उस्मानिया मस्जिद येथे ईव्हीएम-व्हीव्हीपॅट मशीनचे प्रात्यक्षिक

अमरावती, दि. 12 : खापर्डे बगिचा नजीकच्या उस्मानिया मस्जिद येथे स्वीप मोहिमेत आयोजित ईव्हीएम-व्हीव्हीपॅट प्रात्यक्षिकाला नागरिकांनी मोठा प्रतिसाद दिला.

भारतीय राज्यघटनेने भारतीयांना मतदानाचा हक्क दिला आहे. लोकशाहीला अधिक सक्षम करण्यासाठी घटनेने दिलेल्या हक्कानुसार 1952 पासून लोकसभेची निवडणूक होत आहे.  लोकसभा सार्वत्रिक निवडणूक 2019 च्या अनुषंगाने मतदान करणे हा प्रत्येक नागरिकांचा हक्क असून सर्वांनी या राष्ट्रीय उत्सवामध्ये सहभागी व्हावे, असे आवाहन जिल्हा प्रशासनाच्यावतीने करण्यात आले आहे.

भारत निवडणूक आयोगाच्या निर्देशानुसार जिल्हा निवडणूक निर्णय अधिकारी तथा जिल्हाधिकारी शैलेश नवाल आणि स्वीप मोहिमेच्या नोडल अधिकारी तथा मुख्य कार्यकारी अधिकारी मनीषा खत्री यांच्या मार्गदर्शन व सहभागाने संपूर्ण जिल्ह्यात मतदार जागृतीची मोहिम प्रभावीपणे राबविण्यात येत आहे. जिल्ह्यातील कोणताही मतदार हा मतदानाच्या हक्कापासून वंचित राहू नये म्हणून स्वीप मोहिमेच्या माध्यमातून जागृती करण्यात येत आहे.

ही मोहिम अधिक भक्कम करण्याच्या हेतूने सर्व नागरिकांसह मुस्लिम समाजामध्ये मतदानाविषयी जागृती करण्यासाठी आज उस्मानिया मस्जिद ईव्हीएम व्हीव्हीपॅट मशीनचे प्रात्यक्षिक तेथील लोकांना दाखविण्यात आले. यावेळी उपस्थितांच्या शंकांचे तज्ज्ञांकडून निरसन करण्यात आले. प्रत्यक्ष प्रात्यक्षिकांच्या माध्यमातून मतदान प्रक्रियेविषयी जागृती करण्यात आली. प्रत्यक्ष प्रात्यक्षिक पाहून त्यांनी मतदान करण्याचा संकल्प केला.

यावेळी बेरार मुस्लिम एज्युकेशनल कॉन्फरन्स व उस्मानिया मस्जिदचे अध्यक्ष एस.ए. हसन, उपशिक्षणाधिकारी एजाज खान, स्वीप मोहिमेचे डि. पी. घाटे, विरेंद्र गलफड, तुषार पावडे, संजय खारकर, समीर चौधरी, मिर्झा जुबेर बेग, प्रदीप बद्रे आदी उपस्थित होते. त्याचप्रमाणे बडनेरा परिसरातील मुस्लिम बहुल वस्तीत उर्दु शाळांच्या माध्यमातून मोठया प्रमाणावर जनजागृतीपर कार्यक्रम आज घेण्यात आले. त्यालाही नागरिकांनी मोठा प्रतिसाद दिला.