभागृहात आयोजित करण्यात आला होता, त्यावेळी मार्गदर्शन करताना केंद्रीय मंत्री नितीन गडकरी बोलत होते. सिपना प्रसारक शिक्षण मंडळाचे अध्यक्ष जगदीश गुप्ता, प्राचार्य संजय खेरडे यावेळी उपस्थित होते.

 

विद्यार्थ्यांना मार्गदर्शन करताना केंद्रीय मंत्री नितीन गडकरी म्हणाले की, सिपना प्रसारक शिक्षण मंडळ रौप्य महोत्सवी वर्ष साजरे करीत आहे. आजवर येथे कितीतरी विद्यार्थी घडले. ज्ञानामुळेच माणसाची किंमत वाढते. शोध, कौशल्य, ज्ञान यांचे रुपांतरण तुमच्या कार्यात केल्यास निश्चितच प्रगती होते. प्रत्येक व्यक्तीकडून शिकण्यासारखी बाब असते, ती तेवढी शिकून घ्या. आयुष्यात अर्थार्जन करीत असताना ज्ञान, संशोधन, तंत्रज्ञान यांचे नवनवे प्रयोग करीत रहा. सुरक्षिततेपेक्षा धोके पत्करायला शिका. कोणतेही नवीन कार्य करताना तुमची इच्छाशक्ती खूप महत्त्वपूर्ण आहे. स्वत:ची प्रगती करण्यासाठी वक्तृत्व, कर्तृत्व आणि नेतृत्वपण सिध्द करा. 

 

श्री. गडकरी पुढे म्हणाले की, देशातील शेतकरी अन्नदाता नसून उर्जादाता आहे. यामुळेच शेतीपूरक व्यवसायाला प्राधान्य देण्यात येत आहे. देशाच्या विकासासाठी ‘स्मार्ट व्हिलेज’ या संकल्पनेवर काम करणे सुरु आहे. जीवनमान सुकर करण्यासाठी नवतंत्रज्ञानाचा वापर करा. इथेनॉल, बायोडिझेल, इलेक्ट्रिक चारचाकी, दुचाकी वाहने यामुळे सामान्यांच्या आयुष्यात मोठ्या प्रमाणावर अर्थबचत होत आहे. सध्या भारत हा जगातील पाचव्या क्रमांकाची  अर्थव्यवस्था आहे. देशाची अर्थव्यवस्था अधिक बळकट करण्यासाठी आर्थिक समता आणि सामाजिक समता महत्त्वपूर्ण आहे. ‘नीडबेस रिसर्च’ वर विद्यार्थांनी काम करणे गरजेचे आहे. ग्रामीण भागातील गरजा गावातच पूर्ण होण्यावर भर द्या. मदर डेअरी, शेणापासून पेंट, इथेनॉलपासून इंधन अशासारख्या छोट्या बदलातून मोठे बदल लवकर होतात. ई-रिक्षा, ई-कार्टमुळे आज मानवी रिक्षा बंद झाली आहे. यासाठी नवतंत्रज्ञान आत्मसात करुन नोकरी मागणारे न बनता नोकरी निर्माण करणारे बना, असा संदेश त्यांनी यावेळी दिला.

 

सिपना प्रसारक शिक्षण मंडळाचे अध्यक्ष श्री. गुप्ता यांनी संस्थेचा आजवरचा प्रवास आणि प्रगती या विषयी माहिती दिली. संस्थेची वाटचाल अधिक प्रगतीशील करण्यासाठी नवतंत्रज्ञानाचा वापर करण्यात येत आहे. विद्यार्थ्यांनी याचा लाभ घेऊन विविध उपक्रम राबवावे. पुस्तकी ज्ञानासोबत सामाजिक भान जपा. आयुष्यात सत्कर्म करण्यासाठी संगत महत्त्वपूर्ण आहे. यामुळे आपली संगत योग्य राहील यासाठी विद्यार्थ्यांनी लक्ष द्यावे, असे आवाहन त्यांनी केले. यावेळी सिपना प्रसारक शिक्षण मंडळाच्या रौप्य महोत्सवी वर्षानिमित्त संस्थेच्या विकासाबाबतची चित्रफित दाखविण्यात आली. कार्यक्रमाचे प्रास्ताविक प्राचार्य संजय खेरडे यांनी केले. आभार डॉ. विशाल राठी आणि नेहा राठी यांनी मानले. 

