पूरग्रस्तांच्या पाठिशी शासन खंबीरपणे उभे – मुख्यमंत्री देवेंद्र फडणवीस

पूरग्रस्तांच्या पाठिशी शासन खंबीरपणे उभे – मुख्यमंत्री देवेंद्र फडणवीस

टंचाईच्या सर्व सवलती मिळणार, जीवनावश्यक वस्तूंच्या पुरवठ्याला प्राधान्य

आपत्तीग्रस्तांकडून वसुली नको; बँकाना निर्देश

मुंबई, दि. ३० : राज्य शासन पूरग्रस्ताच्या पाठिशी खंबीरपणे उभे आहे. या भागातील शेतकरी, आपत्तीग्रस्त नागरिकांना टंचाई प्रमाणेच सर्व सवलती व उपाययोजना लागू करण्याचा निर्णय मंत्रिमंडळाने घेतला असल्याची माहिती मुख्यमंत्री देवेंद्र फडणवीस यांनी आज मंत्रिमंडळ बैठकीनंतर दिली. आपत्तीग्रस्त शेतकऱ्यांकडील कर्जाची वसुली थांबवावी, असे निर्देशही बँकाने दिल्याचे मुख्यमंत्री श्री. फडणवीस यांनी सांगितले. 

मुख्यमंत्री श्री. फडणवीस म्हणाले, शेतकरी सध्या अडचणीत आहे. हे लक्षात घेऊन बँकांना वसुली थांबवण्याचे स्पष्ट निर्देश देण्यात आले आहेत. तसेच पूरग्रस्त कुटुंबांना गहू-तांदूळ, डाळी व आवश्यक वस्तूंचे कीट वितरित करण्यात येत आहे. विहीर खचणे, शेतजमीन खरडून जाणे, अशा केंद्र सरकारच्या निकषाबाहेर जाऊन, झालेल्या नुकसानीवरही राज्य सरकार स्वतंत्र मदत करणार आहे. नुकसानीचे पंचनामे दोन-तीन दिवसांत पूर्ण होऊन पुढील आठवड्यात केंद्राला प्रस्ताव पाठवला जाणार आहे. मात्र, केंद्राच्या मदतीची वाट न पाहता राज्य सरकारने स्वतःच्या निधीतून मदत सुरू केली असून नंतर केंद्राकडून ती रक्कम ‘रिइम्बर्समेंट’च्या स्वरूपात मिळेल, असे मुख्यमंत्री श्री. फडणवीस यांनी स्पष्ट केले.

राज्यात ओला दुष्काळ जाहीर करण्याची मागणी होत असली तरी आपत्ती व्यवस्थापन नियमावलीत ( मॅन्युअल) अशी व्याख्येचा समावेश नाही. असे असले तरी टंचाई निवारण काळातील निकषांप्रमाणेच सर्व सवलती व उपाययोजना लागू करण्याचा निर्णय मंत्रिमंडळाने घेतल्याचे मुख्यमंत्री श्री. फडणवीस यांनी स्पष्ट केले.

DIO NEWS AMRAVATI 30-09-2025

                                             सेवा पंधरवड्यात भटके, विमुक्तांना लाभाचे वाटप

अमरावती, दि. 30 (जिमाका) : सेवा पंधरवड्यानिमित्त महसूल विभागातर्फे महाराजस्व अभियानातून विविध उपक्रम राबविण्यात येत आहे. यात अमरावती तहसिल कार्यालयातर्फे भटके, विमुक्त जातीच्या नागरिकांना विविध लाभाचे वाटप करण्यात आले.

तहसिल कार्यालयातील कार्यक्रमाला आमदार रवि राणा, राजेश वानखडे, उपविभागीय अधिकारी अनिल भटकर, तहसिलदार विजय लोखंडे आदी उपस्थित होते.

श्री. राणा यांनी या उपक्रमामुळे नागरिकांना तातडीने सोयीसुविधा उपलब्ध होत आहेत. घरकुल, पट्टेवाटप यामुळे समाजातील शेवटच्या घटकांना न्याय मिळणार आहे. प्रशासनाच्या या उपक्रमामुळे वंचित घटकांना आधार मिळेल. गावठाणातील घरांसाठी गावाची हद्द वाढविण्याची सूचना आली आहे. त्यामुळे वाढीव गावाला मान्यता मिळणार आहे. येत्या काळात राज्यात सर्वाधिक पट्टे वाटप अमरावतीमध्ये व्हावे, अशी अपेक्षा व्यक्त केली. तसेच पावसामुळे शेतपिकांचे नुकसान झाले आहे. याची माहिती देण्यात आली आहे. त्यामुळे दिवाळीच्या आत शेतकऱ्यांना नुकसान भरपाई देण्यात येणार असल्याचे त्यांनी यावेळी सांगितले.

श्री. वानखडे यांनी वंचित घटकांना सर्व सुविधा मिळाव्यात यासाठी घेण्यात आलेल्या कार्यक्रमाचा नागरिकांनी लाभ घ्यावा. प्रत्येकाला घर मिळाल्यास कुटुंबाची स्थायी व्यवस्था होणार आहे. एका ठिकाणी भटक्या, विमुक्त जाती स्थायी झाल्यास त्यांना शासनाच्या योजनांचा लाभ मिळण्यास मदत होणार असल्याचे सांगितले.

श्री. भटकर यांनी प्रास्ताविक केले. निरीक्षण अधिकारी चैताली यादव यांनी सूत्रसंचालन केले. यावेळी पट्टेवाटप, कृषि निविष्ठा, तसेच विविध प्रमाणपत्र वाटप करण्यात आले.

