मतदान, मतमोजणीला ड्राय डे
*सोमवारी सायंकाळी 6 पासून मद्यविक्रीस मनाई
अमरावती, दि. 15 : विधानसभा सार्वत्रिक निवडणुकीसाठी बुधवार, दि. 20 नोव्हेंबर रोजी मतदान होणार आहे. यानिमित्ताने सोमवार, दि. 18 नोव्हेंबर रोजी सायंकाळी सहा वाजेपासून दि. 20 नोव्हेंबरपर्यंत, तसेच मतमोजणीच्या दिवशी दि. 23 नोव्हेंबर रोजीही ड्राय डे राहणार आहे. याचे आदेश जिल्हाधिकारी सौरभ कटियार यांनी दिले आहेत.
मतदानाची वेळ संपण्यापुर्वी ४८ तास अगोदर म्हणजेच दि. १८ नोव्हेंबर रोजी सायंकाळी ६ वाजेपासून मतदानाच्या पूर्वीचा दिवस दि. १९ आणि मतदानाचा दिवस दि. २० नोव्हेंबर रोजी मद्यविक्री बंद राहणार आहे. तसेच मतमोजणीचा दिवस दि. २३ नोव्हेंबर रोजी मद्यविक्री बंद राहणार आहे. बंदचे कार्यक्षेत्र अमरावती जिल्हा राहणार आहे. याची जिल्ह्यातील सर्व संबंधित अबकारी अनुज्ञप्तीधारकांनी नोंद घ्यावी, अनुज्ञप्तीधारकांनी आदेशाचे उल्लंघन केल्यास त्यांच्याविरुद्ध महाराष्ट्र दारुबंदी कायदा १९४९ चे कलम ५४ (१) (सी) नुसार कारवाई करण्यात येणार आहे.
विधानसभा सार्वत्रिक निवडणुका खुल्या, मुक्त आणि निर्भय वातावरणात पार पाडण्यासाठी तसेच कायदा व सुव्यवस्था अबाधीत राहण्यासाठी लोकप्रतिनिधीत्व अधिनियम १९५१ च्या कलम १३५ (सी), महाराष्ट्र देशी दारु नियम १९७३ चा नियम २६ (१) (सी), महाराष्ट्र दारुबंदी कायदा १९४९ चे कलम १४२ (१), महाराष्ट्र विदेशी मद्य नियम (रोखीने विक्री, विक्रीच्या नोंदवह्या इत्यादी) नियम १९६९ चा नियम (९-ए१) (सी) (२), तसेच विविध नियमानुसार प्रदान केलेल्या अधिकारांचा वापर करुन कोरडा दिवस जाहिर करण्यात आला आहे.
जिल्ह्यातील सर्व देशी, विदेशी, किरकोळ व ठोक अबकारी अनुज्ञप्ती ज्यात नमुना बीआरएल, पीएलएल, सीएल-१, सीएल-२, सीएल-३, एफएल-१, एफएल-२, एफएल-३, नमुना ई. एफएल, बीआर-२, मोहा, एफएल-४ आदी यांचा समावेश आहे. अशा सर्व मद्यांसाठी कोरडा दिवस लागू राहणार आहे. त्यानुसार जिल्ह्यातील सर्व संबंधित अबकारी अनुज्ञप्ती बंद ठेवण्याचे आदेश देण्यात आले आहे.
000000
अचलपूरात तीन उमेदवारांना नोटीस
अमरावती, दि. 15 : अचलपूर विधानसभा मतदारसंघातील उमेदवारांच्या खर्चाची दुसरी तपासणी मंगळवार, दि. 12 नोव्हेंबर रोजी पार पडली. यात खर्च सादर केलेला नसलेल्या तीन उमेदवारांना नोटीस देण्यात आली.
उमेदवारांच्या खर्चावर देखरेख ठेवण्याकरीता खर्च निरीक्षक म्हणून उमा माहेश्वरी यांची नियुक्ती करण्यात आली आहे. खर्च निरीक्षकांनी उमेदवारांच्या लेख्यांची तपासणी करण्याकरीता तीन तारखा निश्चित केल्या आहेत.
उमेदवारांच्या लेख्यांच्या तपासणी वेळी एकूण 22 उमेदवारांपैकी 3 उमेदवार अनुपस्थित होते. सदर अनुपस्थित उमेदवारांना ४८ तासांच्या आत निवडणूक खर्चाचे लेखे नवीन प्रशासकीय भवन, उपविभागीय अधिकारी कार्यालय परिसर, अचलपूर येथे सादर करण्याबाबत नोटीस देण्यात आली आहे. विहीत मुदतीत खर्च सादर केला नसल्यास रितसर तक्रार दाखल करण्यात येणार आहे.
