स्वस्थ भारत मिशनच्या आरोग्य तपासणी बसचे मुख्यमंत्र्यांच्या हस्ते लोकार्पण

नागपूर, दि. 20 : अमरावती जिल्ह्यातील अश्वमेध संस्थेच्या वतीने सुरू करण्यात आलेल्या स्वस्थ भारत मिशन प्रकल्पासाठी डिएक्ससी टेक्नॉलॉजीच्या सामाजिक उत्तर दायित्व निधीतून देण्यात आलेल्या अत्याधुनिक वैद्यकीय तपासणी सुविधा असलेल्या बसचे लोकार्पण मुख्यमंत्री देवेंद्र फडणवीस यांच्या हस्ते आज रामगिरी निवासस्थानी झाले.

            यावेळी आमदार नरेंद्र पवार, अश्वमेध संस्थेचे अध्यक्ष यशवंत पांडे, डिएक्ससी टेक्नॉलॉजीच्या इआयटी सर्व्हिसेस लि.चे व्यवस्थापकीय संचालक मार्शल कॉर्रेया, भारतातील प्रमुख कमांडर गिरीश कुमार, सीएसआयआर निरी चे डॉ. नितीन लाभशेठवार, अंकित गुप्ता, प्रकल्प समन्वयक राजेश साबू आदी उपस्थित होते. यावेळी मुख्यमंत्र्यांच्या हस्ते बसची चावी अश्वमेध संस्थेला देण्यात आली.

अश्वमेध संस्थेच्या वतीने स्वस्थ भारत मिशन अंतर्गत अमरावती जिल्ह्यातील गावांमध्ये आरोग्य तपासणी शिबीरे घेण्यात येतात. यासाठी डिएक्ससी टेक्नॉलॉजीच्या वतीने तपासणीसाठी आवश्यक सर्व अत्याधुनिक तंत्रज्ञान आणि सुविधा असलेली बस देण्यात आली आहे. ही बस अमरावती जिल्ह्यातील 50 गावांमध्ये जाऊन ग्रामस्थांच्या आरोग्याची तपासणी करणार आहे. यामध्ये रक्तातील हिमोग्लोबिन, साखर, प्लेटलेट्स तपासणी, लघवी तपासणी, रक्तदाब तपासण्याची आधुनिक यंत्रणा व सुविधा आहे. तपासणी नंतर प्रत्येकाला आरोग्य पत्रिका देण्यात येणार आहे. तपासणीनंतर आवश्यक असल्यास डॉ. पंजाबराव देशमुख स्मृती वैद्यकीय महाविद्यालयात उपचार केले जाणार आहेत. यासाठी महाविद्यालयाचे सहकार्य मिळणार आहे.

या शिबिर काळात निरी संस्थेच्या वतीने गावातील पाण्याची व हवेतील प्रदूषणाची तपासणी करण्यात येणार आहे. यातून आरोग्याच्या समस्या कशामुळे उद्धभवत आहे हे जाणून घेऊन त्यावर उपाय सुचविण्यात येणार आहेत. तसेच ग्रामस्थांचे प्रबोधन करण्यात येणार आहे.

०००