000000

डॉ. बाबासाहेब आंबेडकर सामाजिक न्याय भवनात

ज्येष्ठ नागरिकांसाठी आज मोफत आरोग्य तपासणी

            अमरावती, दि. 30 (जिमाका): सामाजिक न्याय व विशेष सहाय्य विभागाअंतर्गत , उद्या, 1 ऑक्टोबर 2025 रोजी जागतिक ज्येष्ठ नागरिक दिन साजरा करण्यात येत आहे. त्याअनुषंगाने ज्येष्ठ नागरिकांच्या आरोग्य तपासणी शिबिराचे भारतरत्न डॉ. बाबासाहेब आंबेडकर सामाजिक न्याय भवन, पोलिस आयुक्तालयाच्या मागे, चांदूर रेल्वे रोड, अमरावती येथे आयोजन करण्यात आले आहे.

या आरोग्य तपासणी शिबीरासाठी जिल्हा शल्य चिकित्सक रूग्णालय, अमरावती यांच्या वैद्यकीय चमू मार्फत नेत्ररोगतज्ज्ञ, दंतरोगतज्ज्ञ, अस्थीरोगतज्ज्ञ, त्वचारोगतज्ज्ञ, मेडिसिन, बी. पी. मधुमेह इत्यादी तपासणी करण्यात येणार आहेत. ज्येष्ठ नागरिकांसाठी काम करणाऱ्या बिगर सरकारी संस्थांचा सत्कार, गौरव, आरोग्य शिबिर, चर्चासत्र, परिसंवाद या सारख्या विविध कार्यक्रमांचे आयोजन समाज कल्याणच्या वतीने करण्यात येत आहे. तसेच या कार्यक्रमांच्या माध्यमातून ज्येष्ठ नागरिकांसाठी कायदे व योजनाविषयक बाबींची माहिती, वृध्दांचे हक्क, ज्येष्ठ नागरिकांना देणात येणाऱ्या सोयी-सुविधा, इत्यादीबाबत मार्गदर्शन करण्यात येणार आहेत. या कार्यक्रमांसाठी जिल्हाधिकारी आशिष येरेकर यांची प्रमुख अतिथी म्हणून उपस्थित राहणार आहे.

तरी या शिबिराचा लाभ घेण्यासाठी जिल्ह्यातील ज्येष्ठ नागरिकांनी आरोग्य तपासणी शिबिर,  स्थळ डॉ. बाबासाहेब आंबेडकर सामाजिक न्याय भवन, सीपी ऑफीसच्या मागे, चांदूर रेल्वे रोड, अमरावती येथे उद्या, दि. 1 ऑक्टोबर रोजी सकाळी 10 वाजता उपस्थित राहून आपली  वैद्यकीय तपासणी करून घ्यावी, असे आवाहन समाज कल्याणचे सहायक आयुक्त राजेंद्र जाधवर यांनी केले आहे.

000000

नैसर्गिक आपत्ती मदतीतून कर्जवसुली करू नका!

बँकांना जिल्हा प्रशासनाचे स्पष्ट निर्देश

            अमरावती, दि. 30 (जिमाका): जिल्ह्यांमध्ये गारपीट आणि अतिवृष्टीमुळे झालेल्या शेतीपिके व इतर नुकसानीपोटी राज्य शासनाकडून बाधितांना देण्यात आलेल्या मदतीमधून कोणत्याही कर्ज खात्यात वसुली करण्यात येऊ नये, असे स्पष्ट आवाहन जिल्हा प्रशासनाने सर्व बँकांना केले आहे.

शासनाकडून वेळोवेळी आदेश निर्गमित करून शेतकऱ्यांच्या बँक खात्यावर थेट मदत जमा केली जाते. मात्र, काही बँकांकडून शेतकऱ्यांनी घेतलेल्या कर्जाची रक्कम या मदतीच्या रकमेतून परस्पर वसूल केल्याचे निदर्शनास आले आहे.

या गंभीर बाबीची नोंद घेत, गारपीट व अवेळी पावसामुळे शेतीपिकांचे व बहुवार्षिक पिकांच्या नुकसानीसाठी वाटप केलेल्या मदतीची रक्कम शेतकऱ्यांच्या बँक खात्यावर जमा करताना, मदतीच्या रकमेमधून कोणत्याही प्रकारची वसुली बँकांनी शेतकऱ्यांच्या कुठल्याही कर्ज खात्यामध्ये करू नये, असे स्पष्ट निर्देश जिल्हाधिकारी आशिष येरेकर यांनी दिले आहे. या संदर्भात कोणत्याही अडचणी किंवा तक्रारी असल्यास, 9923844044 किंवा 9970709824 या भ्रमणध्वनीवर संपर्क साधण्याचे आवाहन  प्रशसनामार्फत करण्यात आले आहे. नैसर्गिक आपत्तीच्या काळात मिळालेली ही मदत शेतकऱ्यांसाठी दिलासा असल्याने, ती पूर्णपणे त्यांच्या उपयोगासाठी उपलब्ध राहील याची खबरदारी घेण्याचे निर्देश देण्यात आले आहेत.