तपासणीअंती उमेदवारनिहाय खर्च तात्पुरत्या स्वरूपाची आहे. तिसऱ्या तपासणी दरम्यान दि. १६ नोव्हेंबर रोजी आयोजित लेखा ताळमेळ बैठकीमध्ये ताळमेळ घेऊन सदर खर्चास अंतिम स्वरुप देण्यात येणार आहे. सदर तपासणीवेळी उमेदवार तसेच उमेदवारांचे प्रतिनिधी हे उपस्थित होते.
000000
निवडणुकीतील ध्वनीक्षेपकाचा वापरावर निर्बंध
अमरावती, दि. 15 : विधानसभा निवडणुकीत प्रचारासाठी ध्वनीक्षेपकाचा उपयोग करण्यात येत आहे. मोठ्या आवाजात ध्वनीक्षेपकाचा वापर करण्यात येत असल्यामुळे जिल्हाधिकारी सौरभ कटियार यांनी ध्वनीक्षेपकाच्या आवाजावर निर्बंध घातले आहेत.
विधानसभा सार्वत्रिक निवडणुकीच्या कालावधीत उमेदवार आणि त्यांचे कार्यकर्ते, हितचिंतक वाहनांवर ध्वनीक्षेपक बसवून मोठ्या आवाजात प्रचार केल्याने ध्वनी प्रदूषण होणे, सर्वसामान्य लोकांच्या जीवनातील शांतता आणि स्वास्थ्यास बाधा पोहोचविण्याची आणि रात्री उशिरापर्यंत ध्वनीक्षेपक यंत्रणा चालू ठेवण्याची शक्यता असल्यामुळे या बाबींवर निर्बंध घालण्यात आले आहे.
निवडणूकीच्या प्रचारासाठी ध्वनीक्षेपकाचे वापर करताना ध्वनीक्षेपकाच्या वापरासाठी पोलीस अधिकारी यांची परवानगी घ्यावी, सकाळी ६ वाजण्यापूर्वी ते रात्री १० वाजेनंतर फिरते वाहन आणि क्षेत्रात ध्वनीक्षेपकाचा वापर करता येणार नाही, दिवसा प्रचाराकरीता फिरणाऱ्या वाहनांनी ध्वनीक्षेपकांचा वापर विशिष्ट ठिकाणी थांबून करावा, ध्वनीक्षेपकाचा आवाजासह फिरणाऱ्या वाहनास प्रतिबंध राहणार आहे. राजकीय पक्ष आणि उमदेवार, तसेच इतर व्यक्तींनी निश्चित ठिकाणी ध्वनीक्षेपकाचा वापरासंबंधी घेतलेल्या परवानगीची माहिती जिल्हादंडाधिकारी आणि संबंधित निवडणूक निर्णय अधिकारी, संबंधित यंत्रणेस कळविणे बंधनकारक राहणार आहे. ध्वनीक्षेपकाच्या वापरावर निर्बंध हे निवडणूक प्रक्रिया पुर्ण होईपर्यंत अंमलात राहणार आहे.
000000
ग्रामीण भागात कलम 37(1) व (3) लागू
अमरावती, दि. 15 (जिमाका) : जिल्ह्यात शांतता व सुव्यवस्था अबाधित राहावी, यासाठी पोलीस अधीक्षक (ग्रामीण), अमरावती यांनी महाराष्ट्र पोलिस अधिनियम 1951 चे कलम 37 (1) व (3) अन्वये प्रतिबंधात्मक आदेश जारी केला आहे.
सदर प्रतिबंधात्मक आदेश जिल्ह्यातील कायदा व सुव्यवस्था अबाधित राहावा, याकरिता पोलिस आयुक्तालय परिक्षेत्र वगळून अमरावती जिल्ह्यातील ग्रामीण भागात लागू करण्यात आला असून दि. 16 नोव्हेंबर ते 30 नोव्हेंबर 2024 च्या मध्यरात्रीपर्यंत लागू राहील. या कलमाचा भंग करणाऱ्या व्यक्तीविरूध्द कायदेशीर कारवाई करण्यात येईल, असे निर्देश जिल्हादंडाधिकारी सौरभ कटियार यांनी दिले आहे.
00000
No comments:
Post a Comment