व्याघ्रदिन दिनानिमित्त प्रतिकृती व सौंदर्यीकरण
पालकमंत्र्यांच्या हस्ते अमरावती रेल्वेस्थानकावर लोकार्पण
अमरावती, दि. 29 : मेळघाट व्याघ्र प्रकल्पातर्फे व्याघ्र दिनानिमित्त व्याघ्र संवर्धनाबाबत जनजागृतीसाठी वन्यजीवनाचे दर्शन घडविणा-या कलाकृतींचे लोकार्पण अमरावती रेल्वेस्थानकावर पालकमंत्री प्रवीण पोटे पाटील यांच्या हस्ते आज झाले.
खासदार आनंदराव अडसूळ, मुख्य वन्यजीव संरक्षक तथा प्रकल्पाचे क्षेत्र संचालक एम. एस. रेड्डी यांच्यासह वनविभागाचे तसेच रेल्वेचे अनेक अधिकारी- कर्मचारी उपस्थित होते.
मॉडेल रेल्वे स्थानक या अमरावती स्थानकाच्या लौकिकात या सौंदर्यीकरणाने भर पडली आहे. रेल्वे स्थानकाच्या दर्शनी भागात विकसित केलेल्या उद्यानातील हिरवळीवर वाघाची प्रतिकृती बसविण्यात आली असून, आतील भागात प्लॅटफॉर्मवर आणि भुयारी मार्गातील भिंतीवर वन्यजीवनाचे, विशेषत: व्याघ्र संरक्षणाचे महत्व पटविणारी चित्रे काढण्यात आली आहेत. त्याचप्रमाणे, प्लॅटफॉर्मवरील खांबांवरही वाघाच्या प्रजातीनुसार पाठीवरील पट्टे, ठिपके आदींची चित्रे काढण्यात आली आहेत. या कलाकृतींतून व्याघ्र दर्शन घडवून त्याद्वारे जनजागृती करण्याचा प्रयत्न आहे, असे श्री. रेड्डी यांनी यावेळी सांगितले.
अमरावती एक्स्प्रेस या गाडीला अधिक डबे जोडण्याच्या मागणीवर कार्यवाही होत आहे. त्याचप्रमाणे, दुरांतो एक्स्प्रेसला जादा तांत्रिक स्टाफ देण्याबाबत कार्यवाही होत असल्याचे खा. अडसूळ यांनी सांगितले.
व्याघ्रदिनानिमित्त परतवाडा, सेमाडोह आणि चिखलदरा येथे जाणा-या रस्त्यांच्या संगमस्थळी वाघाची सहा फुट प्रतिकृती उभारण्यात आली. त्याचेही लोकार्पण खासदार आनंदराव अडसूळ यांच्या हस्ते झाले.
00000
Comments
Post a Comment