0000000

राजा राममोहन रॉय ग्रंथभेट योजना: निवडलेल्या ग्रंथांवरील

हरकतींसाठी 15 ऑक्टोबरपर्यंत मुदत

            अमरावती, दि. 30 (जिमाका): राजा राममोहन रॉय ग्रंथालय प्रतिष्ठान, कोलकाता आणि महाराष्ट्र शासनाच्या संयुक्त निधीतून राबविण्यात येणाऱ्या 50 व्या ग्रंथभेट योजनेंतर्गत निवड झालेल्या 1 हजार 388 ग्रंथांची यादी ग्रंथालय संचालनालयाने प्रसिद्ध केली आहे. सन 2023 मध्ये प्रकाशित व संचालनालयास प्राप्त झालेल्या ग्रंथांपैकी राज्य ग्रंथालय नियोजन समितीच्या उपसमितीने ही निवड केली आहे. यामध्ये मराठी (749), हिंदी (297) आणि इंग्रजी (342) ग्रंथांचा समावेश आहे. ही यादी ग्रंथालय संचालनालयाच्या www.dol.maharashtra.gov.in या संकेतस्थळावर 15 ऑक्टोबर 2025 या कालावधीत अवलोकनार्थ खुली ठेवण्यात आली आहे. या ग्रंथयादीतील ग्रंथ किमान 25 टक्के सूटदराने वितरित करणे बंधनकारक आहे. या यादीतील कोणत्याही ग्रंथाबाबत सूचना, हरकती किंवा आक्षेप असल्यास, ते दि. 15 ऑक्टोबर 2025 पर्यंत ग्रंथालय संचालक, ग्रंथालय संचालनालय, महाराष्ट्र राज्य, नगर भवन, मुंबई- ४०० ००१ यांच्याकडे लेखी स्वरुपात कार्यालयीन वेळेत हस्तबटवड्याने वा पोस्टाने अथवा उपरोक्त नमूद केलेल्या ई-मेलवर पाठवावेत. मुदतीनंतर प्राप्त झालेल्या सूचनांचा, हरकतींचा किंवा आक्षेपांचा विचार केला जाणार नाही. यादीत ग्रंथांचे नाव, लेखक, प्रकाशक व किंमत यामध्ये काही बदल असल्याचे निदर्शनास आणून दिल्यास स्वागतार्ह असेल, असे आवाहन प्र. ग्रंथालय संचालक अशोक गाडेकर यांनी केले आहे.

00000

अण्णासाहेब पाटील महामंडळाकडून उद्योजकांना

व्याज परताव्यासोबतच मिळणार व्यवसाय प्रशिक्षण

            अमरावती, दि. 30 (जिमाका): आर्थिकदृष्ट्या मागासलेल्या तरुणांना सक्षम उद्योजक बनवण्यासाठी कार्यरत असलेल्या अण्णासाहेब पाटील आर्थिक मागास विकास महामंडळने आता केवळ बँक कर्जावरील व्याज परतावा योजनाच नाही, तर लाभार्थ्यांना त्यांच्या व्यवसायासाठी आवश्यक असलेले प्रशिक्षण व मेंटॉरशिप देखील देण्यात येणार आहे. हा निर्णय तरुण उद्योजकांना आर्थिक मदतीसह त्यांना व्यवसाय यशस्वीपणे चालवण्यासाठी आवश्यक ज्ञान आणि कौशल्ये मिळवून देण्याच्या उद्देशाने घेण्यात आला असल्याची माहिती महामंडळाचे व्यवस्थापकीय संचालक विजयसिंह देशमुख यांनी दिली आहे.

महामंडळाच्या वतीने त्वरीत कार्यवाही सुरु करुन, 'उद्योग-सारथी' प्रशिक्षण नुकतेच ऑनलाईन वेबिनारचे आयोजन करण्यात आले होते. या वेबिनारमध्ये राज्यभरातील इच्छुक लाभार्थ्यांनी सहभाग घेतला. पशुपालन आणि दुग्ध व्यवसाय या महत्त्वपूर्ण विषयावर पुणे कृषी विद्यालयाचे प्रमुख शास्त्रज्ञ डॉ. सोमनाथ माने यांनी मार्गदर्शन केले. हे वेबिनार युट्यूब समवेत फेसबुकवर देखील लाईव्ह स्वरुपात दाखविण्यात आले होते. यावेळी डॉ. माने यांनी दुग्धव्यवसायात यशस्वी होण्यासाठी आवश्यक असलेल्या अनेक बाबींवर प्रकाश टाकला. यामध्ये उत्तम जातीच्या जनावरांची निवड (उदा. गीर, साहिवाल, जर्सी), जनावरांच्या आरोग्यासाठी आणि दूध उत्पादन वाढवण्यासाठी संतुलित आहार (हिरवा व सुका चारा, आवश्यक खनिज मिश्रणे), तसेच जनावरांना होणारे आजार, प्रतिबंधात्मक उपाययोजना, वेळोवेळी लसीकरण आणि स्वच्छतेचे नियम याबद्दल सखोल माहिती दिली.

000000

शिक्षकांनी वेळेत अर्ज दाखल करावेत - जिल्हाधिकारी आशिष येरेकर

*शिक्षक मतदारसंघाच्या मतदारयाद्यांचा कार्यक्रम जाहीर

अमरावती, दि. 30 (जिमाका) : अमरावती विभागातील शिक्षक विधानपरिषद मतदारसंघाच्या मतदारयाद्या तयार करण्याचा कार्यक्रम भारत निवडणूक आयोगाने जाहीर केला आहे. दिनांक 1 नोव्हेंबर 2025 या अर्हता दिनांकावर आधारित नव्याने याद्या तयार करण्यात येणार आहे. सर्व पात्र शिक्षकांनी वेळेत अर्ज दाखल करावेत, असे आवाहन जिल्हाधिकारी तथा सहायक मतदान नोंदणी अधिकारी आशिष येरेकर यांनी केले आहे.