 

 

00000

अमरावती महापालिका हद्दीतील मंडप, पेंडॉल तपासणीसाठी पथक

 

अमरावती महापालिका हद्दीतील मंडप, पेंडॉल तपासणीसाठी पथक

 

        अमरावती, दि.29 (जिमाका) :  जिल्ह्यातील अमरावती महानगरपालिका हद्दीमधील सार्वजनिक सण, उत्सव, समारंभ या प्रसंगी उभारण्यात येणाऱ्या मंडप, पेंडॉलच्या तपासणीकरीता तपासणी पथक गठीत करण्यात आले आहे. तरी नागरीकांनी सार्वजनिक सण, उत्सव, समारंभ या प्रसंगी उभारण्यात येणाऱ्या मंडप, पेंडॉलच्या संदर्भात कोणतीही तक्रार असल्यास तपासणी पथकातील सदस्यांशी संपर्क साधावा, असे आवाहन जिल्हाधिकारी सौरभ कटियार यांनी केले आहे.

 

       पथक याप्रमाणे : उपविभागीय अधिकारी तथा उपविभागीय दंडाधिकारी अनिलकुमार भटकर, दुरध्वनी क्रमांक 0721-2565023, मोबाईल क्रमांक 9881008494, ईमेल- sdo.amravati@gmail.com, महानगरपालिका अमरावती झोन क्रं. 01 सहायक आयुक्त नंदकिशोर तिखीले दुरध्वनी क्रमांक 0721-2676626, मोबाईल क्रं. 7030922889, ईमेल- tikhilenandkishor7@gmail.com , राजापेठ विभाग सहायक पोलीस आयुक्त जयदत्त भवर, दुरध्वनी क्रमांक 0721-2678300, मोबाईल  क्रमांक 9930606689, ईमेल-acprajapeth.cpamt@mahapolic.gov.in  यावर संपर्क साधावा.

000000

कावड यात्रा उत्सवाच्या दिवशी दर्यापूर ते मुर्तिजापूर वाहतूक मार्गात बदल

 

कावड यात्रा उत्सवाच्या दिवशी दर्यापूर ते मुर्तिजापूर वाहतूक मार्गात बदल

 

            अमरावती, दि.29 (जिमाका) : श्रावणातील शेवटच्या सोमवारी अमरावती जिल्हयातील दर्यापूर शहरात मोठ्या प्रमाणावर कावड यात्रा उत्सव साजरा होतो. कायदा व सुव्यवस्थाच्या अनुषंगाने दर्यापूर ते मुर्तिजापूर मार्गावर वाहतुकीत बदल करण्याचे आदेश जिल्हा दंडाधिकारी सौरभ कटियार यांनी जारी केला आहे.

 

               दर्यापूर ते मुर्तिजापूर या रोडवर कावड यात्रा मंडळ व शिवभक्तांची मोठ्या प्रमाणात गर्दी राहते. सदर रोडचे रुंदीकरण झाल्याने रोडवर वाहतुक वेगाने सुरू राहते. या ठिकाणी कायदा व सुव्यवस्था अबाधित राहणेकरिता तसेच कावड यात्रा मिरवणूक शांततेत पार पडावी या करीता दर्यापूर ते मुर्तिजापूर मुख्य मार्ग रविवार दि. 1 सप्टेंबर 2024 चे रात्री 10 वाजेपासून ते 2 सप्टेंबर 2024 रोजी दुपारी दोन वाजेपर्यंत दर्यापूर-आमला-आसरा फाटा-बोटा-हिरापूर ते मुर्तिजापूर मार्गे (फक्त एस.टी. बस वाहतुक वगळून) वळविण्यात येत असल्याचे आदेश निर्गमित केले आहे. या आदेशाचे उल्लंघन करणाऱ्यावर मोटार वाहन कायदा व महाराष्ट्र पोलीस अधिनियमानुसार कारवाई करण्यात येईल.

