पारधी समाजासाठी विकास योजनांबाबत चर्चा अधिकाधिक स्वयंरोजगाराचे उपक्रम राबवावेत - जिल्हाधिकारी शैलेश नवाल

अमरावती, दि. 16 : पारधी समाजाच्या विकासासाठी विविध योजना राबविण्यासाठी एकात्मिक आदिवासी प्रकल्पाद्वारे 2 कोटी 34 लाख रुपयांची तरतूद असून या निधीतून समाजातील अधिकाधिक युवकांना स्वयंरोजगार प्राप्त होण्यासाठी उपक्रम राबविण्याचे निर्देश जिल्हाधिकारी शैलेश नवाल यांनी दिले.

जिल्हाधिकारी कार्यालयात झालेल्या बैठकीत ते बोलत होते. प्रकल्प अधिकारी सुशीलकुमार खिल्लारे, उपजिल्हाधिकारी स्नेहल कनिचे, सामाजिक कार्यकर्ते मतीन भोसले यांच्यासह अनेक अधिकारी यावेळी उपस्थित होते.

श्री. नवाल म्हणाले की, स्वयंरोजगार निर्माण करण्यासाठी अधिकाधिक तरूणांना प्रोत्साहित करावे. कौशल्य प्राप्त तरुणांना रोजगार मिळण्यासाठी यंत्र सामुग्री आदी उपलब्ध करुन देण्यात येईल. वेल्डींग मशीन, मोटार रिवायडिंग, इलेक्ट्रीक फिटींग अशा विविध व्यवसायांसाठी साधने उपलब्ध करुन देण्यात येतील. महिला बचत गटांनाही विविध व्यवसायांसाठी सहाय्य करण्यात येईल.

हिऱ्याला पैलू पाडण्याचा किंवा घसाईचा उद्योग मुख्यत्वे गुजरातमध्ये सुरतला चालतो. त्यामुळे तेथे कामगार म्हणून जाणाऱ्यांची संख्या मोठी आहे. आता जिल्ह्यातही वाढोणा, अमरावती या ठिकाणी असे व्यवसाय सुरू झाले आहेत. याबाबत इच्छूक प्रशिक्षित तरूणांना यंत्र सामुग्री देऊन व्यवसायासाठी मदत करण्यात येईल. असा व्यवसाय यशस्वी झाल्यास या मदतीचे प्रमाण आणखी वाढविण्यात येईल असाही निर्णय यावेळी झाला.   

00000