मतदार नोंदणी कार्यक्रमामध्ये दि. 30 सप्टेंबर रोजी जाहीर सूचना प्रसिद्ध करण्यात आली आहे. दि. ६ नोव्हेंबरपर्यंत नमुना १९ द्वारे दावे स्वीकारण्यात येणार आहे. दि. 20 नोव्हेंबर रोजी प्रारूप मतदार याद्यांची छपाई करण्यात येणार आहे. दि. 25 नोव्हेंबर रोजी प्रारूप मतदार याद्यांची प्रसिद्धी केली जाईल. यावरील दावे व हरकती दि. 25 नोव्हेंबर 2025 ते दि. 10 डिसेंबर या कालावधीत स्वीकारण्यात येतील. दि. 25 डिसेंबर रोजी दावे व हरकती निकाली काढणे आणि पुरवणी यादी तयार करण्यात येणार आहे. दि. 30 डिसेंबर रोजी मतदार यादीची अंतिम प्रसिद्धी करण्यात येणार आहे.

लोकप्रतिनिधित्त्व अधिनियम 1950 च्या अधिनियम 27 (3) (ब) नुसार राज्य शासनाने निवडणूक आयोगाच्या मान्यतेने निश्चित केलेल्या माध्यमिक शाळेपेक्षा कमी दर्जा नसलेल्या शैक्षणिक संस्थांमध्ये अर्हता दिनांकाच्या पूर्वीच्या लगतच्या 6 वर्षांमध्ये किमान 3 वर्ष पूर्णवेळ शिक्षक म्हणून कार्यरत असलेले शिक्षक मतदार म्हणून नोंदणीस पात्र आहेत. यासाठी पात्र शिक्षकांना सुधारीत नमुना क्रमांक 19 मध्ये आवश्यक रहिवासाचा पुरावा व प्रमाणपत्रांसह अर्ज सादर करता येईल.

शिक्षक मतदारसंघासाठी मतदारयादी नव्याने तयार करण्यात येणार आहे. यासाठी पूर्वी नोंदणी केलेली असली तरी यावेळी नव्याने नोंदणी करावी लागणार आहे. या नोंदणीसाठी अर्ज पदनिर्देशित अधिकारी, सहायक मतदार नोंदणी अधिकारी कार्यालयामध्ये सादर करता येतील. एकगठ्ठा अर्ज विचारात घेतले जाणार नाहीत, पात्र शैक्षणिक संस्थेचे प्रमुख त्यांच्या संस्थेतील सर्व पात्र कर्मचाऱ्यांचे अर्ज एकत्रित पाठवू शकतील.

निवडणुकीसाठी मतदार नोंदणी अधिकारी म्हणून विभागीय आयुक्त डॉ. श्वेता सिंघल, सहायक मतदार नोंदणी अधिकारी म्हणून जिल्हाधिकारी आशिष येरेकर आणि जिल्ह्यातील सर्व उपविभागीय अधिकारी कार्यरत राहणार आहे. तसेच जिल्ह्यातील सर्व तहसीलदार पदनिर्देशित अधिकारी राहणार आहेत. अमरावती विभाग शिक्षक विधानपरिषद मतदारसंघासाठी पात्र शिक्षकांनी नोंदणी करावी, असे आवाहन जिल्हाधिकारी श्री. येरेकर यांनी केले आहे.

00000

महाराष्ट्र 1 ट्रिलियन डॉलर अर्थव्यवस्थेच्या दिशेने: अमरावतीतील उद्योजकांना

'मैत्री' पोर्टलचा लाभ घेण्याचे आवाहन

अमरावती, दि. 30 (जिमाका): महाराष्ट्र राज्याची अर्थव्यवस्था सन 2027 पर्यंत 1 ट्रिलियन डॉलर्सपर्यंत पोहोचविण्याचे महाराष्ट्र शासनाचे ध्येय आहे. या ध्येयपूर्तीसाठी आणि राज्यात उद्योग स्थापन करण्यासाठी उद्योग, व्यापार व सेवा क्षेत्रातील गुंतवणूकदारांना सर्व आवश्यक परवाने, मंजुरी, ना-हरकती, सवलती व तक्रार निवारण या सेवांचा वेगवान, पारदर्शक आणि सुलभपणे लाभ एकाच ठिकाणी देण्यासाठी एक खिडकी प्रणाली म्हणून उद्योग विभागांतर्गत 'मैत्री' कक्षाची स्थापना करण्यात आलेली आहे. जिल्ह्यामध्ये सध्या सुक्ष्म, लघु व मध्यम उपक्रमाअंतर्गत एकूण 1 लाख 6  हजार 390 उद्योग (1, लाख 5 हजार 540 सूक्ष्म, 807 लघु व 43 मध्यम) नोंदणीकृत आहेत. या उद्योजकांना लाभ व्हावा यासाठी मैत्री 2.0 पोर्टलवर 14 विभागांच्या 124 सेवा एकत्रित करून उपलब्ध करून दिलेल्या आहेत. यात एक खिडकी अर्ज प्रणाली (https://maitri.maharashtra.gov.in), तक्रार समस्या निवारण , हेल्पलाईन मदत कक्ष (Call Centre) - क्रमांक 1800 233 2033, गुंतवणूकदारांचा मार्गदर्शक आणि प्रोत्साहन गणना यांसारख्या सेवांचा समावेश आहे. वरील प्रमाणे सेवांचा लाभ आपल्या जिल्ह्यातील सर्व उद्यमी यांना व्हावा, ज्यामुळे जिल्ह्यातील उद्योगाची वाढ होण्यास मोठी मदत होईल आणि एकूणच जिल्ह्यांच्या आर्थिक विकासाला चालना मिळेल यासाठी जिल्ह्यातील जास्तीत जास्त उद्योजक व गुंतवणूकदारांनी वरील सेवांचा लाभ घ्यावा, असे आवाहन जिल्हा उद्योग केंद्राचे महाव्यवस्थापक यांनी केले आहे.