0000

मुख्यमंत्री युवा कार्य प्रशिक्षण योजनेंतर्गत पोलीस अधीक्षक ग्रामीण कार्यालय येथे प्रशिक्षणाची संधी; 3 सप्टेंबरला मेळाव्याचे आयोजन

 

मुख्यमंत्री युवा कार्य प्रशिक्षण योजनेंतर्गत पोलीस अधीक्षक ग्रामीण कार्यालय येथे प्रशिक्षणाची संधी;

3 सप्टेंबरला मेळाव्याचे आयोजन

 

           अमरावती, दि. 29 (जिमाका): युवक, युवतींना त्यांच्या शिक्षणानंतर प्रत्यक्ष कामाचे प्रशिक्षण देऊन त्यांची क्षमता वाढविण्यासाठी मुख्यमंत्री युवा कार्य प्रशिक्षण योजना सुरू केली आहे. या योजनेतंर्गत पोलीस अधीक्षक अमरावती ग्रामीण कार्यालयातंर्गत विविध पदावर प्रशिक्षणार्थ्यांची निवड करण्यासाठी मंगळवार दि. 3 सप्टेंबर रोजी मेळाव्याचे आयोजन करण्यात आले आहे. या मेळाव्याचा इच्छुक प्रशिक्षणार्थ्यांनी पोलीस अधिक्षक कार्यालय, अमरावती ग्रामीण येथे उपस्थित राहून लाभ घ्यावा, असे आवाहन ग्रामीण पोलीस अधिक्षक विशाल आनंद यांनी केले आहे.

           

           प्रशिक्षण योजनेंतर्गत प्रशिक्षणार्थींना शैक्षणिक अहर्तप्रमाणे 12 वी पास प्रशिक्षणार्थींना 6 हजार, आयटीआय/पदवीका यांना 8 हजार व पदवीधर/पदव्युत्तर यांना 10 हजार रुपये शासनाकडून विद्यावेतन दिले जाणार आहे. या कार्य प्रशिक्षणाचा कालावधी 6 महिने असून प्रशिक्षणार्थ्यांचे वयोमर्यादा 18 ते 35 वयोगटातील असावा. या योजनेकरीता इच्छुक उमेवारांनी

            https://drive.google.com/file/d/lvhLLv6YEvk06pcbKuorwi-pUlqpnpf8t/view?usp=sharing या लिंकवरून अर्जाची प्रिंट काढुन सदर अर्ज भरून शैक्षणिक कागदपत्रासह पोलीस अधीक्षक कार्यालय, अमरावती ग्रामीण येथे उपस्थित राहावे.

 

            अमरावती ग्रामीण कार्यालय, अमरावती येथे 39 पदे, उपविभागीय अचलपूर येथे 19, उपविभागीय अंजनगांव येथे 10, उपविभागीय दर्यापर येथे 10, उपविभागीय अमरावती ग्रामीण येथे 19, उपविभागीय मोर्शी येथे 16, उपविभागीय चांदुर रेल्वे येथे 19, उपविभागीय धारणी येथे 7 असे एकुण पदे 139 पदावर प्रशिक्षणार्थ्यांची निवड करण्यात येणार आहेत.           

 

            आवश्यक कागदपत्रे : उमेदवार हा महाराष्ट्राचा अधिवास असावा, उमेदवारांची आधार नोंदणी असावी, उमेदवारांचे बँक खाते आधार संलग्न असावे, उमेदवाराने कौशल्य, रोजगार व उद्योजकता आयुक्तलाच्या संकेतस्थळावर नोंदणी करून रोजगार नोंदणी क्रमांक प्राप्त केलेला असावा, उमेदवारांने अर्ज भरतांना उपरोक्त ठिकाणापैकी एकाच ठिकाणासाठी अर्ज सादर करावा, सदर कार्य प्रशिक्षणाचा कालावधी उमेदवारांना या योजनेंतर्गत शासनामार्फत विद्यावेतन देण्यात येणार आहे, एका उमेदवारस या योजनेचा लाभ एकदाच घेता येईल.  उमेदवाराचे ज्या ठिकाणी प्रशिक्षणाकरीता नेमणूक केली जाईल ते मुख्यालय सोडता येणार नाही, यांची नोंद घ्यावी.

00000

 

प्रधानमंत्री सुक्ष्म अन्न प्रक्रीया उद्योजकांसाठी सुवर्णसंधी

 

प्रधानमंत्री सुक्ष्म अन्न प्रक्रीया उद्योजकांसाठी सुवर्णसंधी

 

           अमरावती, दि. 28 (जिमाका): प्रधानमंत्री सूक्ष्म अन्न प्रक्रिया उद्योग योजना केंद्र पुरस्कृत योजना असून केंद्र आणि राज्य निधी हा 60:40 या प्रमाणात आहे. अन्न प्रक्रिया उद्योग उभारणी करण्यास इच्छुक लाभार्थ्यांसाठी रोजगारांची संधी उपलब्ध होणार असून या योजनेचा लाभ घ्यावा, असे आवाहन जिल्हा अधिक्षक कृषि अधिकारी राहुल सातपुते यांनी केले आहे.

