महात्मा जोतिराव फुले शेतकरी कर्जमुक्ती योजना
पोर्टलवर माहिती अपलोड करण्याच्या प्रक्रियेला वेग
उर्वरित कामे दोन दिवसात पूर्ण करा
- जिल्हाधिकारी शैलेश नवाल
अमरावती, दि. 3 : महात्मा जोतिराव फुले शेतकरी कर्जमुक्ती योजनेतील पात्र लाभार्थ्यांची माहिती पोर्टलवर भरण्याची प्रक्रियेने गती घेतली असून अनेक बँकांचे काम पूर्ण झाले आहे. उर्वरित बँकांनी येत्या दोन दिवसात ही कार्यवाही पूर्ण करावी, असे निर्देश जिल्हाधिकारी शैलेश नवाल यांनी दिले.
जिल्हाधिकारी कार्यालयात जिल्हाधिकारी श्री. नवाल यांनी काल महात्मा जोतिराव फुले कर्जमुक्ती योजनेबाबत बँकर्सची बैठक घेऊन माहिती भरण्याची प्रक्रिया पूर्ण करण्याचे निर्देश दिले होते. त्यानुसार बँकांकडून प्रक्रियेला वेग देत कामे पूर्ण करण्यात येत आहेत. जिल्हाधिकाऱ्यांनी आज पुन्हा सर्व बँक अधिकाऱ्यांची बैठक घेऊन माहिती घेतली. जिल्हा उपनिबंधक संदीप जाधव, जिल्हा अग्रणी बँक व्यवस्थापक जितेंद्रकुमार झा, आदी उपस्थित होते.
श्री. नवाल म्हणाले की, बँकांकडून सरासरी 70 टक्के काम पूर्ण झाले आहे. आंध्रा बँक, बडोदा बँक, विजया बँक, देना बँक, बँक ऑफ इंडिया, कॉर्पोरेशन बँक, आयडीबीआय बँक, इंडियन बँक आदी विविध बँकांची कामे उद्यापर्यंत पूर्ण होतील. उर्वरित बँकांनीही तातडीने माहिती भरण्याची प्रक्रिया पूर्ण करावी. स्टेट बँक ऑफ इंडिया, सेंट्रल बँक ऑफ इंडिया, युनियन बँक ऑफ इंडिया यांनी आधार लिंकबाबत स्पेशल ड्राईव्ह घेणे आवश्यक आहे.
शेतकऱ्यांची माहिती नोंदविण्यासाठी 15 फेब्रुवारीपर्यंत कालावधी असला तरी सात फेब्रुवारीपर्यंत संपूर्ण नावे नोंदविण्यासाठी प्रयत्न करावे. प्रत्येक शेतकऱ्यांची माहिती व्यवस्थित भरावी, यातून कोणताही पात्र लाभार्थी सुटू नये, याची खबरदारी बँकांनी घ्यावी, असे निर्देशही जिल्हाधिकारी यांनी यावेळी दिले.
000000
Comments
Post a Comment