अमरावती, दि. 27 : विभागीय ग्रंथालय, जिल्हा ग्रंथालय व जिल्हा माहिती कार्यालयातर्फे मराठी भाषा गौरव दिनानिमित्त येथील विभागीय ग्रंथालयात दुर्मिळ ग्रंथांचे प्रदर्शन आयोजित करण्यात आले. त्याला विद्यार्थी, अभ्यासक, विविध क्षेत्रांतील मान्यवर व नागरिकांनी मोठ्या संख्येने भेट दिली.
ग्रंथप्रदर्शनाचा शुभारंभ निवासी उपजिल्हाधिकारी डॉ. नितीन व्यवहारे यांच्या हस्ते झाला. विभागीय माहिती उपसंचालक राधाकृष्ण मुळी, जिल्हा ग्रंथालय अधिकारी सूरज मडावी, सहायक संचालक राजेश पाटील, जिल्हा माहिती अधिकारी हर्षवर्धन पवार आदी उपस्थित होते. प्रारंभी कवी कुसुमाग्रज यांच्या प्रतिमेला डॉ. व्यवहारे यांच्या हस्ते पुष्पहार अर्पण करून अभिवादन करण्यात आले.
ग्रंथप्रदर्शनात 1960 व तत्पूर्वीच्या अनेक साहित्यकृतींचा समावेश करण्यात आला. कवी कुसुमाग्रज यांच्या कवितासंग्रहांसह इतर वाङमयप्रकारातील साहित्यकृती मांडण्यात आल्या होत्या. अनेक प्रसिद्ध पुस्तकांच्या सुरुवातीच्या आवृत्ती प्रदर्शनात रसिकांना पाहता आल्या. ज्ञानेश्वरीच्या हिंदी अनुवादाची प्रत, लीळाचरित्रावरील ग्रंथ, विश्वकोशाचे खंड, विविध कोश यांचाही प्रदर्शनात समावेश होता.
दुर्मिळ पुस्तके हा संस्कृतीचा ठेवा आहे. त्यांचे जतन योग्य पद्धतीने व्हावे, आवश्यक त्या पुस्तकांचे डिजीटायझेशन आदी करता येते किंवा कसे, या दृष्टीने प्रयत्न व्हावेत, अशी सूचना डॉ. व्यवहारे यांनी यावेळी केली. कार्यक्रमाला ग्रंथप्रेमी, विद्यार्थ्यांची मोठी उपस्थिती होती.
No comments:
Post a Comment