 

           प्रधानमंत्री सूक्ष्म अन्न प्रक्रिया उद्योग योजना सन 2020-21 ते 2024-25 पर्यंत कालावधीसाठी असणार आहे. या योजनेमध्ये नाशिवंत कृषी उत्पादने, तृणधान्य/कडधान्य आधारित उत्पादन, तेलबिया आधारित उद्योग, मसाला उद्योग, दुग्धजन्य पदार्थाचे उत्पादन, मत्स्य खाद्य, कुकूट खाद्य, इत्यादी उद्योगाचा समावेश आहे. या योजनेअंतर्गत नवीन उद्योग व अस्तित्वातील सुक्ष्म प्रक्रिया उद्योगांचे आधुनिकीकरण करण्यासाठी अनुदान दिले जाते. सामाजिक पायाभूत सुविधा व विपणन ब्रँडिंग उत्पादनाकरिता अनुदान देय असेल. या योजनेअंतर्गत वैयक्तिक सूक्ष्म अन्न प्रक्रिया उद्योजक, स्वयंसहाय्यता गटातील वैयक्तिक उद्योजक, स्वयंसहाय्यता गट तसेच शेतकरी उत्पादक गट किंवा सहकारी संस्था यांनाही अनुदान देय असणार आहे. वैयक्तिक लाभार्थी, स्वयंसहाय्यता गटातील वैयक्तिक लाभार्थी व स्वयंसहाय्यता गटास सुक्ष्म अन्नप्रक्रिया उद्योगासाठी प्रकल्प खर्चाच्या 35 टक्के किंवा जास्तीत जास्त 10 लाख रुपये इतके अनुदान हे दिले जाईल. प्रकल्प उभारणीसाठी बँकेकडून कर्ज घेणे आवश्यक आहे. कर्ज घेतल्यावर कर्जाशिवाय प्रकल्पांमध्ये लाभार्थ्यांचा स्वतःचा हिस्सा किमान 10 टक्के रकमेचा आवश्यक आहे. प्रधानमंत्री सूक्ष्म अन्न प्रक्रिया उद्योग योजनेअंतर्गत अमरावती जिल्ह्यात आजमितीस 670 प्रकल्प प्रस्तावास कर्ज मंजुरी मिळालेली असून 450 हून अधिक प्रकल्पास कर्ज वितरण झालेले आहे.

 

       प्रधानमंत्री सूक्ष्म अन्न प्रक्रिया उद्योग योजने अंतर्गत अमरावती जिल्ह्यात जिल्हा संसाधन व्यक्ती कार्यरत असून उद्योग संबंधी अधिक माहिती देणे, प्रकल्प अहवाल तयार करणे, बँकेत सादर केलेल्या प्रस्तावाचा पाठपुरावा करणे यासाठी निशुल्क सेवा पुरविण्यात येतात. योजनेच्या लाभाकरिता तालुकास्तरावर तालुका कृषि अधिकारी, मंडळ कृषि अधिकारी, योजनेचे संसाधन व्यक्ती, तालुका तंत्रज्ञान व्यवस्थापक, तसेच ग्रामस्तरावर गावातील संबंधीत गावाचे कृषि सहाय्यक व कृषि पर्यवेक्षक यांचेशी संपर्क करावा.

0000

अटल भूजल योजना; जिल्हास्तरीय भूजल मित्र कार्यशाळा मोर्शी येथे संपन्न

 

अटल भूजल योजना; जिल्हास्तरीय भूजल मित्र कार्यशाळा मोर्शी येथे संपन्न

 

          अमरावती, दि. 28 (जिमाका): अटल भूजल योजनेतंर्गत ग्रामपंचायत स्तरावरील भूजल मित्रासाठी एकदिवसीय कार्यशाळा दि. 23 ऑगस्ट रोजी तहसील कार्यालय सभागृह मोर्शी येथे आयोजित करण्यात आला होतो. यावेळी विषय तज्ज्ञाव्दारे मार्गदर्शन करण्यात आले.

 

         वरिष्ठ भूवैज्ञानिक भूसवियं राजेश सावळे यांचे मार्गदर्शनाखाली भुजल मित्र कार्यशाळा घेण्यात आली. यावेळी प्रमुख अतिथी म्हणून तहसिलदार राहुल पाटील, नायब तहसीलदार कृष्णकुमार ठाकरे, हरीश ठाकरे, कनिष्ठ भूवैज्ञानिक हरीश कठारे उपस्थित होते. 

