अमरावती, दि. 2 – धकाधकीच्या आजच्या जीवनात तणावांपासून मुक्ती मिळविण्यासाठी आपल्या दैनंदिन वेळापत्रकात व्यायाम, खेळांचा समावेश असला पाहिजे. खेळांतून शरीर सुदृढ होण्यासह मानसिक सक्षमता व खिलाडू वृत्तीचा विकास होतो, असे श्री शिवाजी शारिरीक शिक्षण महाविद्यालयाच्या प्राचार्य अंजली ठाकरे यांनी आज येथे सांगितले.
औद्योगिक प्रशिक्षण संस्थेच्या प्रांगणात ‘क्रीडा स्पर्धा, तंत्र प्रदर्शन व सांस्कृतिक महोत्सव 2020 चे उद्घाटन करताना त्या बोलत होत्या. ‘अस्पा बंडसन्स ऑटो’चे संचालक उद्योजक रणजीत बंड, जिल्हा व्यवसाय शिक्षण व प्रशिक्षण अधिकारी के. एस. विसाळे, सहायक संचालक नरेंद्र येते, प्राचार्य मंगला देशमुख, उपप्राचार्य आर. जी. चुलेट, श्रीमती एम. आर. गुढे, पी. जी. कुमरे, निदेशक बोधराज काळे आदी यावेळी उपस्थित होते.
श्री. बंड म्हणाले की, खेळांत हारजीत होतच असते पण प्रत्येकवेळी जिंकण्याच्या निर्धाराने खेळायचे असते. विद्यार्थ्यांत विजिगिषु वृत्तीचा विकास खेळांतून होतो.
स्पर्धेत व्हॉलीबॉल, कबड्डी, क्रिकेट आदी क्रीडा प्रकारांत जिल्ह्यातील 14 औद्योगिक प्रशिक्षण संस्थांच्या संघांनी या स्पर्धेत सहभाग घेतला. त्याशिवाय खो- खो व लांब उडी, उंच उडी, धावणे आदी वैयक्तिक खेळांचे आयोजन करण्यात आले. उद्या (3 जानेवारी) तंत्र प्रदर्शनाचा शुभारंभ होणार असून, त्यात विविध तंत्र शाखांचे अभिनव अविष्कार सादर केले जाणार आहेत, अशी माहिती प्राचार्य श्रीमती देशमुख यांनी दिली.
संस्थेचे शिल्प निदेशक रवींद्र दांडगे, अनिल रेड्डीवार, एस. एस. गोरे, एस. एल. वानखडे, एस. एस. पाटबागे, ए. एम. मेश्राम, वाय. बी. देशपांडे, जी. पी. मसराम, व्ही. आर. पडोळे, एन. आर. कथले, के. डी. फुटाणे, आर. जे. नेमाडे, जे. आर. झेगेकर, जी. व्ही. चोपडे, एम. आर. गुढे, डी. एच. गुरव आदी उपस्थित होते. सुमेधा मोरे यांनी सूत्रसंचालन केले. श्री. कुमरे यांनी आभार मानले.
00000
No comments:
Post a Comment