प्राणी क्लेश प्रतिबंधक समितीची बैठक प्राणी क्लेश प्रतिबंधक कायद्याची काटेकोर अंमलबजावणी व्हावी - प्र. जिल्हाधिकारी संजय पवार
अमरावती, दि. 8 : जनावराची अवैध वाहतूक आदी नियमभंग करणा-या बाबी निदर्शनास येताच तातडीने कारवाई होणे आवश्यक आहे. प्राणी क्लेश प्रतिबंधक कायद्याचा भंग झाल्याचे आढळल्यास कठोर कारवाई करण्याचे निर्देश प्रभारी जिल्हाधिकारी संजय पवार यांनी आज येथे दिले.
जिल्हास्तरीय प्राणी क्लेश प्रतिबंधक समितीची बैठक आज जिल्हाधिकारी कार्यालयात झाली, त्यावेळी ते बोलत होते. समितीचे अशासकीय सदस्य राघवेंद्र नांदे, नंदकिशोर गांधी, चंद्रशेखर कडू, डॉ. सुनील सूर्यवंशी, महेश देवळे, विजय शर्मा, अजित जोशी, अमोल कथलकर, विजय गोहोत्रे, जिल्हा पशुसंवर्धन उपायुक्त डॉ. मोहन गोहोत्रे, पशुसंवर्धन अधिकारी डॉ. राधेश्याम बहादुरे, पोलीस उपअधीक्षक प्रदीप सूर्यवंशी, प्रादेशिक परिवहन अधिकारी प्रशांत देशमुख, जिल्हा माहिती अधिकारी हर्षवर्धन पवार, पोलीस उपनिरीक्षक आशिष देशमुख, डॉ. सचिन बोंद्रे आदी उपस्थित होते.
जनावरांची खरेदी- विक्री होताना आधारकार्ड अनिवार्य करण्याचा निर्णय यापूर्वीच घेण्यात आला आहे. प्रशासनाकडून तसे पत्र कृषी उत्पन्न बाजार समित्यांना दिले आहे. त्याची काटेकोर अंमलबजावणी व्हावी. प्राणी क्लेश प्रतिबंधक कायद्यानुसार दाखल गुन्ह्यांत अपेक्षित तपास आदी कार्यवाही न करणा-यांवर कारवाई करण्याबाबत निर्देश यावेळी देण्यात आले. प्राणीदया आदींच्या अनुषंगाने मुलांमध्ये जाणीव निर्माण व्हावी यासाठी शाळांतून काही उपक्रम राबविता येतील किंवा कसे, याचा विचार व्हावा, असेही प्र. जिल्हाधिकारी श्री. पवार यांनी सांगितले. समितीच्या बैठकांत झालेल्या चर्चेनुसार तात्काळ कार्यवाही करण्याचे निर्देशही त्यांनी दिले.
प्राणी क्लेश प्रतिबंध कायद्यानुसार अधिकाधिक कारवाया व्हाव्यात जेणेकरून गैरप्रकार करणा-यांना आळा बसेल व जागृतीही होईल. पोलीसांनी यात अधिक काटेकोर होत कारवाई करणे आवश्यक असल्याचे मत सदस्यांनी मांडले. याविषयी पोलीस अधिक्षकांसह स्वतंत्र बैठक घेण्याचा निर्णयही यावेळी झाला.
जिल्ह्यातील डॉग ब्रिडिंग सेंटर, बर्ड शॉप येथे नियमांचे पालन होते किंवा कसे, याबाबत नियमित तपासणी करण्याचा निर्णय घेण्यात आला.
00000
Comments
Post a Comment