जिल्ह्यातील सर्व न्यायालयांत 11 फेब्रुवारीला लोकअदालत
जिल्ह्यातील सर्व न्यायालयांत 11 फेब्रुवारीला लोकअदालत
अमरावती, दि. 2 : राष्ट्रीय विधी सेवा प्राधिकरण, तसेच राज्य प्राधिकरणाच्या निर्देशान्वये जिल्ह्यातील सर्व न्यायालयात शनिवार, दि. 11 फेब्रुवारी रोजी राष्ट्रीय लोकअदालतीचे आयोजन करण्यात आले असून त्यात दाखल व दाखलपूर्व प्रकरणे तडजोडीने व सामंजस्याने निकाली काढण्यात येणार आहेत.
लोकअदालतीत अर्ज करणा-यांना कोणत्याही प्रकारचे अतिरिक्त शुल्क भरावे लागणार नाही. पक्षकारांनी आपले तडजोडप्राप्त प्रलंबित खटले राष्ट्रीय लोकअदालतीसमक्ष तडजोडीने व समंजस्याने मिटविण्यासाठी संबंधित न्यायालयात अर्ज करावा, तसेच दाखलपूर्व प्रकरणांबाबत नजिकच्या संबंधित जिल्हा किंवा तालुका न्यायालयाकडे संपर्क साधावा. पक्षकारांनी या संधीचा लाभ घेऊन राष्ट्रीय लोकअदालतीसमक्ष आपली प्रकरणे सामंजस्याने व तडजोडीने मिटवावीत, असे आवाहन जिल्हा विधी सेवा प्राधिकरणाचे अध्यक्ष तथा प्रमुख जिल्हा व सत्र न्यायाधीश व्ही.पी. पाटकर तसेच सचिव जी.आर. पाटील यांनी केले आहे.
*****
Comments
Post a Comment