000000

जिल्हा लोकशाही दिन येत्या सोमवारी

            अमरावती, दि. 30 (जिमाका) : जिल्हा लोकशाही दिन सोमवार, दिनांक 6 ऑक्टोबर 2025 रोजी दुपारी  11 वाजता जिल्हाधिकारी कार्यालयात आयोजित करण्यात आला आहे. तरी संबंधितांनी अहवालासह व्यक्तिश: उपस्थित राहण्याचे आवाहन अधीक्षक निलेश खटके  यांनी केले आहे.

00000

DIO NEWS AMRAVATI 29-09-2025

 माजी सैनिकांना फोनद्वारे कौन्सिलिंग करून करिअर प्रशिक्षण देणार;

15 ऑक्टोबरपर्यंत नाव नोंदणी करण्याचे आवाहन

अमरावती, दि. 29 (जिमाका): देशाची सेवा करून निवृत्त झालेल्या सर्व माजी सैनिकांना त्यांच्या आवडीच्या आणि इच्छित असलेल्या क्षेत्रात (सेक्टरमध्ये) काम करण्याची संधी उपलब्ध व्हावी, यासाठी पुणे येथील कॅरियर डेव्हलपमेंट अँड रिसर्च इन्स्टिट्यूट या संस्थेने एक महत्त्वाकांक्षी योजना जाहीर केली आहे. या योजनेअंतर्गत, इच्छुक माजी सैनिक उमेदवारांना फोनद्वारे समुपदेशन (कौन्सिलिंग) करून त्यांना योग्य ते कौशल्य प्रशिक्षण देण्यात येणार आहे. या समुपदेशनामुळे माजी सैनिकांना त्यांच्या क्षमता आणि बाजारपेठेतील मागणीनुसार नवीन करिअर मार्ग निवडण्यास मदत होणार आहे. जिल्हा सैनिक कल्याण अधिकारी, सेना मेडल निवृत्त मेजर आनंद पाथरकर यांनी जिल्ह्यातील सर्व माजी सैनिकांना या संधीचा लाभ घेण्याचे आवाहन केले आहे. इच्छुकांनी आपले नाव जिल्हा सैनिक कल्याण कार्यालय, अमरावती येथे 15 ऑक्टोबर 2025 या अंतिम मुदतीपूर्वी नोंदवावी, असे त्यांनी कळविले आहे. 

 

000000

संजय गांधी, श्रावणबाळ योजनेच्या दिव्यांग लाभार्थ्यांनी

'यूडीआयडी कार्ड'सह प्रमाणपत्रांची पडताळणी तात्काळ करावी

अमरावती, दि. 29 (जिमाका): अमरावती शहर संजय गांधी कार्यालयाच्या वतीने संजय गांधी निराधार आणि श्रावणबाळ राज्य निवृत्ती वेतन योजनेच्या सर्व दिव्यांग लाभार्थ्यांना आवाहन करण्यात येते की, शासन निर्देशानुसार, ज्या दिव्यांग लाभार्थ्यांचे मागील महिन्यात तांत्रिक कारणामुळे अनुदान जमा होऊ शकले नाही, अशा लाभार्थ्यांच्या दिव्यांग प्रमाणपत्राची पडताळणी करणे आवश्यक आहे. ही पडताळणी पूर्ण केल्याशिवाय त्यांना वाढीव अनुदान मिळणार नाही. त्यामुळे, संबंधित लाभार्थ्यांनी त्यांची मूळ कागदपत्रे म्हणजेच आधार कार्ड, अपंगत्वाचे प्रमाणपत्र आणि यूडीआयडी कार्ड घेऊन शहर संजय गांधी कार्यालय, अमरावती येथे तात्काळ संपर्क साधावा. ज्या लाभार्थ्यांनी आपल्या प्रमाणपत्राची पडताळणी करून घेतली नाही, त्यांना पुढील महिन्यापासून संजय गांधी निराधार योजनेचे अनुदान मिळणार नाही आणि अनुदानात खंड पडल्यास त्यासाठी लाभार्थी स्वतः जबाबदार राहतील, याची गंभीर नोंद घ्यावी. लाभार्थ्यांनी त्वरित कार्यवाही करून आपले अनुदान सुनिश्चित करावे, असे आवाहन शहर संजय गांधी कार्यालयाच्या तहसिलदारांनी केले आहे.