 

        जल पूजन करून कार्यशाळेचे उद्घाटन करण्यात आले. कार्यशाळेची प्रस्तावना कनिष्ठ भूवैज्ञानिक हरीश कठारे यांनी केले. यावेळी अटल भूजल योजनेअंतर्गत मोर्शी वरुड व चांदूर बाजार तालुक्यातील 93 ग्रामपंचायतीतील 214 गावामधील 29 हजार 973 विहिरीचे सर्वेक्षण केल्याची माहिती दिली. पाण्याच्या मोकाट वापरावर नियंत्रण असणे गरजेचे असून शेतासाठी वापर करीत असलेल्या पाण्याची माहिती शेतकऱ्यांना  होण्यासाठी 100 शेतकऱ्यांच्या विहिरीवर वॉटर फ्लो मिटर बसविण्यात आले. यामुळे किती हजार लिटर पाणी पिकाला लागत असल्याची माहिती शेतकऱ्याला होते. तसेच ग्रामपंचायतमध्ये पाणी पातळी घेण्यासाठी पिझोमीटर करण्यात आले असून त्यावर डिजीटल वॉटर लेवल इंडिकेटर बसविण्यात आले आहे. डीएलआय-2 अंतर्गत लोकसहभागातून जलसुरक्षा आराखडा तयार करण्यात आले असून अटल भूजल योजने अंतर्गत प्रोत्साहन निधीमधून संलग्न विभागामार्फत नविन सिमेंट बंधारा, बांधकाम व दुरुस्ती, नाला खोलीकरण कोल्हापुरी टाईप बंधारा दुरुस्ती आणि भुजल सर्वेक्षण आणि विकास यंत्रणा यांचेमार्फत रिचार्ज शाफ्ट केले असून भूजल पातळी वाढण्यासाठी या योजनांचा फायदा होत असल्याचे मत व्यक्त केले.

 

        भूजल विषयक माहिती संकलन व खुली करण्याच्या विविध पद्धती या विषयावर रितेश माटे यांनी माहिती दिली. भूजल मित्र व समूह संघटक यांचेमार्फत दरदिवशी पर्जन्यामानाच्या नोंदी ग्रामपंचायत स्तरावर घेतली जात असून भूजल पातळी दरमहा दहा निरीक्षण विहिरीची व पिझोमिटरची घेतली जात आहे. मान्सून पूर्व व मान्सूनपश्चात पाणी नमुना तपासणी केली जात असल्याची माहिती त्यांनी दिली.

 

        सन 2023-24 मध्ये अटल भूजल योजने अंतर्गत भूजल समृद्ध ग्राम स्पर्धेत 67 ग्रामपंचायतने सहभाग घेतला होता.  शेतकऱ्यांना लघुसिंचनासाठी कृषी विभागाच्या विविध योजना तसेच शेतकरी प्रोडूसर कंपनी स्थापन करण्यासाठी शासनाच्या विविध योजनेबाबत भूपेश बावनकुडे यांनी माहिती दिली. तहसिलदार राहुल पाटील यांनी अटल भूजल योजनेंतर्गत झालेल्या जलसंधारनाच्या कामामुळे भुजलात वाढ होत असून त्याचा शेतकऱ्यांना फायदा होत आहे. तर विविध प्रशिक्षणामुळे पाणी बचतीबाबत जनजागृती होत असल्याचे मत त्यांनी व्यक्त केले. ग्रामपंचायत स्तरावरील प्रशिक्षणलासुध्दा चांगला प्रतिसाद मिळत असून यांचा शेतकऱ्यांनी लाभ घ्यावा, असे आवाहन श्री. पाटील यांनी केले.

 

          कार्यक्रमाचे सूत्रसंचालन माहिती शिक्षण आणि संवाद तज्ज्ञ प्रमोद झगेकर यांनी तर आभार प्रदर्शन कृषी तज्ज्ञ दिनेश खडसे यांनी केले. खुली चर्चा सत्राच्या माध्यमातून जलसंधारण तज्ज्ञ सचिन चव्हाण यांनी संवाद साधला. यावेळी सारडा संस्थेचे समन्वयक, विषय तज्ज्ञ,  समूह संघटक व सर्व गावातील भूजल मित्र उपस्थित होते.

