महाऊर्जा’तर्फे ‘मजीप्रा’च्या पाणीपुरवठा यंत्रणेसाठी सौर ऊर्जा प्रकल्प
‘महाऊर्जा’तर्फे ‘मजीप्रा’च्या पाणीपुरवठा यंत्रणेसाठी सौर ऊर्जा प्रकल्प
वीजेत होणार मोठी बचत
अमरावती, दि. 19 : शहराला पाणीपुरवठा करणा-या महाराष्ट्र जीवन प्राधिकरणाचे मालटेकडीवरील जलशुद्धीकरण, तसेच सिंभोरा, तपोवन आदी केंद्रांवर ‘महाऊर्जा’तर्फे सौर ऊर्जा प्रकल्प उभारण्याच्या कामाने गती घेतली आहे. त्यापैकी तपोवन हेडवर्क्स येथील 365 मे. वॅट क्षमतेचा प्रकल्प कार्यान्वित झाला असून, प्राधिकरणाच्या वीज देयकात मोठी बचत होणार आहे.
‘महाऊर्जा’तर्फे अमरावती जिल्ह्यात 1 हजार 465 मे. वॅट क्षमतेचे तीन, यवतमाळ जिल्ह्यात 3 हजार 94 मे. वॅट क्षमतेचे सात, अकोला जिल्ह्यात 1.4 मे. वॅट क्षमतेचे 2 असे एकूण 5 हजार 959 मे. वॅट क्षमतेचे सौर वीज प्रकल्प कार्यान्वित आहेत.
शहराच्या पाणीपुरवठ्यासाठी साठवणूक, वहन, शुद्धीकरण करणा-या प्राधिकरणाच्या विविध केंद्रांवर सौर ऊर्जा केंद्रे उभारण्यात येत आहेत. तपोवन हेडवर्क्स येथे 365 कि. वॅट येथील प्रकल्प सुरू झाला आहे. सिंभोरा हेडवर्क्स येथे 990 कि. वॅट व मालटेकडी जलशुद्धीकरण केंद्र येथे 110 कि. वॅट क्षमतेचे सौर ऊर्जा प्रकल्प आस्थापित करण्यात आले असून, लवकरच ते कार्यान्वित होतील.
या उपक्रमासाठी ‘महाऊर्जा’चे महासंचालक रवींद्र जगताप, अतिरिक्त महासंचालक सूरज वाघमारे यांनी मार्गदर्शन केले. अपारंपरिक ऊर्जानिर्मितीच्या या प्रकल्पांमुळे वीजेत बचत होऊन पर्यावरण संवर्धनही साधले जाणार आहे, असे विभागीय महाव्यवस्थापक प्रफुल्ल तायडे यांनी सांगितले.
000
Comments
Post a Comment