0000

 ओबीसी, ईबीसी विद्यार्थ्यांसाठी शिष्यवृत्ती; आज अंतिम मुदत

अमरावती, दि. 29 (जिमाका): ओबीसी, ईबीसी (आर्थिकदृष्ट्या मागास) आणि डीएनटी (विमुक्त जाती, भटक्या जमाती) प्रवर्गातील गुणवंत विद्यार्थ्यांना इयत्ता 9 वी ते 12 वी पर्यंत उत्तम दर्जाचे शिक्षण घेण्यासाठी केंद्र शासनाची महत्त्वाकांक्षी "Top Class Education in School for OBC, EBC & DNT Students Under PM YASASVI" ही योजना सुरू आहे. या योजनेचा लाभ घेण्यासाठी अर्ज करण्याची अंतिम मुदत 30 सप्टेंबर 2025 आहे. या योजनेंतर्गत 9 वी-10 वीच्या विद्यार्थ्याला वार्षिक  75 हजार रुपये तर 11 वी व 12 वीच्या विद्यार्थ्याला  1 लाख 25 हजारपर्यंत आर्थिक मदत दिली जाते. या मदतीमध्ये वसतिगृह शुल्क, परीक्षा शुल्क, पुस्तके, गणवेश आणि कोचिंग फीचा समावेश आहे. योजनेसाठी विद्यार्थ्याच्या कुटुंबाचे वार्षिक उत्पन्न अडीच लाखांपेक्षा कमी असावे. निवड मागील वर्गातील गुणांवर आधारित मेरिट यादीनुसार होणार आहे, ज्यात 30 टक्के जागा मुलींसाठी राखीव आहेत. ही शिष्यवृत्तीची रक्कम डीबीटीद्वारे थेट विद्यार्थ्यांच्या खात्यात जमा केली जाईल. इतर मागास बहुजन कल्याण विभागाचे सहाय्यक संचालक गजेंद्र मालठाणे यांनी जिल्ह्यातील पात्र विद्यार्थी तसेच टॉप क्लास शाळांच्या मुख्याध्यापकांना राष्ट्रीय शिष्यवृत्ती पोर्टल (NSP) वर विद्यार्थ्यांचे अर्ज तातडीने भरून कार्यवाही पूर्ण करण्याचे आवाहन केले आहे. आधार-आधारित उपस्थिती आणि नियमित शैक्षणिक प्रगती या अटींचे पालन करणे अनिवार्य आहे.

000000

पेसा क्षेत्रात कंत्राटी शिक्षक भरतीसाठी अर्ज करण्याचा आज शेवटचा दिवस

अमरावती, दि. 29 (जिमाका): अमरावती जिल्ह्यातील पेसा क्षेत्रातील शाळांमध्ये तात्पुरत्या स्वरूपात कंत्राटी शिक्षक भरतीसाठी अर्ज करण्याची अंतिम मुदत 30 सप्टेंबर 2025 आहे. अनुसूचित जमाती आणि इतर प्रवर्गातील (D.Ed/B.Ed + TAIT/TET/CTET उत्तीर्ण) पात्र उमेदवारांकडून अर्ज मागविण्यात येत आहेत.

रिक्त पदांच्या तुलनेत अनुसूचित जमातीचे उमेदवार उपलब्ध न झाल्यास, इतर प्रवर्गातील उमेदवारांची मानधन तत्त्वावर नियुक्ती होईल. इच्छुक उमेदवारांनी आपले अर्ज उद्यापर्यंत शिक्षणाधिकारी (प्राथमिक), जि.प. अमरावती यांच्या कार्यालयात सादर करावेत. इतर जिल्ह्यांचे अर्ज ग्राह्य धरले जाणार नाहीत. निवड करताना पेसा क्षेत्रातील उमेदवारांना प्राधान्य मिळेल. अधिक माहिती www.zpamravati.gov.in वर उपलब्ध आहे.

                                                                                                                                             

00000

स्वाधार अर्जातील त्रुटी पूर्तता करण्याचे आवाहन

अमरावती, दि. 29 (जिमाका): भारतरत्न डॉ. बाबासाहेब आंबेडकर स्वाधार योजनेचा लाभ घेणाऱ्या अनुसूचित जाती (SC) व नवबौद्ध प्रवर्गातील विद्यार्थ्यांसाठी समाज कल्याण विभागाने एक महत्त्वपूर्ण सूचना जारी केली आहे. शासकीय वसतिगृहात प्रवेश न मिळालेल्या इयत्ता 11 वी, 12 वी तसेच व्यावसायिक व अव्यावसायिक अभ्यासक्रमांतील विद्यार्थ्यांच्या निवास, भोजन आणि शैक्षणिक खर्चासाठी ही योजना राबविली जाते. सन 2024-25 साठी ज्या विद्यार्थ्यांनी अर्ज केले आहेत, मात्र आवश्यक कागदपत्रे किंवा शासन निर्णयातील अटींनुसार त्रुटी पूर्तता न केल्यामुळे त्यांचे अर्ज प्रलंबित आहेत, त्यांनी ही बातमी प्रसिद्ध झाल्यापासून सात दिवसांच्या आत त्रुटींची पूर्तता करावी. विलंब झाल्यास याची सर्वस्वी जबाबदारी लाभार्थी विद्यार्थ्यांची राहील आणि अनुदानाचा थेट लाभ मिळणार नाही. विद्यार्थ्यांनी सर्व आवश्यक कागदपत्रे घेऊन सामाजिक न्याय भवन, सहायक आयुक्त, समाज कल्याण, अमरावती येथे कार्यालयीन वेळेत त्वरित संपर्क साधावा, असे आवाहन सहायक आयुक्त आर. व्ही. जाधवर यांनी केले आहे. अधिक माहितीसाठी विद्यार्थी 0721−2661261 या दूरध्वनी क्रमांकावर संपर्क साधू शकतात.

000000

रेल्वे उड्डाणपूलाच्या सुरक्षिततेसाठी

रेल्वेकडून तातडीच्या उपाययोजना

अमरावती, दि. 29 (जिमाका) : राजकमल रेल्वे उड्डाणपूलाच्या सुरक्षिततेबाबत जिल्हा आपत्ती व्यवस्थापन प्राधिकरण आणि जिल्हाधिकारी आशिष येरेकर यांनी  दिलेल्या निर्देशानुसार मध्य रेल्वेच्या भुसावळ विभागाने तातडीने कार्यवाही केली आहे. उड्डाणपूल वाहतुकीसाठी बंद असला तरी रेल्वे वाहतुकीच्या सुरक्षिततेसाठी आवश्यक त्या उपाययोजना केल्याचे रेल्वे प्रशासनाने कळविले आहे.