0000

डॉ.बाबासाहेब आंबेडकर उत्कृष्ट सार्वजनिक ग्रंथालय आणि डॉ.एस.आर.रंगनाथन उत्कृष्ट ग्रंथालय कार्यकर्ता व सेवक (ग्रंथमित्र) पुरस्कारासाठी अर्ज आमंत्रित

 

डॉ.बाबासाहेब आंबेडकर उत्कृष्ट सार्वजनिक ग्रंथालय आणि डॉ.एस.आर.रंगनाथन

उत्कृष्ट ग्रंथालय कार्यकर्ता व सेवक (ग्रंथमित्र) पुरस्कारासाठी अर्ज आमंत्रित

 

          अमरावती, दि. 28 (जिमाका):  “डॉ.बाबासाहेब आंबेडकर उत्कृष्ट सार्वजनिक ग्रंथालय पुरस्कार”आणि “डॉ.एस.आर.रंगनाथन उत्कृष्ट ग्रंथालय कार्यकर्ता व सेवक (ग्रंथमित्र) पुरस्कार” सन 2023-24 च्या पुरस्कारासाठी इच्छुक असणारी ग्रंथालये, कार्यकर्ते व सेवक यांनी विहीत नमुन्यातील अर्ज दि.25 सप्टेंबरपर्यंत तीन प्रतीत जिल्ह्यातील जिल्हा ग्रंथालय अधिकारी कार्यालयाकडे सादर करावेत, असे आवाहन जिल्हा ग्रंथालय अधिकारी डॉ. सु.गु. मडावी यांनी केले आहे.

 

          महाराष्ट्र शासनाच्या उच्च व तंत्र शिक्षण विभागांतर्गत ग्रंथालय संचालनालयाकडून राज्यातील शासनमान्य सार्वजनिक ग्रंथालयांचा गुणात्मक विकास व्हावा, ग्रंथालयांकडून जनतेला अधिक चांगल्या ग्रंथालय सेवा उपलब्ध करून द्याव्यात, वाचन संस्कृती वृध्दीगंत करण्यासाठी प्रोत्साहन मिळावे या उद्देशाने “डॉ. बाबासाहेब आंबेडकर उत्कृष्ट सार्वजनिक ग्रंथालय पुरस्कार” तसेच, ग्रंथालय चळवळीतील कार्यकर्ते व सेवक यांना भारतीय ग्रंथालय शास्त्राचे जनक डॉ. शियाली रामामृत रंगनाथन यांच्या नावाने “डॉ.एस.आर.रंगनाथन उत्कृष्ट ग्रंथालय कार्यकर्ता व सेवक (ग्रंथमित्र) पुरस्कार” देण्यात येतो.  राज्यातील शहरी व ग्रामीण विभागातील “अ” “ब” “क” “ड” वर्गातील उत्कृष्ट शासनमान्य सार्वजनिक ग्रंथालयांना अनुक्रमे 1 लक्ष, 75 हजार, 50 हजार व 25 हजार रुपये रोख रक्कम, सन्मानचिन्ह, प्रमाणपत्र व ग्रंथभेट देऊन गौरविण्यात येते.

000000

 

 

स्थानिक मच्छिमार, प्रकल्पग्रस्त, महिलांनी अर्ज करण्याचे आवाहन

 

स्थानिक मच्छिमार, प्रकल्पग्रस्त, महिलांनी अर्ज करण्याचे आवाहन

 

         अमरावती, दि. 28 (जिमाका):  जिल्ह्यातील वरुड व नांदगाव खंडेश्वर तालुक्यातील 500 हेक्टर खालील पाटबंधारे, जलसंधारण विभागाचे ‘पवनी सा. तलाव’ (36 हेक्टर) व अजनी फुलआमला तलाव (27 हेक्टर) हे दोन तलाव मत्स्यव्यसाय विभागाकडे हस्तांतरीत करण्यात आले आहे. यासाठी तलाव परिसरातील स्थानिक मच्छिमार, प्रकल्पग्रस्त व महिला यांना संस्था नोंदणी करण्यास प्राधान्य देण्यात येईल.  तरी सदर दोन तलावावर संस्था नोंदणी करण्यास इच्छुक असलेल्या स्थानिक मच्छिमार, प्रकल्पग्रस्त व मच्छिमार महिलांनी सहायक निबंधक (सहकारी संस्था), अमरावती या कार्यालयाशी संपर्क साधून बातमी प्रसिद्ध झाल्याच्या दिनांकापासून 30 दिवसांच्या कालावधीत संस्था नोंदणीसाठी प्रस्ताव सादर करावा, असे आवाहन सहायक आयुक्त मत्स्यव्यसाय एम.एम. मेश्राम यांनी केले आहे.

