पालकमंत्री पांदणरस्ते योजनेचा आढावा योजनेतील कामांचे अचूक नियोजन करुन गती द्यावी - पालकमंत्री प्रवीण पोटे पाटील

अमरावती, दि. 27 : जिल्ह्यात राबविण्यात येणारी पालकमंत्री पांदण रस्ते योजना आता राज्यभर राबविण्यात येत आहे. जिल्ह्यात यंदा करावयाच्या सर्व कामांचा तांत्रिक अंगाने विचार करुन अचूक नियोजन करावे आणि या कामांना गती द्यावी, असे निर्देश पालकमंत्री प्रवीण पोटे पाटील यांनी आज येथे दिले.

          जिल्हाधिकारी कार्यालयातील विविध विषयांच्या आढावा बैठकीत ते बोलत होते. जिल्हाधिकारी अभिजित बांगर, जिल्हा परिषदेच्या मुख्य कार्यकारी अधिकारी मनीषा खत्री, जिल्हा पोलीस अधिक्षक अभिनाशकुमार, जिल्हा उपवनसंरक्षक हेमंतकुमार मीना, महापालिका आयुक्त संजय निपाणे यांच्यासह अनेक अधिकारी उपस्थित होते.

          जिल्ह्यातील गावांकडून पांदणरस्त्यांचे एकूण 2 हजार 404  प्रस्ताव प्राप्त आहेत. सर्व प्रस्तावांचा तांत्रिकदृष्ट्या अभ्यास करुन कामाची गरज, उपलब्ध जागा, अतिक्रमणे हटविण्याची कारवाई आदी बाबी लक्षात घेऊन नियोजन करावे. जिल्ह्यातील ही योजना ग्रामीण भागासाठी तिची उपयुक्तता लक्षात घेऊन राज्यात अंमलात आली आहे.  त्यामुळे अधिकाधिक कामे पूर्ण होण्याच्या दृष्टीने काटेकोर व गतिमान कार्यवाही करावी, असे निर्देश श्री. पोटे पाटील यांनी यावेळी दिले.

          क वर्ग तीर्थक्षेत्र विकास योजनेत  विविध यात्रा स्थळे व तीर्थक्षेत्रांसाठी प्राप्त निधीनुसार प्रगतीतील कामांना गती देण्याचे निर्देशही त्यांनी यावेळी दिले.