सार्वजनिक बांधकाम विभागाने केलेल्या स्ट्रक्चरल ऑडिटनुसार हा पूल वाहनांच्या वाहतुकीकरिता असुरक्षित घोषित करण्यात आला आहे. त्यानंतर 25 ऑगस्ट 2025 पासून या पुलावरील वाहनांची आणि पादचाऱ्यांची वाहतूक जिल्हाधिकाऱ्यांच्या आदेशानुसार बंद करण्यात आली आहे. पुलाखालून दररोज रेल्वे गाड्या धावत असल्याने संभाव्य आपत्तीचा धोका लक्षात घेऊन जिल्हाधिकाऱ्यांनी दि. 18 सप्टेंबर 2025 रोजी रेल्वे आणि सार्वजनिक बांधकाम विभागाला संयुक्त पाहणी करून रेल्वे वाहतूक थांबवण्याबाबत किंवा वळवण्याबाबत अहवाल देण्याचे निर्देश दिले.

त्यानुसार रेल्वे प्रशासनाने कार्यवाही केली आहे. रेल्वे विभाग आणि सार्वजनिक बांधकाम विभाग व स्ट्रक्चरल ऑडिट सल्लागार यांच्या संयुक्त पथकाने दि. 18 व 19 सप्टेंबर 2025 रोजी पुलाची पाहणी केली. त्यानुसार राजकमल पुलाखालून रेल्वे वाहतुकीला कोणताही तात्काळ धोका नाही. संयुक्त पाहणी अहवालानुसार, पुलावर वाहनांची वाहतूक पूर्णपणे थांबविल्यामुळे त्यावर कोणतेही 'गतिमान भारण' नाही. सध्या हा पूल फक्त स्वतःचे 'डेड लोड' घेण्यास सक्षम आहे. त्यामुळे पुलाखालून धावणाऱ्या रेल्वे वाहतुकीला कोणताही तात्काळ धोका नाही. परिणामी सध्या रेल्वे वाहतूक थांबवण्याची किंवा वळवण्याची गरज नाही.

पुलामुळे संभाव्य निर्माण होणारा अपघात लक्षात घेता 24 तास निगराणी करण्याच्या सूचना देण्यात आल्या आहे. याबाबत रेल्वे विभागाने पुलाच्या ठिकाणी संरचनात्मक बिघाडाच्या सर्व चिन्हावर त्वरित लक्ष ठेवण्यासाठी पूर्णवेळ वॉचमन तैनात करण्यात आला आहे.

शहराच्या वाहतुकीतील रेल्वे पुलाचे महत्व लक्षात घेता पुलाच्या पुनर्बांधणीची प्रक्रिया सुरू करण्यात आली आहे. रेल्वे पुलाचे 'डिसमँटलिंग' म्हणजेच पाडकाम (रेल्वे स्पॅन) करण्याची योजना अंतिम करण्याच्या आणि त्यासाठीचा खर्च अंदाजित करण्याच्या प्रक्रियेत आहे. तसेच पुलावरील वाहतुकीचे महत्त्व लक्षात घेता वेळेची मर्यादा पाळण्यात येणार आहे. यासाठी निविदा प्रक्रिया पूर्ण झाल्यावर रेल्वे विभाग पुलाचे पाडकाम अंदाजित चार महिन्यांत पूर्ण करण्याचे नियोजन करण्यात आले आहे.

रेल्वे विभागाने सार्वजनिक बांधकाम विभागाला आयआयटी, व्हीएनआयटीसारख्या संस्थांकडून पुलाचे स्ट्रक्चरल ऑडिट करून घेण्याची आणि 'टिल्ट मीटर्स', 'क्रॅक प्रोपगेशन गेजेस' यांसारख्या तांत्रिक मॉनिटरिंग प्रणाली बसवण्याची सूचना केली आहे.

जिल्हाधिकारी यांच्या आदेशानुसार सार्वजनिक बांधकाम विभागाचे अधीक्षक अभियंता प्रतीक गिरी, रेल्वेचे उपविभागीय अभियंता श्रीकृष्ण गोमकाळे, सहाय्यक अभियंता एन प्रकाश रेड्डी स्ट्रक्चरल ऑडिट सल्लागार कन्स्ट्रक्शन मॅजिक यांनी संयुक्तपणे रेल्वे पुलाची पाहणी केली. सार्वजनिक बांधकाम विभागाने पुलाची दोन भागात पाहणी केली. या पाहणीत बेलपुराकडील रेल्वे पुलाला बारीक तडे, तर रायली प्लॉटकडील संपूर्ण पुलाला तडे गेल्याचे निदर्शनास आले आहे. मात्र सद्यस्थितीत पुलावरून कोणतीही वाहतूक होत नसल्याने पुलाखालील वाहतुकीला कोणताही धोका नाही. त्यामुळे ही वाहतूक सुरळीत सुरू राहील. पुलावरील वाहतुकीला प्रतिबंध घालण्यात आल्यामुळे पुलाच्या दोन्ही बाजूला भिंत उभारण्यात आली आहे. या ठिकाणी सुरक्षिततेच्या उपाययोजना करण्यात आल्या आहे. तसेच पुलाजवळ कोणत्याही प्रकारची वाहने उभी करण्यास मनाई करण्यात आली आहे.

