जिल्हा नियोजनच्या नाविण्यपूर्णमधून महिलांचा विकास करणार - पालकमंत्री डॉ. अनिल बोंडे
अमरावती, दि. 27 : महिलांचा विकास झाल्यास देशाचा विकास होतो. त्यामुळे महिलांच्या विकासासाठी जिल्हा नियोजन व विकास निधीमधील नाविन्यपूर्ण योजनेतून निधी उपलब्ध करुन देऊ. महिला आर्थिक विकास महामंडळाच्या माध्यमातून महिलांचा विकास करणारे उपक्रम राबविण्यात येतील, अशी माहिती पालकमंत्री डॉ. अनिल बोंडे यांनी दिली.
वरूड येथे महिला आर्थिक विकास महामंडळाच्या वतीने आज वार्षिक सर्वसाधारण सभा आणि महिला मेळावा घेण्यात आला. यावेळी पंचायत समिती सदस्य अंजली तूमराम, सरपंच स्वाती आंडे,उपविभागीय कृषी अधिकारी राहूल सातपूते, तालुका कृषी अधिकारी अजय यादवकर, जिल्हा समन्वयक खुशाल राठोड, डॉ. वसूधा बोंडे आदी उपस्थित होते.
डॉ. बोंडे म्हणाले, माविमच्या माध्यमातून महिलांमध्ये विश्वास निर्माण करण्याचे काम करण्यात येत आहे. महिलांची आर्थिक प्रगती होण्यासाठी त्यांना माफक दरात कर्ज पूरवठा करण्यात येत आहे. महिलांवर दाखविलेला विश्वास महिलांनी कर्ज पूर्ण परतफेड करुन खरा करून दाखविला आहे. महिलांच्या या प्रतिसादामुळे वरूड येथे कापडी पिशवी बनविण्याचा कारखाना सुरू करण्यात येत आहे. या ठिकाणी दोनशे महिलांना रोजगार मिळणार आहे.
बचत गटांनी केवळ उत्पादनावर लक्ष केंद्रीत न करता विक्रीवरही लक्ष केंद्रीत करावे. आज बाजारपेठेत माल विकणे ही एक कला असल्याने काही गटांनी यासाठी पुढाकार घ्यावा. आज विविध क्षेत्र बचत गटांसाठी उपलब्ध झाले आहे. गटांनी निंबोळी अर्क, जैविक खत आदी क्षेत्रातही कार्य करावे. यासाठी संपूर्ण सहकार्य करण्यात येईल, असेही डॉ. बोंडे म्हणाले.
सुरवातीला मॉ जिजाऊ, सावित्रीबाई फुले आणि रमाबाई आंबेडकर यांच्या प्रतिमेचे पूजन करण्यात आले. यावेळी उत्कृष्ट कार्य करणाऱ्या बचत गटांचा सत्कार करण्यात आला. खुशाल राठोड यांनी सवित्तर मार्गदर्शन केले.
00000
Comments
Post a Comment