000000

केंद्रीय रस्ते वाहतूक व महामार्ग मंत्री नितीन गडकरी यांचा अमरावती दौरा

 

केंद्रीय रस्ते वाहतूक व महामार्ग मंत्री नितीन गडकरी यांचा अमरावती दौरा

            अमरावती, दि 28 (जिमाका) : केंद्रीय रस्ते वाहतूक व महामार्ग मंत्री नितीन गडकरी हे शुक्रवार, दि. 30 ऑगस्ट रोजी अमरावती जिल्हा दौऱ्यावर येत आहे. त्यांचा दौरा कार्यक्रम पुढीलप्रमाणे-

            शुक्रवार, दि. 30 ऑगस्ट रोजी सकाळी 11.30 वाजता नागपूर येथून वाहनाने अमरावती येथे आगमन. सकाळी 11.40 वाजता संत अच्च्युत महाराज हार्ट हॉस्पीटल मार्डी रोड, येथे प्रादेशिक ड्रायव्हिंग प्रशिक्षण केंद्राचे उद्घाटन. त्यानंतर नेमाणी गोडाऊन समोरील सिपना कॉलेज ऑफ इंजिनीअरिंग टेक्नॉलॉजीच्या रौप्य महोत्सवी सोहळ्यास उपस्थित. दुपारी 2.15 ते 4.30 पर्यत राखीव. दुपारी 5 वाजता हनुमान व्यायाम प्रसारकमंडळाचे सभागृह येथे दैनिक हिन्दुस्थानच्या अमृत महोत्सवी कार्यक्रमास उपस्थित. सायंकाळी 6.30 वाजता अमरावती येथून वाहनाने नागपूरकडे प्रयाण करतील.

00000

इतर मागास बहुजन कल्याण विभागाच्या योजनांची माहिती लाभार्थ्यांपर्यंत पोहोचविण्यासाठी तालुकास्तरावर मेळावा; लाभार्थ्यांचा उत्स्फूर्त प्रतिसाद

 

इतर मागास बहुजन कल्याण विभागाच्या योजनांची माहिती लाभार्थ्यांपर्यंत पोहोचविण्यासाठी तालुकास्तरावर मेळावा; लाभार्थ्यांचा उत्स्फूर्त प्रतिसाद

 

           अमरावती, दि. 28 (जिमाका):  इतर मागास बहुजन कल्याण विभागामार्फत मागास बहुजनासाठी शासनाच्या विविध योजना राबविण्यात येतात. या योजनांची माहिती विद्यार्थ्यांना व्हावी यासाठी तालुकास्तरावर मेळाव्याचे आयोजन करण्यात आले होते. या मेळाव्याला विद्यार्थ्यांचा उत्स्फूर्त प्रतिसाद मिळाला असून योजनेची सविस्तर माहिती मेळाव्याच्या माध्यमातून लाभार्थ्यांपर्यंत पोहोचविण्यात आली.

 

            इतर मागास बहुजन कल्याण विभागाच्या योजनांची माहिती सर्व विद्यार्थी, लाभार्थी, पालकांपर्यंत तसेच सर्व शाळा प्रमुखांपर्यत पोहोचविण्यासाठी अचलपूर, दर्यापूर, चांदुर रेल्वे, धामणगांव व चिखलदरा या तालुक्यात मेळाव्याचे आयोजन करण्यात आले होते. यावेळी योजनेची माहिती तसेच योजनेचा लाभ घेण्याकरीता आवश्यक पात्रता, अर्ज कुठे व कसे करायचा याची सविस्तर माहिती मेळाव्यामध्ये देण्यात आली. तसेच योजनेच्या अनुषंगाने मान्यवरांनी लाभार्थ्यांना मार्गदर्शन केले.

000000

 

 

 

मुख्यमंत्री युवा कार्य प्रशिक्षण योजनेंतर्गत परिवहन महामंडळात प्रशिक्षणाची संधी; शनिवारी मेळाव्याचे आयोजन

 

मुख्यमंत्री युवा कार्य प्रशिक्षण योजनेंतर्गत परिवहन महामंडळात प्रशिक्षणाची संधी;

शनिवारी मेळाव्याचे आयोजन

 

