धामगाव रेल्वे येथे अमृत कलश यात्रा उत्साहात संपन्न
धामगाव रेल्वे येथे अमृत कलश यात्रा उत्साहात संपन्न
अमरावती, दि. 26 (जिमाका): स्वातंत्र्याच्या अमृत महोत्सवाच्या समारोपीय कार्यक्रमांतर्गत ‘मेरी मिट्टी मेरा देश’ (मिट्टी को नमन, विरोंको वंदन) हे अभियान प्रशासनामार्फत सर्वस्तरावर राबविण्यात येत आहे. गाव ते शहरापर्यंत आपल्या मातीविषयी जनजागृती, प्रेम आणि साक्षरता निर्माण व्हावी तसेच या मातृभूमीसाठी झटणारे आणि त्यासाठी आपल्या प्राणांची आहुती देणाऱ्या शूरवीरांचा सन्मान व्हावा, यासाठी हे अभियान देशभर राबविण्यात येत आहे.
या अभियानांतर्गत सर्व स्थानिक नागरी स्वराज्य संस्थांनी योगदान द्यावे व मोठ्या प्रमाणावर जनसहभाग मिळावा, यासाठी नगरपरिषद धामणगाव रेल्वे येथे अमृत कलश यात्रा काढण्यात आली. अमृत कलश यात्रेचा प्रारंभ नगरपरिषद कार्यालयातून झाला. संपूर्ण गावामध्ये फिरुन या यात्रेचा समारोप शहिद भगतसिंग चौक येथे महाराष्ट्र गान, पंचप्रण शपथ व स्वच्छता शपथ घेऊन समारोप करण्यात आला.
अमृत कलश यात्रेत धामणगाव रेल्वे येथील नागरिकांनी उत्साहाने सहभाग घेतला. येथील सर्व शैक्षणिक संस्था, शिक्षक व विद्यार्थी या यात्रेत सहभागी झाले होते. यावेळी पोलीस प्रशासनेही चोख बंदोबस्त व सुरक्षा व्यवस्था ठेवली. यात्रेतील सहभागी विद्यार्थी व लहानग्यांना सार्वजनिक गणेश मंडळामार्फत खाऊचे वाटप करण्यात आले. येथील अमृत कलश यात्रा यशस्वीपणे पूर्ण झाल्याचे धामणगाव रेल्वे नगरपरिषदेचे मुख्याधिकारी यांनी सांगितले.
*****
Comments
Post a Comment