रेल्वे पुल संरचनेच्या सुरक्षिततेची आणि देखरेखीची काळजी घेण्यात येत आहे. जिल्हाधिकारी कार्यालयाने केलेल्या सूचना काटेकोरपणे पालन करण्यात येत आहे. तसेच आवश्यक ती खबरदारी घेण्यासाठी निर्देश देण्यात आले आहे.

0000000

DIO NEWS AMRAVATI 26-09-2025

                                                        ग्रामीण भागात  कलम 37(1) व (3) लागू

          अमरावती, दि. 26 (जिमाका) :  जिल्ह्यात शांतता व सुव्यवस्था अबाधित राहावी, यासाठी पोलीस अधीक्षक (ग्रामीण), अमरावती  यांनी महाराष्ट्र पोलिस अधिनियम 1951 चे कलम 37 (1) व (3) अन्वये प्रतिबंधात्मक आदेश जारी केला आहे.

 

            सदर प्रतिबंधात्मक आदेश जिल्ह्यातील कायदा व सुव्यवस्था अबाधित राहावी, याकरिता पोलिस आयुक्तालय परिक्षेत्र वगळून अमरावती जिल्ह्यातील ग्रामीण भागात लागू करण्यात आला असून दि. 6 ऑक्टोबर 2025 च्या मध्यरात्रीपर्यंत लागू राहील. या कलमाचा भंग करणाऱ्या व्यक्तीविरूध्द कायदेशीर कारवाई करण्यात येईल, असे अपर जिल्हादंडाधिकारी  अनिल भटकर  यांनी कळविले आहे.

0000

शासकीय वसतिगृहात प्रवेश प्रक्रिया सुरू, ऑनलाईन अर्ज सादर करण्याचे आवाहन

अमरावती, दि. 26 (जिमाका): जिल्ह्यातील अनुसूचित जाती, अनुसूचित जमाती, विजाभज, इतर मागास वर्ग आणि आर्थिक मागास प्रवर्गातील उत्तीर्ण झालेल्या विद्यार्थ्यांना सामाजिक न्याय विभागांतर्गत कार्यरत असलेल्या मागासवर्गीय मुला-मुलींच्या शासकीय वसतिगृहांमध्ये शैक्षणिक वर्ष 2025-26 साठी प्रवेश प्रक्रिया सुरू झाली आहे. या वसतिगृहांमध्ये प्रवेशित विद्यार्थ्यांना सर्व सोयी-सुविधा मोफत पुरविण्यात येतात. शैक्षणिक वर्ष 2025-26 साठी ज्या विद्यार्थ्यांना व्यावसायिक अभ्यासक्रमांमध्ये प्रवेश घ्यायचा आहे, त्यांच्यासाठी  https://hmas.mahait.org या पोर्टलवर ऑनलाईन अर्ज भरण्याची प्रक्रिया सुरू झाली आहे.

चालू शैक्षणिक वर्ष 2025-26 साठी अभ्यासक्रमात शिकत असलेल्या सर्व विद्यार्थ्यांनी ऑनलाईन अर्ज भरणे बंधनकारक आहे. ऑनलाईन अर्ज भरल्यानंतर, तो पोर्टलवरून डाउनलोड करून त्याची प्रिंट काढून संबंधित वसतिगृहात ऑफलाईन अर्ज सादर करणे आवश्यक आहे.

अमरावती जिल्ह्यातील वसतिगृहे अमरावती स्थानिक वसतिगृहांमध्ये व्यावसायिक अभ्यासक्रमात प्रवेश घेण्यासाठी विभागीयस्तरावरील मागासवर्गीय 1 हजार मुलांसाठी शासकीय वसतिगृह संत गाडगे महाराज मुलांचे शासकीय वसतिगृह, निंभोरा तसेच मुलींसाठी 125 जयंती मागासवर्गीय मुलींचे नवीन विलास नगर, अमरावती तसेच तालुका स्तरावरील मुला, मुलींचे शासकीय वसतिगृह ऑनलाईन व्यावसायिक अभ्यासक्रमासाठी प्रवेश अर्ज स्वीकारण्याची प्रक्रिया सुरू झाली आहे.

विद्यार्थ्यांनी प्रवेश अर्ज संबंधित वसतिगृहाकडे सादर करावे, असे आवाहन समाज कल्याणचे सहायक आयुक्त राजेंद्र जाधवर यांनी केले आहे. व्यावसायिक अभ्यासक्रम, अर्ज स्विकृतीची अंतिम तारीख 30 सप्टेंबर 2025, तर प्रवेशाची यादी प्रसिध्द करावयाची तारीख 4 ऑक्टोबर 2025 राहील. तसेच अधिक माहितीसाठी दुरध्वनी क्रमांक 0721-2661261 हा आहे.

000000

शहरात प्रतिबंधात्मक आदेश लागू

अमरावती, दि. 26 (जिमाका) : शहरात शांतता व सुव्यवस्था अबाधित राहावी, यासाठी अमरावती शहर पोलीस आयुक्त यांनी महाराष्ट्र पोलिस कायद्याचे कलम 37 (1) व (3) नुसार प्रतिबंधात्मक आदेश जारी केले आहेत.

प्रतिबंधात्मक आदेश पोलिस आयुक्तालयाच्या परिक्षेत्रात लागू करण्यात आला आहे. हा आदेश दि. 29 सप्टेंबर ते दि. 13 ऑक्टोबरच्या मध्यरात्रीपर्यंत लागू राहणार आहे. या आदेशाचा भंग करणाऱ्या व्यक्तीविरूद्ध कायदेशीर कारवाई करण्यात येणार आहे, असे पोलीस आयुक्त अरविंद चावरिया यांनी कळविले आहे.

000000