          अमरावती, दि. 28 (जिमाका): युवकांना उत्तम दर्जाचे प्रशिक्षण उपलब्ध करून देण्यासाठी शासनाने मुख्यमंत्री युवा कार्य प्रशिक्षण योजना सुरू केली आहे. या योजनेतंर्गत महाराष्ट्र राज्य परिवहन महामंडळ अमरावती विभागात विविध पदावर प्रशिक्षणार्थ्यांची निवड करण्यासाठी शनिवार दि. 31 ऑगस्ट रोजी सकाळी 10 वाजता मेळाव्याचे आयोजन करण्यात आले आहे. या मेळाव्याचा इच्छुक प्रशिक्षणार्थ्यांनी महाराष्ट्र राज्य मार्ग परिवहन महामंडळ कार्यालय, शिवाजी नगर अमरावती येथे उपस्थित राहून लाभ घ्यावा, असे आवाहन राज्य परिवहन महामंडळाचे विभाग नियंत्रक यानी केले आहे.

           

            मुख्यमंत्री युवा कार्य प्रशिक्षण योजनेतंर्गत  युवक, युवतींना त्यांच्या शिक्षणानंतर प्रत्यक्ष कामाचे प्रशिक्षण देऊन त्यांची क्षमता वाढविण्यासाठी या कार्य प्रशिक्षण योजनेंतर्गत प्रशिक्षणार्थींना शैक्षणिक अहर्तप्रमाणे 12 वी पास प्रशिक्षणार्थींना 6 हजार, आयटीआय/पदवीका यांना 8 हजार व पदवीधर/पदव्युत्तर यांना 10 हजार रुपये शासनाकडून विद्यावेतन दिले जाणार आहे. या कार्य प्रशिक्षणाचा कालावधी 6 महिने असून प्रशिक्षणार्थ्यांचे वयोमर्यादा 18 ते 35 वयोगटातील असावा.

 

            परिवहन महामंडळामध्ये प्रशिक्षणार्थी लिपीक-टंकलेखक पदाचे 67 व प्रशिक्षणार्थी लिपीक पदाचे 10 जागा, प्रशिक्षणार्थी सहायक पदाचे 60 जागा, प्रशिक्षणार्थी सहायक कारागीरचे 10 व प्रशिक्षणार्थी कारागीरचे 10 असे 157 जागेसाठी मेळाव्याचे आयोजन करण्यात आले आहे.  प्रशिक्षणार्थी लिपीक-टंकलेखक व लिपीक पदासाठी पदवीधर, टायपिंग इंग्रजी 40 श.प्र.मि., मराठी 30 श.प्र.मि., एमएस-सीआयटी पात्रता असणे आवश्यक. तर  प्रशिक्षणार्थी सहायक, सहायक कारागीर व कारागिरसाठी शासनमान्य औद्योगिक प्रशिक्षण संस्था येथून 1 किंवा 2 वर्ष कालावधी असलेला आयटीआय ट्रेड उर्त्तीर्ण असणे आवश्यक आहे.

 

          अर्ज करण्याची पद्धत : उमेदवाराने त्यांच्या शैक्षणिक पात्रतेनुसार www.rojgar.mahaswayam.gov.in या संकेतस्थळावर नोंदणी करून रिक्त पदासाठी ऑनलाईन नोंदणी करावी. किंवा प्रत्यक्ष मेळाव्याच्या ठिकाणी उपस्थित राहुन वरील प्रक्रीया करणे आवश्यक आहे. त्याचप्रमाणे रोजगार नोंदणी कार्ड असणे आवश्यक आहे.

 

         मेळाव्याच्या ठिकाणी उमेदवारांची राहण्याची, येणे-जाणेसाठी मोफत प्रवास पास दिल्या जाणार नाही. मेळाव्याकरिता उमेदवाराने स्वखर्चाने उपस्थित राहावे. यांत्रिक प्रवर्गातील उमेदवारांना दोन शिफ्टमध्ये कामगिरी करावी लागेल. उमेदवारांना नेमणूक दिलेल्या ठिकाणी कामगिरी करावी लागेल. उमेदवारांना किमान वेतन कायदा, राज्य कामगार विमा कायदा, कामगार भविष्य निर्वाह निधी कायदा, कामगार नुकसान भरपाई कायदा व औद्योगिक विवाद कायदा लागू राहणार नाही. या योजनेंतर्गत शिकाऊ उमेदवारी एनअेपीएस/एमअेपीएस पूर्ण केलेले व करीत असलेले उमेदवार पात्र राहणार नाही, अशी माहिती राज्य परिवहन महामंडळाचे विभाग नियंत्रक यांनी प्रसिद्धी पत्रकाव्दारे दिली आहे.

                                                                00000