जिल्हाधिकारी कार्यालयात पर्यटन व्यावसायिक, ट्रॅव्हल्स मालकांची बैठक
-डॉ. नितीन व्यवहारे
अमरावती, दि. 17 : कोरोना विषाणूच्या देशातील प्रादुर्भावाच्या पार्श्वभूमीवर टुर्स-ट्रॅव्हल्सच्या मालकांनी प्रवासी बसमध्ये प्रवास करणाऱ्यांना निर्जंतुकीकरणाची सुविधा उपलब्ध करुन द्यावी, तसेच बाहेरून येणाऱ्या प्रवाशांबाबत प्रशासनाला वेळीच माहिती द्यावी. दक्षतेसंबंधी शासनाने जारी केलेल्या प्रत्येक बाबींचे पालन व्हावे, असे निर्देश निवासी उपजिल्हाधिकारी डॉ. नितीन व्यवहारे यांनी आज येथे दिले.
जिल्ह्यातील ट्रॅव्हल्स बसचे मालक, पर्यटन व्यावसायिकांची बैठक निवासी उप जिल्हाधिकारी यांच्या दालनात आज झाली, त्यावेळी ते बोलत होते. तहसीलदार संतोष काकडे, टुर्स अँड ट्रॅव्हल्स संघटनेचे मिराजभाई, भूषण कोल्हे, दिनेश अग्रवाल, महेश कोल्हे, सचिन निचळे, संजय हेमनानी, उमेश उमप, केदार मून, चेतन हरणे, प्रकाश मांगरूळकर, श्याम अग्रवाल, हरमेश सुराणा, नंदू शिरभाते आदी यावेळी उपस्थित होते.
श्री. व्यवहारे म्हणाले की, बाहेरून येणा-या प्रत्येक व्यक्तीची माहिती प्रशासनाला द्यावी. त्यांची तपासणी आवश्यक आहे. संशयित आढळल्यास त्यांना देखरेखीत ठेवण्यासाठी वलगाव येथे आयसोलेटेड क्षेत्र तयार करण्यात आले आहे. तिथे आवश्यक सुविधाही उपलब्ध करून देण्यात आल्या आहेत. सुरक्षिततेसाठी खबरदारी घेणे आवश्यक असून, त्यासाठी सर्वांनी सहकार्य करावे. ट्रॅव्हल्समध्ये प्रवास करणाऱ्या प्रवाश्यांसाठी बसमध्ये निर्जंतुकीकरणाची सर्व सुविधा उपलब्ध करुन त्याचा उपयोग करण्यासाठी सांगावे. ट्रॅव्हल्सच्या बुकींग पाईंटवर तसेच शहरातील ट्रॅव्हल्सच्या सुटण्याच्या ठिकाणी पॉवर हाऊस येथे दर्शनी भागात कोरोना आजारा संबंधीचे, घ्यावयाच्या काळजीचे, जनजागृतीचे बॅनर लावण्यात यावे. ट्रॅव्हल्स बसमधील पडदे व बेडशीट, ब्लॅकेंटस् आदी वस्तु स्वच्छ तसेच निर्जंतुक करुन वापरण्यास द्यावे.
जगभरात कोरोनाबाबत निर्माण झालेली स्थिती पाहता पर्यटन व्यवसायावर विपरीत परिणाम झाला आहे. प्रवाशांकडून बुकिंग रद्द होत आहेत. मात्र, अशावेळी काही देशांतील पर्यटन व प्रवासासाठीच्या बुकिंग खर्च परतावा मिळू शकत नाही. त्यामुळे याबाबत प्रशासनाकडून पाठपुरावा व्हावा, असे निवेदन संघटनेतर्फे जिल्हा प्रशासनाला देण्यात आले. याबाबत सकारात्मक पाठपुरावा करण्यात येईल. असेही त्यांनी सांगितले.. आपत्ती व्यवस्थापनासाठी संघटनेकडून प्रशासनाला संपूर्ण सहकार्य करण्यात येईल, असे यावेळी संघटनेच्या वतीने सदस्यांनी सांगितले.
00000
Comments
Post a Comment